Read Biblija - Pe Baltitko Romani čib (Romanes) 2019 Baltic Romani Bible 1 Ian 1 Bible Online

1 Ian 1 - Biblija - Pe Baltitko Romani čib (Romanes) 2019 Baltic Romani Bible bible

1 Ian 1

¹Pal dová, so sys anglypnástyr, pal dová, so ame šundiám, so dykhciam péskire jakhénca, so ame rozdykhasas, i so čilavenas amaré vastá, dová i ame phenasas pal Džiibnáskiro lav, —

²davá džiibén sys sykado, i ame dykhciam davá i ame sam jakhítka i ame phenása tuménge pal davá viéčno džiibén, savó sys Dadésa, i savó sys sykado aménge,

³ake, dová-pac', so ame dykhciam i šundiám, i phenása tuménge, sob (kaj) tuménde te javén khetanypen aménca, a amaró khetanypen isyn Dadésa, i Léskire čhavésa, Isusósa Xristosósa.

⁴I davá ame čhinasa tuménge, sob (kaj) tumarí rádyma te javél pherdý.

⁵I, ĥáda, pal so isyn mavlýn (malva), saví ame šundiám Čhavestyr i phenása tuménge: Devél isyn dud (svéto) i nane nisavó kalypén dre Léste.

⁶Kóli ame rakirasa, so aménde isyn khetanypen Lésa, a kokoré psirasa dro kalypén, tedy ame xohavasa i na psirasa pir čačipén.

⁷A kóli ame psirasa dro Devléskiro dud, adiáke-pac' syr Xristóso isyn dud, tedy aménde isyn khetanypen jekh jekhésa, i Isusóskiro Xristosóskiro rat, Léskire čhavéskiro, žužakirela (čystinela) amen kažnoné grehéndyr.

⁸Kóli ame rakirasa, so aménde nane grého, tedy ame xohavasa kokoré pes, i nane aménde čačipén.

⁹Kóli ame priĥaljovasa amaré gréhi angíl Devléste, tedy Jov vyžužakiréla amaró načačipén, pal-dová so Jov isyn patiaibnýtko, i čačunó.

¹⁰Kóli ame rakirasa, so ame na kerdiám gréhi, tedy ame kerása Léstyr Xohaibnaris, i nane Léskiro lav aménde.