Read Biblija - Pe Baltitko Romani čib (Romanes) 2019 Baltic Romani Bible 2 Petr 1 Bible Online

2 Petr 1 - Biblija - Pe Baltitko Romani čib (Romanes) 2019 Baltic Romani Bible bible

2 Petr 1

¹Simonostyr Petristyr, Isusóskire Xristosóskire pisharistyr i Apostolostyr, saré manušénge, kon prilyjá dasavo-pac' drógo patiaibén khetané aménca pir čačipén amaré Devléskiro i Zrakhibnariskiro, Isusóskire Xristosóskiro,

²mek baht i ramánjo (miro) te javél dynó but butýr tuménge, syr tumé udžindlé Devlés i Isusós, amaré Ras-Devlés,

³Devél, Léskire Devléskire zorjása dyjá saró aménge, so trej vaš devlýtko džiibén, sob (kaj) te udžinas Devlés, Savó khardiá amen ke Pe slavása i lačhipnása,

⁴savénca Jov dyjá naj baredýr i drogedyr lav, sob (kaj) pir davá tumé te jačen pašasa (pašésa) Devlytkoné duhóstyr i te džán krig Duhóskire xasibnastyr, savó džála nalačhé mysliatyr dro svéto sob (kaj) pir davá tumé te dživén syr trej Devléske.

⁵Ne paldavá tumé adiáke-pac' pričhuvén zor, sob (kaj) te sykavén tumaré patiaibnastyr lačhipén, a lačhipnastyr džinybén,

⁶džinybnastyr sykljon te obrikiren pes, obrikiribnastyr javén vyrikirde (trivala), kiéli ame vyrikirasa, tedy jačasape devlytkonenca,

⁷devlytkimatyr sykavén pšalýtko patýv jekh jekhéske:

⁸i kóli saró davá isyn dre tuménde i barjola butedýr, tedy tumé na jačénpe čhučé vasténca i bi rendoskiro, kóli tumé javéna te pričhuvén zor te udžinén amaré Ras — Devlés, Isusós Xristosós;

⁹a kóli dre konéste saró davá nane, odová manúš isyn kororó i jov začhakirdia péskire jakhá, bistyrdia pal dová, so Devél otmekciá léskire ĥaratuné gréhi.

¹⁰Paldavá, pšalále, pričhuvén zor usá butýr te kerén zoraledýr tumaró Devléskiro khariben i vykedyiben; kóli tumé adiáke javéna te kerén, tedy tumé nijékhvar na obštavenape;

¹¹i paldavá tuménge délape pherdó pravo te zadžán dro viéčno kralipén amaré Devléskire i Zrakhibnariskire, Isusóskiro Xristosóskiro.

¹²Vaš davá me nijékhvar na pirijačava te ripirav iščo (inké) tuménge pal davá, na dykhí pe dová, so davá tumé mištés džinén, i tumé zoralés rikirenape pal čačipén akaná.

¹³Ne me čhináva pal čačipén, paka me som džidó sýrby dre šátra te džangavav tumen dalé ripiribnasa,

¹⁴pal-dová so me džinóm (džináv), so me syg/sýges jačkirava daja šátra, kiéli me meráva syr amaró Raj Devél, Isúso Xristóso sykadiá mánge;

¹⁵ne me javáva te pričhuvav zor, sob (kaj) tumé i korigedýr (pozže), kiéli me džáva tuméndyr, te rikirén davá pe godý saró časo.

¹⁶Ame rosphenasas tuménge džinybén pal zor, i so syg javéla amaró Raj Devél, Isúso Xristóso na paramysienca, so manušá sčhude godes, ne ame kokoré sam jakhítka pal Léskiro baró rajkanypen.

¹⁷Pal-dová so Jov prilyjá Devléstyr Dadéstyr patýv i sláva, kiéli dogijá ke Jov rajkane slavatyr zan: “Davá isyn Miro Čhavó, Savó Mánge jaciá Drógo, dre Savéste isyn Mirí rádyma”,

¹⁸i kadaja zan, saví ame kokoré šundiám Bolybnáskire Rajostyr, kiéli ame sámas khetané Lésa pe svénto bérga.

¹⁹I apríč dová, saró aménde isyn naj čačunedyr prorokengiro lav, i tumé mištés keréna, so tumé rakhibnýtkes šunéna davá lav, savó isyn sýrby davá dud (svéto), so xačola dro ciamlo štéto, paka na javéla palatunó zlóko (ránko) i ĥazdélape zlokoskiri čergen dre tumaré ile,

²⁰i angledýr saréstyr džinén dová, so nisavó angilphenybén dro Svénto Čhinybén na sys čhindló pir prorokengiro džinybén,

²¹pal-dová so manušá nijékhvar vagedyr (ĥaredyr) na angilphenenas pir péskiri vólia, a davá rakirdé svénta Devléskire manušá, kiéli Svénto Dúho (Fáno) lydžijá len.