Read Biblija - Pe Baltitko Romani čib (Romanes) 2019 Baltic Romani Bible Judénge 7 Bible Online

Judénge 7 - Biblija - Pe Baltitko Romani čib (Romanes) 2019 Baltic Romani Bible bible

Judénge 7

¹Pal-dová so Mielhisedéko sys Salimoskiro králi, rašáj Naj Vučedyreskire Devléskiro, odová, kon strenindia (pirilyja) Avraamos i bahtiakirdiá les, kiéli odová risjolas pale, syr muliakirdiá kral'jén;

²i konéske Avraámo adiáke-pac' otdyjá déšto paš saréstyr, pal-dová so lav Mielhisedeko značynéla “čačipnáskiro Králi”, i pal-dová so jov sys Salimoskiro králi, léskiro lav adiáke-pac' značynéla “Ramanjoskiro (Miroskiro) Králi”;

³jov sys bidadeskiro, bidakiro, nikón na džindiá pal léskiro ródo; davá isyn nadžindlo adiáke-pac', kiéli jov bijándyja i kiéli myjá, Jov isyn sýrby Devléskiro Čhavó i rašáj pe saré viéki.

⁴Dykhén, savó baró manúš sys Mielhisedeko, konéske až baró rašáj Avraámo dyjá déšto paš péskire mištypnástyr, savó jov jandiá maribnastyr.

⁵A kodolé Lievijoskire čhavé, savé jačénape rašanca pir Zakóno, i jone skedéna déšto paš Izrailjoskire manušéndyr, léngire pšaléndyr; mek jone isyn Avraamóskire rodóstyr.

⁶Kadavá manúš nane Lievijoskire rodóstyr, ne jov lyjá déšto paš Avraamostyr i bahtiakirdiá les, manušés, savó ĥaredyr doresciá lav Devléstyr.

⁷Davá isyn čačipén, so kodová manúš bahtiakiréla, kon isyn baredýr odoléstyr, savés jov bahtiakiréla.

⁸Rašaja, savé léna déšto paš, meréna, a pal Mielhisedekoste isyn phendló, so jov léla déšto paš, i dživéla.

⁹Saštý (možna) te phenas, so až kokoró Lievijo, kon léla déšto paš, pleskirdia déšto paš Mielhisedekoste pir Avraamoste.

¹⁰Pal-dová so, kiéli Mielhisedeko strenindia (pirilyja) Avraamos, tedy Lievijo na sys iščo (inké) pe svéto Avraamoste.

¹¹Kóli moginénas Lieviténgire rašaja te kerén ke kónco (ke jagóro) péskiri butý, syr rašaja angíl Devléste, pal-dová so pir daja butý Zakóno sys dynó manušénge, tedy vaš so treindiá te javél javír Rašáj dasavo-pac' syr Mielhisedeko, a na dasavo-pac', sob (kaj) te kharelpe, so jov pir Aronoskiro rašaipen (titulo).

¹²Pal-dová so, kóli paruvena rašán, tedy trej i te paruven Zakóno.

¹³Amaró Raj Devél, pal Konéste ame rakirasa kakaná, sys javire rodóstyr, savéstyr nikón i nijékhvar na dynarindiá pašýl altárjo.

¹⁴Ame džinása, so amaró Raj Devél sys Judáskire rodóstyr, pal Savéste Mójza (Moisiejo) nisó na phendiá pal rašande kadalé rodóstyr.

¹⁵Kakaná ame butýr džinása, so isyn javír rašái, savó isyn adasavó-pac' syr Mielhisedéko,

¹⁶Savó jaciá rašása na pir manušéngiro uphenyben, syr dadá, a pir džiibnáskiri zor, saví naštý te muliakires.

¹⁷Pal-dová so Svénto Čhinybén rakiréla: “Tu san Rašáj pe saré viéki, kadasavó-pac', syr i Mielhisedeko sys.”

¹⁸Paldavá adiáke isyn, so phurané-manušéngiro priphenybén otparuvena, pal-dová so jov isyn nálačho i léstyr nane nisavó kučipén.

¹⁹Pal-dová so Mojzáskiro Zakono na kerdiá nisó, sob (kaj) vari-so te javél bidošakiro; i, ĥáda, aménde isyn fededýr nadiéia, pir saví ame javása pašyledýr ke Devél.

²⁰Adavá saró isyn pir Devléskiri sovláh,

²¹pal-dová so saré javír rašaja jačné te kerén Devléskiri butý bi sovlahakiro, a Xristóso jaciá Rašása (jaciá Rašái) pir Devléskiri sovláh, pal-dová so pal Léste isyn phendló: “Raj Devél sovlahadiá, i Jov na délape pale: “Tu san rašáj pe saré viéki””,

²²paldavá Isúso isyn sýrby dudvaló (poručytieljo), so nevó zavieto isyn fedýr.

²³I kadasavé rašaja sys but ĥaredyr pir phuranó zavieto, jone merenas i jone na moginénas te jačénpe pe péskiri butý.

²⁴Ne Isúso jačélape Rašása pe saré viéki, i Léskiri butý na piridelape ni konéske.

²⁵Paldavá Isúso moginéla te zrakhél saré manušén, savé javéna pašyledýr ke Devél pir Léste; Jov isyn ŭsády (sak) džidó te mangél Devlés pal lénde.

²⁶Pal-dová so adasavó Anglatunó Rašáj i trej aménge: svénto, lačhé-ilýtko, na magirdó grehosa; Devél čhudiá Les dre rig grehitkoné manušéndyr i ĥazdyjá Les vučés dro Bolybnáskiro Rajo.

²⁷Léske na trej te janel svénto dyibén kažno dyvés, syr javír rašaja keréna adiáke, savé ĥaredyr janénas svénta dyibená pal péskire gréhi, i pale pal manušéngire gréhi. Xristóso kerdiá davá jékhvar, kiéli otdyjá Kokoró Pes syr svénto dyibén pal amaré gréhi.

²⁸Pir Mojzáskiro Zakóno čhuvéna anglatuné rašanca manušén, savé isyn grehítka; ne Devél čhudiá Péskire Čhavés pir sovláh, so sys paló (poslie) Zakóno, Les, Savó isyn bidošakiro pe saré viéki.