Read Biblija - Pe Baltitko Romani čib (Romanes) 2019 Baltic Romani Bible 1 Petr 4 Bible Online

1 Petr 4 - Biblija - Pe Baltitko Romani čib (Romanes) 2019 Baltic Romani Bible bible

1 Petr 4

¹I paldavá, syr Xristóso pirilydžalas pharipén dre loč, adiáke-pac' i tuménge prijavelape te lydžán pharipén; pal-dová so kon zlydžala pharipén ločasa, odová manúš mekéla te kerél gréhi,

²sob (kaj) palatunó (posliednjo) časo, savó jaciápe léske te dživél dre masá, te dživél adavá manúš na pir péskire-ločakiro tyrdypén, a pir Devléskiri vólia.

³Pal-dová so uhtýlla (dósi) dová, so tumé angledýr kerénas, syr Náiudy, savé kaména te kerén: kiéli tumé rikirde pes dre nágoža réndy (diély), dro nálačho kamiben dre masá, dro pibén magiribnasa, dro dylynó xabén i pibén bi mierakiro, dro biladžakuno mangipén idolénge.

⁴Paldavá ž adalé Náiudy divinena, so tumé butýr na prastána khetané lénca pe nágoža réndy, i kaliakirena tumen,

⁵ne lénge trej javéla te den otphenybén angíl Odoléste, Kon javéla syg te sendiakirél džiden i mulen.

⁶Vaš davá i mulenge sys phendló pal bahtalý zan (zvies'), sob (kaj) jone, savé sys sendindle, kiéli jone dživdé dro manušýtko loč, sob (kaj) jone te dživén dro dúho (fáno), syr Devléske isyn lačhó.

⁷Ne syg sareske javéla kónco (jagóro): paldavá rakhénpe i dživén god'vares, kiéli tumé mangénape Devléske;

⁸a butýr saréstyr sykavén patýv jekh jekhéske saré iléstyr, pal-dová so patýv začhakirela but gréhi;

⁹prilén manušén saré iléstyr, savé javéna ke tumé bi xoliamé rakiribnaskiro;

¹⁰dynarinén jekh jekhéske dolé talanosa, savó tumé doresné Devléstyr sýrby lačhé kherítka barydyrá te piridén manušénge rázna Devléskire bahtiakiribena.

¹¹Kóli vari-savó manúš rakiréla, mek jov te rakirél Devléskire lavénca; odová kon dynarinela, mek jov te dynarinél pir zor, saví Devél déla léske, sob (kaj) te barjakirelpe Devél dro saró pir Isusóste Xristosóste, Savéske te javél sláva i zor pe saré viéki. Amín'.

¹²Miré dróga! Na dur'jen jagitkoné propatiakiribnastyr te propatiakirel tumaró patiaibén, dro davá nane nisavó dívo;

¹³a syr tumé pirilydžana pharipén, syr i Xristóso, radynénpe, pal-dová so tumé but butýr obradynenape, kiéli otčhakirelape Léskiri sláva.

¹⁴Kóli obrakirena tumen pal Xristosóskiro lav, tedy tumé san bahtalé, pal-dová so Devléskire-slavakiro Dúho (Fáno) zgija pe tuménde: (odolé manušá kaliakirena Les, a tumé slavinena).

¹⁵Sob (kaj) nijékh tuméndyr te na zlydžal pharipén syr zamaribnari (umaribnari), ci čor, ci manúš, savó keréla fuipén; ci syr manúš, savó isyn ĥálko ke čúžo mištypén;

¹⁶a kóli tumé pirilydžana pharipén syr Xristiani, tedy na ladžan, a slavinén Devlés, pal-dová so tumen kharéna adiáke.

¹⁷Pal-dová so podgíia časo, so javéna te sendinén manušén dro Devléskiro Kher, i kóli ame javása pérva manušá pe séndo, tedy, so javéla odolé manušénge, savé na kandéna Devléskiri bahtalý zan (zvies')?

¹⁸I kóli čačuné manušéske drieván pharó javéla te zrakhelpe, tedy, so javéla nadevlytkonenca, i grehitkoné manušésa?

¹⁹I paldavá manušá, savé pirilydžana pharipén pir Devléskiri vólia, mek jone te otdén péskiro di Léske, Kon isyn čačunó, i Kon sozdyjá len, i mek jone duredýr te kerén lačhipén.