Read Biblija - Pe Baltitko Romani čib (Romanes) 2019 Baltic Romani Bible Sendar'jengiri Lylvarí 11 Bible Online

Sendar'jengiri Lylvarí 11 - Biblija - Pe Baltitko Romani čib (Romanes) 2019 Baltic Romani Bible bible

Sendar'jengiri Lylvarí 11

¹Iiefajo (Jefajo), Galaaditianino sys manúš murškanó. Jov sys biladžakuné-džuvliákiro čhavó; Galaadostyr bijándyja Jefajo.

²I Galaadoskiri romný bijandiá léske čhavén. Kiéli vybarine romniakire čhavé, vytradyné jone Jefajos, phení léske: “Tu na san mištypén-prilyibnaskiro (nasliedniko) dro amaré-dadéskiro kher, pal-dová so tu san javire-džuvliákiro čhavó.”

³I nastiá Jefajo péskire pšaléndyr, i dživdiá pe Tovoskiri phuv; i skedynépe ke Jefajo balvalitka manušá i vydžánas lésa te čoren.

⁴Pirdál vari-kicý časo Amonitiani giné maribnása pe Izrailjo.

⁵Dro časo maribnaskiro vaš Amonitianenge Izrailitianenca, javné Galaadóskire phurydyrá te len Jefajos phuvjátyr Tov,

⁶i phendlé Jefajoske: “Jav, jav aménde šeralesa, i pirimarasape Amonitianenca.”

⁷Jefajo phendiá Galaadóskire phurydyrenge: “Ci davá na tumé na kamlé man i vytradyné miré-dadéskire kheréstyr? Sóske javné ke me kakaná, kiéli tumé san dre bída?”

⁸Phurydyrá Galaadóskire phende Jefajoske: “Vaš dová ame akaná javdiám ke tu, sob (kaj) tu te džas aménca i te marespe Amonitianenca, i te javes aménde barydyrésa vaš saré Galaadóskire manušénge.”

⁹I phendiá Jefajo Galaadóskire phurydyrenge: “Kóli tumé riskirena man, sob (kaj) me te maravpe Amonitianenca, i Raj Devél otdéla mánge len, to tedy ci jačavape me tuménde barydyrésa?”

¹⁰Phurydyrá Galaadóskire phendlé Jefajoske: “Mek te javél Raj Devél jakhitkonesa maškír tuménde, so ame kerása pir tyró lav!”

¹¹I gijá Jefajo pir Galaadóskire phurydyrende, i čhudé les manušá pe péste barydyrésa i šeralesa, i Jefajo phendiá saré lavá péskire angíl Ráskire-Devléskiro muj dre Masífa.

¹²I bičhadiá Jefajo manušén ke Amonitianengiro králi te phenél: “So túke ke me, so tu javdián ke me te marespe pe mirí phuv?”

¹³Amonitianengiro králi phendiá Jefajoskire manušénge: “Izrailjo, kiéli gijá Jegiptóstyr, lyjá mirí phuv Arnonostyr ke Iavoko i Iordáno; i adiáke rískir la mánge ramanjosa (mirósa).”

¹⁴Jefajo dre javír mólo bičhadiá manušén ke Amonitianengiro králi,

¹⁵te phenén léske: “Adiáke rakiréla Jefajo: Izrailjo na lyjá Moavitianengiri phuv i Amonitianengiri phuv;

¹⁶pal-dová so kiéli ame gijam Jegiptóstyr, to Izrailjo gijá pe čhučí phuv ke Loló mórjo (derjáv) i gijá dre Kadieso;

¹⁷odothýr bičhadiá Izrailjo manušén ke Edomoskiro králi te phenél: “De vólia (dozvolin) mánge te prodžav tyrí phuv”; ne Edomoskiro králi na kandyjá; i ke Moavititianengiro králi jov bičhadiá, ne i odová na dyjá lav; paldavá Izrailjo jaciápe dro Kadieso.

¹⁸I gijá Izrailjo čhučé phuvjása, i progijá Edomoskiri phuv i Moavitianengiri phuv, i, javi pe Moavitianengiri phuv pe vastočno rig, terdijá stanósa pal Arnono; ne na zagijá dre Moavitianengiri rigá, pal-dová so Arnono isys Moavoskiri miéža.

¹⁹I bičhadiá Izrailjo manušén ke Sigono, Amoriejengiro králi, Jesievonoskiro králi, i phendiá léske Izrailjo: “De vólia (dozvolin) aménge te prodžas tyrí phuv pe péskiro štéto.”

