Read Biblija - Pe Baltitko Romani čib (Romanes) 2019 Baltic Romani Bible 1 Petr 5 Bible Online

1 Petr 5 - Biblija - Pe Baltitko Romani čib (Romanes) 2019 Baltic Romani Bible bible

1 Petr 5

¹Me, kokoró som godephuró i pastyrjo (čhupnári), mangáva tumaré khangirjákire godephuren i pastyrien, pal-dová so me som jakhítko, syr Xristóso pirilydžija pharipén, adiáke-pac' mánde isyn paš dre sláva, saví javéla sykady:

²rakhén Devléskire manušén, savé isyn maškír tuménde, kerén davá na pir trébima, a syr trej Devléske i na pal dová, so tumé sorby san bokhalé ke lové, a pal-dová so tumé kaména davá iléstyr;

³i na xulainen pe odolé manušénde, savén Devél dopatiandyja tuménge, a sykavén pes lačhé rigátyr.

⁴I kiéli javéla Sámo Baredýr Pastyrjo (Čhupnári), Xristóso, tedy tumé doreséna slavakiri koróna, saví javéla te ziainel viéčnes.

⁵Adiáke-pac', terné manušále, kandén péskire godephuren, javén kovlé-ilýtka jekh ke jekh, na šarén pes jekh angíl javiréste, pal-dová so Devél isyn proti odolénde, kon ginéla pes vučedýr javirendyr, a odolénge, kon na šarela pes, Jov déla vast.

⁶Kandén i bandjon tel zoraló Devléskiro vast, sob (kaj) Jov te ĥazdel vučés tumen dro Péskiro časo;

⁷čhuvén upré saré péskire pharé dúmy pe Léste, pal-dová so Jov dykhéla pal tuménde.

⁸Javén triezva (nýrna), rakhénpe. Tumaro vérgo, nálačho, psiréla syr ščer (liévo), savó rykinela i rodéla, konés te xal.

⁹Terdjon proti léste zoralé patiaibnása, džinén, so adiáke-pac' piristradyndle tumaré pšála, savé dživéna pir svéto.

¹⁰Ne Devél, Savó bahtiakiréla, i Savó khardiá tumen dre viečna Péskiri sláva, kóli tuménge i prijavelape nabaró časo te stradynel, Jov Kokoró keréla tumen zoraledýr i déla zor, sob (kaj) tumé te na kuninenpe dro péskiro patiaibén;

¹¹mek te javél Léske sláva i zor pe saré viéki. Amín'.

¹²Me čhindjom davá nabaró lyl tuménge pir Siluanoste, savó isyn čačunó tumaró pšal, syr me duminava, sob (kaj) te podrikirav tumen, ripiri te dophenav, so davá isyn čačunó Devléskiro bahtiakiribén, dro savó tumé zoralés san terdé.

¹³Piridela “paklono” tuménge khangirí, so isyn dro Vavilóno, Saví vykedyjá Devél, adiáke-pac', syr tumen. Adiáke-pac' piridela “paklono” miro čhavó Marko.

¹⁴Piridén “paklono” i čamuden jekh jekhés Xristosóskire laskasa. Mek te javél ramánjo (miro) tuménge sarénge, savé isyn Xristosóskire. Amín'.