Read Biblija - Pe Baltitko Romani čib (Romanes) 2019 Baltic Romani Bible Judénge 8 Bible Online

Judénge 8 - Biblija - Pe Baltitko Romani čib (Romanes) 2019 Baltic Romani Bible bible

Judénge 8

¹Glavnymá isyn dro dová, pal so ame rakirasa, isyn dasaví: aménde isyn adasavó Anglatunó Rašái, Savó isyn beštó pe bolybén pir čačó vast Devléskire naj vyčedyréskire tronostyr;

²Jov isyn Rašáj pe Svénto Štéto, saví isyn čačuný šátra te mangénpe Devléske, saví sčhudia khetané Devél, a na manušá.

³Kažno rašáj isyn čhudo vaš dová, sob (kaj) te janel svénto dyibén i dáro, pal-dová so treindiá, sob (kaj) i kadalé Rašaste te javél vari-so te janel.

⁴Kóli Xristóso te jačelaspe te dživél pe phuv, Jov na javélas Rašása, pal-dová so isyn adáj kadasavé rašaja, savé iščo (inké) janéna svénta dyibená pir Mojzáskiro Zakóno;

⁵savé keréna Devléskiri butý pir patrín (óbrazo) i sýrby pir zer (tienjo), savé isyn čačunés dro Bolybnáskiro Rajo. Kiéli Mójza lyjá te končynel butý pe šátra, to Devél phendiá léske: “Dykh, ker saró, sob (kaj) te javél dasavo-pac', syr sys sykado túke pe bérga.”

⁶Ne kakaná Xristóso doresciá fededýr butý syr Anglatunó Rašái, saví isyn pe but fededýr kadalé-rašángire butiátyr, adiáke-pac', syr fedýr isyn i Zavieto, savó Jov piridyja Devléstyr manušénge, syr Maškiratuno, pal-dová so dro Zavieto isyn fedýr dyné davá.

⁷Kóli te javél pérvo zavieto bidošakiro, tedy na treindiá te rodén štéto vaš javír.

⁸Ne Devél bangiakirela Péskire manušén, kiéli Jov rakiréla pir prorokoste: “Ĥáda, javéna dyvesá”, — rakiréla Devél, — “kiéli Me keráva Nevó Zavieto Izrailjoskire i Judáskire manušénca;

⁹ne nane dasavo zavieto, savó Me kerdjom léngire dadénca dro dová časo, kiéli Me lyjom pal vast len, sob (kaj) te vylydžav Jegiptóskire phuvjátyr. Jone na jačnépe zoralé dro patiaibén i Me na prilyjom ilésa len.

¹⁰Adavá isyn Zavieto, savó Me keráva pe dalé dyvesá Izrailjoskire manušénca, — rakiréla Devél. ‘Me piridava Miré Zakóny dre léngiri godý i Me čhináva len pe léngire ile, i Me javáva léngiro Devél, a jone javéna Miré manušá.

¹¹I nikón na javéla butýr te sykliakirél javirés i pšal na javéla te sykliakirél pšalés i te rakirél léske: “Udžin Devlés”, pal-dová so saré manušá tyknendyr ke baré, javéna te džinén Man.

¹²Pal-dová so Me primangava lénge dová, so jone sys proti Zakóno, paldavá Me nijékhvar na priripirava butýr lénge.”

¹³Devél rakirélas dová pal Nevó Zavieto, pir davá Jov priĥalyja so pérvo zavieto isyn phuranó. A dová, so isyn phuranó i nane ke džiibén, sýges otparuvelape.