Read Biblija - Pe Baltitko Romani čib (Romanes) 2019 Baltic Romani Bible Jakov 3 Bible Online

Jakov 3 - Biblija - Pe Baltitko Romani čib (Romanes) 2019 Baltic Romani Bible bible

Jakov 3

¹Pšalále miré! Mek tumé te na saré ginen pes sykliakiribnaskirenca, pal-dová so tedy amen javéna te sendinén baré strogimasa.

²Pal-dová so ame saré častes obštavasape pir grého. Kóli vari-kon na keréla grého lavésa, odová manúš isyn bidošakiro, savó moginéla te phandel sýrby cuglienca saré péskire masá.

³Ĥáda, ame čhuvasa cugli (udily) dre muiá grenge, sob (kaj) jone te kandén amen, i tedy ame rikirasa zor pe saré léngire masá.

⁴Adiáke-pac' i pármy (korabli), savé jone te na javén baré i saví zoralý balvál len te na tradel, len lydžála nabaré ruljosa (sterosa) parmakiro steritko (rulitko), karik jov zakaméla.

⁵Adiáke-pac' i čib isyn, xaj, nabari paš amaré masengiri, ne but šarelape. Dykh, saví isyn nabari jag, ne syr baró veš joj xačkiréla.

⁶Čib-davá isyn sýrby doiá-pac' jag, savjátyr moginéla te javél but fuipén; čib isyn maškirál amaré masengire pašá, so kaliakirela saró i moginéla te shačkirel saró amaró džiibén jagása, saví džála liunostyr (adostyr).

⁷Pal-dová so sarén murdalén i čiriklien, sarén džidalen, savé isyn pe phuv i dro paní, manúš léla zor pe lénde, sob (kaj) jone te kandén les.

⁸Ne čib nikón manušéndyr na moginéla te phandel; davá isyn čoripén, savó naštý te urikires, joj isyn pherdý meribnytkone trutasa (jadosa).

⁹Čibasa (čibjasa) barjakirasa ame Devlés-Dadés, i košasa manušén, savén Devél sozdyjá pir Péskiro dykhibén.

¹⁰I kadalé-pac' uštendyr džála lavengiri bari patýv i košybén. Pšalále miré, na trej, sob (kaj) adiáke te javél.

¹¹Ci moginéla te thadel jekhe ĥanyngatyr gudló i kirko paní.

¹²Pšalále miré, na moginéla inžyritko kašt te bijanél masliny, ci vinagradoskiri rand' inžyro? Adiáke-pac' i jekhe ĥanyngatyr na moginéla te thadel londo i gudló paní.

¹³Kon isyn tuméndyr te javél god'varó i te džinél saró; mek jov te sykavél davá pe réndo péskire lačhé džiibnasa i kovlé-ilytkone godypnasa;

¹⁴ne kóli dro tumaró iló tuménde isyn kirko zevlynypén i tumé keréna pir xolý, tedy na šarenpe vučés i na xohaven pe čačipén.

¹⁵Davá nane godypén, savó džála bolybnástyr, jov isyn phuvjákiro, biduhoskiro i džála nalačhestyr.

¹⁶A kaj isyn zevlenypen i xolý, odój javéla syr búnto maškír manušénde i saró čoripén.

¹⁷Ne godypén, savó džála bolybnástyr, angledýr saréstyr jov isyn žužó grehostyr, ramanjono, štyl (tiho), vyrikiréla but, na phandela manušés, isyn pherdó tangipnasa i lačhé rendénca, sendinela šerá (rávnes) manušén, nane dujemitko.

¹⁸A čačipén déla aplodo odolé manušénge, savé kokoré keréna ramánjo (miro) i pričhuvena zor vaš davá.