Read Biblija - Pe Baltitko Romani čib (Romanes) 2019 Baltic Romani Bible 1 Ian 5 Bible Online

1 Ian 5 - Biblija - Pe Baltitko Romani čib (Romanes) 2019 Baltic Romani Bible bible

1 Ian 5

¹Kažno (sváko) manúš, kon patiála, so Isúso isyn Xristóso (Miesija), isyn Devléskiro čhavó, i kažno manúš, konéske isyn drógo Dad, léske adiáke-pac' isyn drógo Léskiro Čhavó.

²Pir davá ame udžinasa, so aménge isyn dróga Devléskire čhavé: kóli ame rikirasa syr Drógima dro iló Devlés i kerása pir Léskire priphenybená.

³I amarí patýv i iló ke Devél isyn kadasavé; sob (kaj) ame te rakhas Léskiro priphenybén. I Léskire priphenybená isyn naphare.

⁴Pal-dová so kažno manúš, kon isyn Devléskiro čhavó, pirizorjakirela svéto. I ame pirizorjakirasa davá svéto amaré patiaibnása.

⁵Kon isyn kodová, savó pirizorjakirela svéto: ĥáda (ake), isyn odová, kon patiála, so Isúso isyn Devléskiro Čhavó.

⁶Davá isyn Jov, Isúso Xristóso, Savó javdiá paniésa, kiéli Jov boldiape: i ratésa, kiéli Jov myjá. Jov javdiá na féni (tóka) paniésa, ne paniésa i ratésa. I Dúho (Fáno) Kokoró dophenéla pal davá, pal-dová so Dúho (Fáno) isyn čačipén.

⁷Paldavá isyn trin jakhítka pe bolybén:

⁸Dad, Lav i Svénto Dúho (Fáno), i adalé trin isyn syr jekh dophenybén.

⁹I kóli ame prilasa manušýtko dophenybén, tedy Devléskiro dophenybén isyn zoraledýr, pal-dová so Devél dophenéla pal Péskire Čhavéste.

¹⁰Kon patiála dre Devléskire Čhavéste, kodoleste isyn dophenybén dro péskiro iló. A kon na patiála Devléske, odová kerdiá Les Xohaibnarisa, pal-dová so jov na upatiandyja dro dophenybén, savésa Devél dophenéla pal Péskire Čhavéste.

¹¹Davá dophenybén isyn dro dová, so Devél dyjá aménge viéčno džiibén i daja džiibnáskiri ĥanyngori isyn dre Léskire Čhavéste.

¹²Konéste isyn Čhavó, kodoleste isyn davá džiibén; konéste nane Devléskire Čhavés, kodoleste nane džiibén.

¹³Dalé čačipená me čhindjom tuménge, kon patiála dro Devléskire-Čhavéskiro lav, sob (kaj) tumé te džinén, so tuménde isyn viéčno džiibén.

¹⁴I ĥáda, isyn muršypen, savó isyn aménde dre Devléste, so kóli ame mangasa vari-so pir Léskiri vólia, Jov šunéla amen.

¹⁵I kóli ame džinása, so Jov šunéla amen, pal so ame mangasa, ame džinása i dová, so Jov kandéla amaró mangipén, kiéli ame mangdiam Les.

¹⁶Kóli vari-kon bidykhela péskire pšalés, savó keréla grého na ke meribén, mek jov te mangélpe Devléske, i Jov déla odoléske džiibén. Davá isyn vaš odolénge, kon na keréla grého ke meribén. Ne isyn grého ke meribén: i me na rakiráva pal davá, sob (kaj) jov te mangélpe Devléske pal dasavo grého.

¹⁷Kažno xohaibén isyn grého, ne isyn grého, savó isyn na ke meribén.

¹⁸Ame džinása, so kažno manúš, kon isyn Devléskiro čhavó, na keréla gréhi, ne kon isyn Devléskiro čhavó, kodová rakhéla pes, i nálačho na čilavéla les.

¹⁹Ame džinása, so ame sam Devléskire, i so saró svéto isyn tel nalačheskiri zor.

²⁰Ame džinása, so Devléskiro Čhavó javdiá i dyjá aménge godý, sob (kaj) ame te udžinas, kon isyn čačunó Devél, i sob (kaj) aménge te javas dro jekhipén čačuné Devlésa, Léskire Čhavésa, Isusósa Xristosósa. Davá isyn čačunó Devél i viéčno džiibén.

²¹Čhavorale! Rakhén pes idolendyr. Amín'.