Read Biblija - Pe Baltitko Romani čib (Romanes) 2019 Baltic Romani Bible Jakov 1 Bible Online

Jakov 1 - Biblija - Pe Baltitko Romani čib (Romanes) 2019 Baltic Romani Bible bible

Jakov 1

¹Jakovo, savó isyn Devléskiro i Ráskire-Devléskiro, Isusóskire Xristosóskiro pishári (rabo), bičhavéla miro (ramánjo) Judéngire dešudujé rodénge, savé isyn rosčhurdyne pir svéto maškirál Najudénde.

²Pšalále miré, ginen pal bari rádyma, kiéli tumen propatiakirena pir javír (raznes),

³i džinén tumé, so propatiakiriben keréla tumaró patiaibén zoraledýr.

⁴Tumaro zoraló patiaibén te vyrikirel keréla bidošakiro réndo (diélo), sob (kaj) tumé te javén lačhé i bidošakire pir saró, sob (kaj) te na javél ni savó nauhtylyben tuménde.

⁵Kóli vari-konéste tuméndyr na uhtylel (nádosi) godý, to mek jov te mangél Devléstyr, Savó déla sarénge, kon kaméla, i Savó na vyrakirela, a déla léske:

⁶ne mek jov te mangél patiaibnása; mek jov te na kuninelape. Pal-dová so kon nane zoralés terdó dro péskiro patiaibén, odová isyn sýrby morjoskiri valna (velna), saví balvál ĥazdéla, i nevéstyr čhurdéla pale:

⁷mek te na duminel adasavó manúš, so jov doreséla vari-so Rástyr-Devléstyr;

⁸adasavó manúš isyn balvalitko i čhurdelape pe duj rigá, nane zoraló pir dúho (fáno) dre saré péskire dromá.

⁹A pšal, savó isyn pritasado, mek te šarelpe jov dolesa, so isyn léske dynó vučipnástyr,

¹⁰i barvaló manúš, mek jov te šarelpe, kiéli manušá ladžakirena les, pal-dová so javéla časo i léskiro barvalypén xasjola, syr feldýtka luludiá (cvety) pir čar.

¹¹Pal-dová so uštéla kham i šut'kirela čar péskire xačkiribnasa, i lákire luludiá (cvety) peréna, i saró šukariben xasjola, adiáke-pac' i xasjola barvaló manúš sarésa, so jov kerdiá.

¹²Bahtaló isyn odová manúš, savó zoralés vyrikiréla propatiakiriben, pal-dová so, kóli jov vyrikirdia propatiakiriben, jov doreséla džiibnáskiri viánka, pal saví Devél dyjá lav saré manušénge, konéske isyn drógo Jov.

¹³Kiéli propatiakirena tumen, mek nikón te na rakirél: “Adavá Devél propatiakirela man”, pal-dová so xolý na moginéla te propatiakirel Devlés, a Devél Kokoró na propatiakirela nikonés.

¹⁴Ne kažno manúš propatiakirela pes péskire masengire tyrdypnasa, savó na trej, i savó zatyrdela les dre felý;

¹⁵paló davá zlydžaiben, savó na trej, i savó lydžála ke grého, savó javéla kerdó i savó lydžála ke meribén.

¹⁶Dróga miré pšalále, dykhén, sob (kaj) nikón tumen te na del dukhá (te na xohavél):

¹⁷kažno lačhipén i kažno bidošakiro taláno bičhadé aménge vučipnástyr, dudengire (svetengire) Dadéstyr, Savó na parudjola, i na pirikerelape.

¹⁸Jov vykedyjá pir Péskiri vólia te del džiibén aménge čačuné lavésa, sob (kaj) aménge te javas Léskire pervonenca, savén Jov sozdyjá.

¹⁹Džinén, miré dróga pšalále: mek kažno manúš butýr te šunél liéntes/povolin'kes (nasyges) te rakirél, liéntes te xoliasol.

²⁰Pal-dová so manušeskiri xolý na keréla manušés čačunedyr, syr davá trej Devléske.

²¹Vaš davá otčhuven péstyr saré ladžave ke magiripén réndy i pies'cjonyma, savé iščo (inké) jačnépe andré tuménde i prilén lav kovlé ilésa, savó mekciá kornjo (rukh) dro tumaró iló i moginéla te zrakhél tumen.

²²Kerén saró pir Devléskiro patiaibén, i, kóli tumé féni šunéna, a na keréna adiáke, tedy tumé xohavena kokoré pes.

²³Pal-dová so, kóli vari-kon šunéla lav i na keréla saró, syr isyn phendló, odová isyn sýrby manúš, savó rozdykhela péskire-moskiri gožyma dro gindalo,

²⁴a adasavó manúš rozdykhela pes i džála krig i adái-pac' bistrela, savó jov sys.

²⁵Ne manúš, savó lačhés sykliakiréla Zakóno, savó isyn bidošakiro, i savó déla vólia; kadavá manúš keréla pir Zakóno, i na bistrela, so jov šundiá, i javéla bahtaló dro dová, so jov keréla.

²⁶Kóli vari-kon tuméndyr ginéla pes, so jov isyn zorjása patiaibnaskiro, a na phandela péskiri čib, jov xohavela kokoró pes, i kadasaveskire-manušeskiri strogima na trej ni konéske.

²⁷Žužé-patiaibnaskiri i namagirdy strogima angíl Devléste Dadéste isyn dro dová, sob (kaj) tumé te džán te dykhén pal pirotende (sirotende) i pivliende (udovende), kiéli jone pharés piridživena i te zrakhen pes bidošakirenca dalé svetóstyr.