Read Biblija - Pe Baltitko Romani čib (Romanes) 2019 Baltic Romani Bible Sendar'jengiri Lylvarí 13 Bible Online

Sendar'jengiri Lylvarí 13 - Biblija - Pe Baltitko Romani čib (Romanes) 2019 Baltic Romani Bible bible

Sendar'jengiri Lylvarí 13

¹Izrailjoskire čhavé kerdé durydyr fuipén angíl Ráskire-Devléskire jakhá, i otdyjá len Raj Devél dre Filistimlianengire vastá pe štardešá berš.

²Dre dová časo (cýro) sys manúš Coratyr, Danóskire kheritkoné rodóstyr, lavésa Manojo, romný léskiri sys bičhavengiri i na bijanelas.

³I javdiá Ráskire-Devléskiro Jangólo romniake, i phendiá láke: “Ĥáda, tu san bičhavorengiri i na bijanesa; ne zapharjosa i bijanesa čhavores;

⁴i adiáke rakhpe, na pi mol (vino) i sikiera, i na xa ničý nažužo;

⁵pal-dová so, ake, tu zapharjosa i bijanesa čhavés, i britva (muradluny) na kasynelape léskiro šeró, pal-dová so kokoré dákire masestyr davá tyknó bijáto javéla Ráskire-Devléskiro nazoriejo, i jov léla te zrakhél Izrailjo Filistimlianengire vastéstyr.”

⁶Romný javdiá i rosphendiá péskire romeske: “Devléskiro manúš sys javi ke me, savó poddžála, sýrby Devléskiro Jangólo, drieván (zbit) rajkano, me na phucjompe léstyr, katýr jov sys, i jov na phendiá mánge léskiro lav;

⁷ne jov phendiá mánge: “Ake, tu zapharjosa i bijanesa čhavés; i adiáke na pi mol i sikiera, i na xa ničý nažužo, pal-dová so bijáto (tyknomas) dákire ločoviátyr (utrobatyr) ke péskiro meribén javéla Devléskiro nazoriejo.”

⁸Manojo mangdiápe Ráske-Devléske, i phendiá: “Rajo Dévla! Mek te javél nevés (znoko) ke ame Devléskiro manúš, savés bičhadian Tu, i vysykliakirela amen, so aménge te kerés bijatosa (tyknemasesa), savó bijandjola.”

⁹I šundiá Devél Manojoskiri zan (glos), i Devléskiro Jangólo nevés javdiá ke romný, kiéli joj sys pe félda, i Manojos, lákire romes, na sys lása.

¹⁰Romný sýges prastándyja, i phendiá péskire romeske, i phendiá léske: “Ĥáda, javdiá mánge manúš, savó sys javi tedy ke me.”

¹¹Manojo uštyjá i gijá péskire romniása, i javdiá ke odová manúš, i phendiá léske: “Tu san odová manúš, savó rakirdiá lása, džuvliása?” Jangólo phendiá: “Me.”

¹²I phendiá Manojo: “I adiáke, kóli kerélape čačipnása (zbuvinelape) lav tyró, syr aménge te kerás adalé bijatosa (tyknemasesa) i so lésa te kerás?”

¹³Devléskiro Jangólo phendiá Manojoske: “Mek jov te rakhelpe saréstyr, pal so me phendjom romniake;

¹⁴mek te na xal ničý, so déla vinagradoskiri loza; mek te na p'jel mol i sikiera i te na xal ničý nažužo, i te prirakhel saró, so me priphendjom láke.”

¹⁵I phendiá Manojo Devléskire Jangoloske: “De vólia (dozvolin) te urikiras tut, paka ame keravasa vaš túke buznores (kozljonkos).”

¹⁶Devléskiro Jangólo phendiá Manojoske: “Mek (usajékh) by tu i te urikires man, ne me na javáva te xav tyró maró; kóli kamésa te kerés célo shačkiribén Ráske-Devléske, tedy ĥázde les.” Manojo na džindiá, so davá sys Devléskiro Jangólo.

¹⁷I phendiá Manojo Devléskire Jangoloske: “Syr isyn tyró lav? Sob (kaj) aménge te slavinas tut, kiéli kerélape čačipnása tyró lav.”

¹⁸Devléskiro Jangólo phendiá léske: “So tu phučesa pal miro lav? Jov isyn divno.

¹⁹I lyjá Manojo buznores (kozljonkos) i marunó janybén, i ĥazdyjá Ráske-Devléske pe bar. I kerdiá Jov dívo, savó dykhné Manojo i léskiri romný.

²⁰Kiéli polymia lyjá te ĥazdelpe altarjostyr ke bolybén, to Ráskire-Devléskiro Jangólo ĥazdyjápe dre polymia žertvienikoskiri. Dykhí davá, Manojo i léskiri romný pyné mósa pe phuv.

²¹I na jaciá bicialó Ráskire-Devléskiro Jangólo Manajoske i léskire romniake. Tedy Manojo udžindiá, so davá sys Ráskire-Devléskiro Jangólo.

²²I phendiá Manojo péskire romniake: “Čačes, ame merasa, pal-dová so ame dykhciam Devlés.”

²³Romný léskiri phendiá léske: “Kóli by Raj Devél kamdiá te muliakirél amen, tedy na prilelas by amaré vasténdyr célo shačkiribén i marunó janybén, i na sykadiá by aménge saró dová, i kakaná na otčhakirelas aménge saró.”

²⁴I bijandiá romný čhavés i dyjá lav léske: Samsóno. I barija tyknomas, i bahtiakirdiá les Raj Devél.

²⁵I lyjá Ráskire-Devléskiro Dúho (Fáno) te kerél dre léste dre Danoskiro stáno, maškír Cora i Jestaolo.