Read Biblija - Pe Baltitko Romani čib (Romanes) 2019 Baltic Romani Bible Judénge 3 Bible Online

Judénge 3 - Biblija - Pe Baltitko Romani čib (Romanes) 2019 Baltic Romani Bible bible

Judénge 3

¹Paldavá, pšalále svénta, savén Devél adiáke-pac' prikhardia, dykhén pe Isusóste, Saves Devél bičhadiá te javél anglatuné Rašása pir amaró patiaibén,

²Savó isyn patiaibnýtko Odoléske, Kon čhudiá Les pe daja butý, syr i Mójza adiáke-pac' pir saró Devléskiro Kher.

³Pal-dová so Léste sys baredýr sláva, syr Mojzaste, adiáke-pac' syr manušéste, savó čhudiá kher, kutiakirena (déna patýv) butýr, syr kokoró kher.

⁴Pal-dová so kažno kher vari-savó manúš čhuvéla, a Kodová, Kon čhudiá saró, isyn Devél.

⁵I Mójza sys čačunó dynári pir saró Devléskiro Kher vaš dophenybén pal dová, so trej te javél angíl;

⁶a Xristóso syr Devléskiro Čhavó, sys Xuláj pir Léskiro kher; ame sam kokoré manušá Léskire kheréskire, kóli zoraló patiaibén i nadiéia, savjása ame šarasape, javéla aménde ke kónco (ke jagóro).

⁷Paldavá Svénto Dúho (Fáno) rakiréla: “Kóli adadyvés tumé šunéna Léskiri zan,

⁸na otriskiren péskiro iló, syr da tumé ĥazdynépe pe Devléste, kiéli tumé sánas pe čhučí phuv;

⁹kaj tumaré dadá propatiakirenas Man, mek jone i dykhné, so Me kerdjom štardešá berš.

¹⁰Paldavá Me i xoliasyjom pe adalé manušénde i phendjom: ‘Saró časo jone xohavena pes dro péskiro iló, i jone na džinéna Miro drom’;

¹¹paldavá Me sovlahadjom dre xolý: ‘Jone nijékhvar na zadžána dro Miro štéto te otkhinjon Mánca’.

¹²Pšalále, dykhén, sob (kaj) te na javél phut'kirdo iló ni dre konéste tuméndyr, savó na kandéla Devlés, sob (kaj) tumé te na otdžan džidé Devléstyr.

¹³A podrikiren jekh jekhés so dyvés ke/žýko dová časo, paka saštý te rakirés “adadyvés”, sob (kaj) grého te na xohavél tumen i te na otriskirel tumaró iló.

¹⁴Pal-dová so ame jačasape khetané Xristosósa, kóli zrakhasa dová zoraló patiaibén ke kónco (ke jagóro), so aménde sys angledýr.

¹⁵Paldavá isyn phendló: “Kóli tumé adadyvés šunéna Léskiri zan, na otriskiren péskiro iló, syr tumaré dadá davá kerdé, kiéli ĥazdynépe pe Devléste”;

¹⁶kon sys odolé manušá, so, kiéli šundlé, ĥazdynépe pe Devléste? Naúšto na saré léndyr vyginé Jegiptóstyr Mojzasa?

¹⁷i pe konéste Devél sys xoliamó štardešá berš? Ci na pe odolénde, savé kerdé gréhi, i koneskire kokalý jačnépe te pasjon pe čhučí phuv?

¹⁸I konéske Jov sovlahadiá, so jone na zadžána pe štéto te otkhinjon Lésa, naúšto na odolénge, kon na kandyjá Les?

¹⁹I ame dykhasa, so jone na mogindlé te zadžán pe Léskiro štéto te otkhinjon, pal-dová so jone na patiandyné.