Read Biblija - Pe Baltitko Romani čib (Romanes) 2019 Baltic Romani Bible 1 Ian 3 Bible Online

1 Ian 3 - Biblija - Pe Baltitko Romani čib (Romanes) 2019 Baltic Romani Bible bible

1 Ian 3

¹Dykhén! Saví bari rádyma dyjá aménge Dad, sob (kaj) te kharén amen Devléskire čhavorenca. Paldavá svéto na džinéla tumen, pal-dová so na priĥalyja Les.

²Dróga miré! Ame sam kakaná Devléskire čhavé, ne iščo (inké) na sykadyjá aménge, savé ame javása angíl. Ame jekh džinása, so kiéli Xristóso sykadjola, ame jačasape kadasavé-pac', syr Jov isyn, pal-dová so ame javása te dykhas, savó Jov javéla.

³I kažno manúš, konéste isyn nadiéia pe Léste, vyžužakiréla (vyčystinela) pes, pal-dová so Xristóso isyn žužó.

⁴Kažno (sváko) manúš, kon keréla gréhi, keréla proti Devléskiro Zakóno; i grého isyn dová, kiéli phagirena Zakóno.

⁵I tumé džinéna, so Jov javdiá vaš dová, sob (kaj) te lel amaré gréhi, i so nane grého dre Léste.

⁶Kažno manúš, kon dživéla dro jekhipén Isusósa, na keréla gréhi, a kažno, kon keréla gréhi, kodová manúš na dykhciá Les i na priĥalyja Les.

⁷Bijatorale! Mek nikón te na lydžál tumen dro bléndo. Kon keréla pir čačipén, odová isyn kadasavó čačunó, syr Jov isyn čačunó.

⁸Kodová, kon keréla gréhi, isyn nalačhestyr, pal-dová so nálačho kerdiá gréhi anglypnástyr. Vaš davá i javdiá Devléskiro Čhavó, sob (kaj) te pharavel nalačheskire butiá.

⁹Kažno manúš, savó jaciá Devléskire čhavésa, na keréla butýr gréhi, pal-dová so Devléskiri ziárka isyn dre Léste, i jov na moginéla te kerél gréhi, pal-dová so Devél jaciá léskire Dadésa.

¹⁰Ĥáda, syr Devléskire čhavé i nalačheskire čhavé isyn biciale: kažno (sváko), kon keréla na pir čačipén, odová nane Devléstyr i adiáke-pac', syr kodová, kon na keréla patýv péskire pšaléske.

¹¹Paldavá dasaví isyn mavlýn (malva), saví ame šundiám anglypnástyr, sob (kaj) ame te das patýv jekh jekhéske,

¹²ne na adiáke, syr Kaino, savó sys nalačhestyr i savó zamardiá (muliakirdiá) péskire pšalés. Pal so ž jov zamardiá les? Pal-dová so léskire réndy sys fuj, a léskire-pšaléskire réndy sys čačuné.

¹³Na divinen, pšála miré, kóli manušá svetóstyr javéna te bidykhen (te nienavidinen) tumen.

¹⁴Ame džinása, so ame pirigijam meribnástyr dro džiibén, pal-dová so ame dasa patýv pšalénge. Kon na déla patýv pšaléske, kodová isyn iščo (inké) tel meribnaskiri zor.

¹⁵Kažno (sváko) manúš, kon na déla patýv péskire pšaléske, isyn zamaribnari (umaribnari), a tumé džinéna, so ni jekhe zamaribnariske na javéla viéčno džiibén.

¹⁶Ame udžinasa pšalýtko patýv dro davá, so Xristóso otdyjá Péskiro džiibén pal aménde; i ame sam bangé te otdas péskiro džiibén pal pšalénde.

¹⁷A kóli vari-konéste isyn saró, so trej vaš džiibén dro davá svéto, a jov dykhéla, so léskire pšaléske trej vari-so vaš džiibén i jov začhakirela péskiro iló léstyr, tedy saví ža isyn Devléskiri láska dre Léste?

¹⁸Bijatale, javása te das patýv na lavésa ci čibása, a rendosa (dielosa) i čačipnása.

¹⁹I pir davá, syr ame kerása, ame udžinasa, so ame sam čačipnaskire i štyliakirasa amaré ile angíl Léste;

²⁰pal-dová so, kóli amaró iló rakiréla mamúj proti aménde, tedy Devél džinéla saró, pal-dová so Jov isyn butedýr iléstyr, i Jov džinéla saró.

²¹Dróga miré! Kóli amaró iló na rakiréla mamúj proti aménde, tedy aménde isyn muršypen te risjovas ke Devél.

²²I so ame te na pomangas Léstyr, javéla dynó aménge, pal-dová so ame rakhasa Léskire priphenybená i kerása dová, so isyn pir iló Devléske.

²³A priphenybén Léskiro isyn dasavo: sob (kaj) ame te patias dro lav Léskire-Čhavéskire, Isusóskire Xristosóskiro, i sob (kaj) te das patýv jekh jekhéske, syr Jov priphendiá aménge.

²⁴I kon rakhéla Léskire priphenybená, odová dživéla dro jekhipén Lésa, i Devél isyn dro jekhipén Lésa. I dová, so Devél dživéla dro jekhipén Lésa, ame udžinasa pir Dúho (Fáno), Savó Jov dyjá aménge.