Read Biblija - Pe Baltitko Romani čib (Romanes) 2019 Baltic Romani Bible Jakov 2 Bible Online

Jakov 2 - Biblija - Pe Baltitko Romani čib (Romanes) 2019 Baltic Romani Bible bible

Jakov 2

¹Pšalále miré! Kóli tuménde isyn patiaibén dre Isusóste Xristosóste slavutnone Raste-Devléste, sendinén šerá (rávnes) sarén:

²pal-dová so, kóli dre tumarí sinagoga zadžála manúš suvnakuné angrustiasa i uridó dro ziaindlo uribén, i adiáke-pac' zadžála čororó manúš dro kušno uribén,

³i tumé dykhéna patyvása pe manušéste, savó isyn uridó dro ziaindlo uribén i phenéna léske: “Túke javéla kuč te bešes adái, a čororeske phenéna “Tu terdjov odój”, ci “Beš adáj pašýl miré ĥerá”:

⁴tedy tumé sýrby kokoré sendinena manušén, dalésa-pac' tumé jačéna nalačhé sendar'jenca?

⁵Šunén, miré dróga pšalále: Ci na vykedyjá Devél odolé manušén, savé isyn čororé dro davá svéto te kerél barvalenca len dro patiaibén i kralipnaskire čhavénca, pal savó Jov dyjá lav saré manušénge, konéske drógo isyn Jov?

⁶A tumé ladžakirdé čorores. Ci na san tumé tel barvalengiri zor, i ci na jone tyrdena tumen tel séndo?

⁷Ci na košena jone lačhó lav, savésa kharéna tumen?

⁸Kóli tumé san patiaibnytka kralískire Zakonoske, savó isyn čhindló dro Svénto Čhinybén: “Rikir syr drógima dro iló manušés, savó isyn pašýl túte, syr kokoró pes, tedy tumé keréna mištés.”

⁹Ne kóli tumé sendinena manušén na šerá (rávnes), tedy tumé keréna grého i tumé san bangé angíl Zakóno.

¹⁰Pal-dová so, kóli vari-kon rakhéla saró Zakóno i obštavelape dro vari-so jekh, so isyn na pir Zakóno, odová manúš javéla bangó dro saró.

¹¹Pal-dová so Odová, Kon phendiá: “Na ker biladžaipén”, adiáke-pac' phendiá: “Na zamar.” Kóli tu na kerésa biladžaipén, a zamaresa, tedy tu adiáke-pac' san bangó angíl saró Zakóno.

¹²I rakirén i kerén adiáke sýrby manušá, savén moginéna te sendinén pir Zakóno, savó déla vólia;

¹³pal-dová so vaš odolé manušénge, kon na sykadiá tangipén (žalima) ke javír manušá, séndo javéla bi tangipnaskiro adiáke-pac' ke jov, ne tangipén isyn vučedýr sendostyr.

¹⁴Pšalále miré, savó isyn proko (l'góta) adalestyr, kóli manúš rakiréla, so jov patiála, ne ni savé lačhé réndy jov na keréla? Ci moginéla dasavo patiaibén te zrakhél les?

¹⁵Ake, kóli tumaró pšal ci phen isyn nange i bokhalé,

¹⁶a vari-kon tuméndyr phenéla lénge: “Džán ramanjosa (mirósa) i kokoré urjavenpe i čaravenpe” i tumé na déna lénge ničý vaš dová, so isyn trej vaš lénge, tedy savó proko javéla kadasavé patiaibnastyr?

¹⁷Adiáke-pac' isyn i patiaibén, kóli nane nisavó réndo léstyr, tedy dasavo patiaibén isyn muló kokoró pir péste.

¹⁸Ne vari-kon phenéla tuméndyr: “Túte isyn patiaibén, a mánde isyn réndy (diély).” Sykáv mánge tyró patiaibén bi rendengiro, a me sykaváva miro patiaibén miré rendéndyr.

¹⁹Tu patiása, so Devél isyn jekh. Tu kerésa mištés. I až nalačhé dúhi patiána i izdrana.

²⁰Ci kamésa tu te džinés, nagodo manúš, so patiaibén bi rendengiro isyn čhučó (pusto)?

²¹Ci na pir réndy Devél pridžindia čačunesa dadés amares Avraamos, kiéli jov jandiá syr svénto dyibén péskire čhavés Isaakos pe altárjo?

²²Ci dykhésa tu, so patiaibén isyn khetané léskire rendénca i pir réndy léskiro patiaibén jaciá bidošakiro.

²³I lav, savó isyn čhindló dro Svénto Čhinybén, kerdiápe pherdés (spolnindiape): “Avraámo patiandyja Devléske, pal davá Devél pridžindia les čačunesa”, i jov sys khardo Devléskiro Mal.

²⁴Ci dykhésa tu, so Devél pridžinela čačunesa manušés pir réndy, ne na pir jekh patiaibén?

²⁵Adiáke-pac' i Raháv, saví sys biladžakuny džuvlý, ci na pal lákire réndy Devél pridžindia čačuniasa la, kiéli joj prilyjá Izrailjoskire poddykhibnaskiren i bičhadiá len javire dromésa.

²⁶Pal-dová so, syr džidé masá bi duhoskiro isyn mulé, adiáke-pac' i patiaibén isyn muló bi rendoskiro.