²⁰Ne Sigono na dyjá vólia te promekel Izrailjo pir péskire rigá, i skedyjá Sigono sarén péskire manušén, i terdijá stanósa dre Iaco, i mardiápe Izrailjosa.

²¹I otdyjá Raj Devél, Devél Izrailjoskiro, Sigonos i sarén léskire manušén dre vastá Izrailjoske, i jov domardiá len; i doresciá (dolyja) Izrailjo dro meknó mištypén (nasliedijo) sarí Amoriejengiri phuv, savó dživdiá pe doiá phuv;

²²i doresné jone dro meknó mištypén (nasliedijo) saré Amoriejéngire rigá Arnonostyr ke Iavoko i čhučé phuvjátyr ke Iordáno.

²³I adiáke Raj Devél, Devél Izrailjoskiro vytradyjá Amoriejos Péskire Izrailjoskire manušéngire móstyr, a tu kamésa te les léskiro meknó mištypén (nasliedijo)?

²⁴Ci nane túte dová, so dyjá túke Xamoso, tyró devloro? I aménde isyn saró dová, so dyjá aménge dro meknó mištypén Raj Devél, amaró Devél.

²⁵Naúšto tu fedýr Valakostyr, Siepforoskire čhavestyr, Moavitianengire kralístyr? Ci kostiape jov Izrailjosa, ci mardiápe lénca?

²⁶Izrailjo dživéla trinšelá berš ke Jesievóno i dre fórja, savé zapasjona léstyr, dro Aroiero i dre fórja, savé zapasjona léstyr, i dre saré fórja, savé isyn pašýl Arnono; vaš so tumé dre dová časo na otlyne len?

²⁷A me na som bangó angíl túte, i tu kerésa mánge fuipén, vygii proti mánde maribnása. Raj Devél, Sendári, mek te javél kakaná sendarisa maškír Izrailjoskire čhavénde i maškír Amonitianende!”

²⁸Ne Amonitianengiro králi na šundiá Jefajoskire lavá, savénca jov bičhadiá ke jov.

²⁹I sys pe Jefajoste Devléskiro Dúho (Fáno), i progijá jov Galaádo i Manásija, i progijá jov Galaadoskiri Masífa, i Galaadóskire Masifatyr gijá ke Amonitiani.

³⁰I dyjá Jefajo sovél Ráske-Devléske i phendiá: “Kóli Tu otdesa Amonitianen dre miré vastá,

³¹to tedy pir miro risiben ramanjosa (mirósa) Amonitianendyr, so vydžála miré kheréskire vudarendyr pe strieč mánge, javéla Ráske-Devléske, i me janáva davá pe célo shačkiribén.”

³²I javdiá Jefajo ke Amonitiani — te marélpe lénca, i otdyjá len Raj Devél dre léskire vastá;

³³i domardiá jov len drieván baré maribnása, Aroierostyr ke Minifa biš fórja, i ke Aviel'-Kieramima, i Amonitiani poddynepe angíl Izrailjoskire čhavénde.

³⁴I javdiá Jefajo dre Masífa dro péskiro kher, i ĥáda, léskiri čhaj vydžála gil léske bubnosa i khelybnasa; joj sys léste jekh, i na sys léste butýr ni čhavés, ni čha.

³⁵Kiéli jov dykhciá la, roskustia péskiri ídia i phendiá: “Ah, mirí čhaj! Tu domardian man; i tu san dre čyslo odolenca, savé phagirdé ramánjo (miro) miré džiibnáskiro! Me otčhakirdjom pal túte miré uštá angíl Raste-Devléste, i me na mogináva te otphenavpe.”

³⁶Joj phendiá léske: “Miro dádo! Tu otčhakirdian tyré uštá angíl Raste-Devléste — i ker mánca dová, so phendlé tyré uštá, kiéli Raj Devél kerdiá pir túte zavodo (otomstinyben) tyré vergénge Amonitianenge.”

³⁷I phendiá joj péskire dadéske: “Ker mánge, jekh, ĥáda so: otmek man pe duj čhoná; me džáva, džáva upré pe bérgi, i me obrovava miro čhaitko miré malnienca.”

³⁸Jov phendiá: “Džá.” I otmekhcia la pe duj čhoná. Joj gijá péskire malnienca, i obrondia péskiro čhaitko dre bérgi.

³⁹Pir dujengire-čhonengiro progiiben, joj risijá ke péskiro dad, i jov kerdiá pe láte sovél péskiri, saví dyjá, i joj na udžindiá romes. I zagijá davá dro obyčajo (prisykliaiben) Izrailjo.

⁴⁰So kažno berš Izrailjoskire čhaja psirdé te obroven Jefajoskire-Galaaditianinoskirja čha štar dyvesá dro berš.