Read Biblija - Pe Baltitko Romani čib (Romanes) 2019 Baltic Romani Bible Jakov 4 Bible Online

Jakov 4 - Biblija - Pe Baltitko Romani čib (Romanes) 2019 Baltic Romani Bible bible

Jakov 4

¹Katýr javéla maribén pal lavá i čingardá maškír tuménde? Ci davá na tumaré masengire tyrdypnastyr, savó marelape andré tuménde?

²Tumé kaména vari-so, ne tumé na doreséna davá, i tumé zamarena (muliakirena) jekh jekhés pir dová, so tumé déna jakhalo i tumé na moginéna te doresen ni savó lačhipén, tumé čingardenape i marenape pal lavá i ničý tuménde nane, pal-dová so tumé na mangena Devlés.

³Mangena i na doreséna, pal-dová so tumé mangena na pe lačhé réndy, ne vaš dová, sob (kaj) te rozmeken vaš péskire masá.

⁴Napatiaibnytka muršá i džuvliá! Ci na džinéna tumé, so malypen (družba) grehitkoné manušénca svetóstyr isyn proti Devléste? I adiáke, kon vykedéla péske malés (drugós) adalé svetóstyr, odová javéla proti Devléste.

⁵So tumé duminéna, xaj, Svénto Čhinybén rakiréla ivjá lavá: “Dúho (Fáno), Savó dživéla dre aménde, keréla péske, sob (kaj) ame féni te javas Léskire?”

⁶Ne Devél déla baredýr bahtiakiribén. Pal-dová so i isyn phendló: “Devléske isyn na dróga phut'kirdé, a Jov bahtiakiréla naphut'kirde manušén.”

⁷I paldavá otdén pes Devléske, javén proti nalačheste i Jov našela krig tuméndyr.

⁸Javén pašyledýr ke Devél, i Jov javéla pašyledýr ke tumé. Vyžužakiren grehítka, tumaré vastá. Vyžužakiren tumaró džiibén, tumé san dujemitka.

⁹Piridživen ke xasibén, tuginen zoralés i rovén, mek tumaró saben te risjol ke tumé dre jasva, tumarí rádyma dre tuča.

¹⁰Čhuvén pes teledýr angíl Devléste, i Jov ĥazdéla vučés tumen.

¹¹Pšalále, na rakirén čoripén jekh pe jekhéste. Manúš, savó rakiréla čoripén pe péskire pšaléste, ci sendinela péskire pšalés, odová manúš rakiréla čoripén pe Zakóno i sendinela Zakóno. Ne kóli tu sendinesa Zakóno, tedy tu na kerésa pir Zakóno, a tu san sendári.

¹²Isyn Jekh, Kon dyjá Zakóno i isyn Sendári, Savó moginéla te zrakhél i te xasiakirél: ne kon ža tu san adasavó, sob (kaj) te sendines pharés javire manušés?

¹³Kakaná šunén tumé, savé rakiréna: “Adadyvés ci atasiá tradasa ke dasavo fóro, i javása te dživás odój jekh berš, i javása te kofarinas i javéla aménde saró;

¹⁴a tumé ž na džinéna, so javéla atasiá, i so davá isyn tumaró džiibén? Jov isyn sýrby thuv, savó javéla pe nabaró časo, ne korigedýr (pozže) xasjola;

¹⁵zamiést dová, sob (kaj) te phenén tuménge: “Kóli te javél pe davá Devléskiri vólia, i, kóli ame javása džidé, tedy kerása davá i javír.”

¹⁶A tumé šarenape péskire phut'kiribnastyr: saró dasavo šaribén isyn fuipén.

¹⁷I paldavá, kon džinéla te kerél lačhipén i na keréla, odolé manušéske javéla grého.