Read Biblija - Pe Baltitko Romani čib (Romanes) 2019 Baltic Romani Bible Jakov 5 Bible Online

Jakov 5 - Biblija - Pe Baltitko Romani čib (Romanes) 2019 Baltic Romani Bible bible

Jakov 5

¹Kakaná šunén tumé, barvalé manušále, rovén i godlen zoralés angíl xasibén, savó javéla pe tuménde.

²Barvalypén tumaró kirnyja, i uribén xaja mel' (mol')

³Pe tumaró suvnakáj i rup irža lyjá upralypén, daja irža javéla syr dophenybén pe tuménde, i shala tumaré masá syr jag. Tumé skedyné péske kučipén pe palatuné dyvesá.

⁴Ĥáda, isyn mazúri (nagrada), saví tumé na dopleskirde butiarnenge, savé ukedenas maró tumaré feldatyr, dalé lové déna ĥodla jasvénca i léngiri gódla dogijá ke bolybnáskire-jangoléngiro Raj Devél.

⁵Tumé dživdé dro barvalypén pe phuv vaš péskire-maséngiro kamiben; tumé čaliakirde tumaró per pe xasiakiriben;

⁶tumé sendindle i muliakirde manušén, savoe sys čačunoe; jone na sys proti tuménde.

⁷Pšalále, vyrikiren ĥará (dlúges), paka javéla Raj Devél. Ĥáda, ĥavitko manúš užakiréla aplodo phuvjátyr i vaš leske jov užakiréla ĥará (dlúges), paka javéla tasiarluno (rannjo) i koriguno (pozdnjo) bryšýnd.

⁸Tumé adiáke-pac' vyrikiren ĥará (dlúges): javén zoraledýr péskire ilenca dro patiaibén, pal-dová so Devél javéla syg pašyledýr.

⁹Pšalále, na den ĥondiá (na uzdyhinen) xoliása jekh pe jekhéste, sob (kaj) tumé te na javén sendindle. Ĥáda, isyn terdó Sendári pašýl vudár.

¹⁰Pšalále miré, sykljon prorokendyr, syr jone stradyndle i syr ĥará jone užakirde, savé rakirdé Devléskire lavéstyr.

¹¹Ĥáda, ame ginasa bahtalenca odolé manušén, savé sys zoralés terdé dre mén'ki. Tumé šundlé pal Iovaskiri tvárdyma dre mén'ki i dykhné, so jov doresciá dro kónco (dro jagóro) Devléstyr, pal-dová so Devél drieván tanginela i žalinela manušén.

¹²Angíl saréstyr, miré pšalále, na sovlahan ni bolybnasa, ni phuvjása, i nisave javire sovlahasa; ne mek te javél tumaró lav “ny, ai”, syr “ny, ai”, a tumaró lav “nad” syr “nad”, i tumé na javéna tel séndo.

¹³Ci vari-kon tuméndyr menčynelape? Mek jov te mangélpe Devléske. Ci isyn vari-kon rado tuméndyr? Mek jov te bagal psalmy.

¹⁴Ci isyn vari-kon nasvaló tuméndyr? Mek jov te kharel ke pe godephuren Khangirjátyr, i mek jone te mangénpe Devléske pe léste, i mek jone te makhen les olivitkone dzetesa vaš Devléskiro lav;

¹⁵i mangipén Devléske patiaibnása vysastiakirela nasvales i Devél keréla zoralesa les; a kóli jov kerdiá gréhi, tedy saró javéla otmekno léske.

¹⁶Pridžinen péskire gréhi jekh angíl jekhéste, sob (kaj) tumé te vysastjon: čačuné manušéskiro mangipén keréla bari butý.

¹⁷Proróko Ilíia sys adasavó-pac' manúš, syr i ame sam, ne jov saré iléstyr mangdiápe Devléske, sob (kaj) te na javél bryšýnd; i na sys bryšýnd pe phuv trin berš i šov čhoná,

¹⁸i nevéstyr mangdiápe Devléske jov, i bolybén dyjá bryšýnd, i phuv nevéstyr lyjá te del aplodo.

¹⁹Pšalále miré, kóli vari-kon tuméndyr zmarelape čačuné droméstyr, ne javír manúš riskiréla les pale ke Devél,

²⁰mek te džinél odová manúš, so kodová manúš, kon riskirelas pale ke Devél grehitkoné manušés, jov zrakhéla les meribnástyr, i but léskire gréhi javéna garadé.