Read Biblija - Pe Baltitko Romani čib (Romanes) 2019 Baltic Romani Bible Sendar'jengiri Lylvarí 14 Bible Online

Sendar'jengiri Lylvarí 14 - Biblija - Pe Baltitko Romani čib (Romanes) 2019 Baltic Romani Bible bible

Sendar'jengiri Lylvarí 14

¹I gijá Samsóno dre Fimnafa, i dykhciá dre Fimnafa džuvliá Filistimijákire čhajendyr.

²Jov gijá i phendiá péskire dadéske i péskire dáke, i phendiá: “Me dykhcjom dre Fimnafa Filistimijákire čhajendyr džuvliá: len mánge la dre romný (romniáte).”

³Léskiro dad i daj phendlé léske: “Naúšto nane džuvlién maškír tyré-pšalengire čhajende i dre saré miré manušénde, so tu džása te les džuvliá naobčhindlende Filistimliande?” I phendiá Samsóno péskire dadéske: “Le la mánge, pal-dová so joj isyn mánge pir iló.”

⁴Dad léskiro i daj léskiri na džindlé, so davá sys Rástyr-Devléstyr, i so jov rodéla vakancyja (slučajo) te otomstinel (te othal pale) Filistimlianenge. A dro dová časo Filistimliáni sys xulaja pe Izrailjo.

⁵I gijá Samsóno dadésa peskiresa i dasa peskirjasa dre Fimnafa, a kiéli podginé ke vinagradniki Fimnafakire, ĥáda, ternó liévo (ščer) ryčyny džála pe strieč léske.

⁶I zgija pe léste Ráskire-Devléskiro Dúho (Fáno), i jov roskustia lievos syr buznores; a dro vast léste ničý na sys. I jov na phendiá péskire dadéske i péskire dáke, so jov kerdiá.

⁷I javdiá, i rakirdiá džuvliása, i joj iaciá pir iló Samsonoske.

⁸Syr proginé vari-kicý dyvesá, nevés gijá jov, sob (kaj) te les la, i zagijá te podykhel lievoskiro trúpo, i ĥáda, rojo berlinen (pčolen) dro lievoskiro trúpo i avgín.

⁹Jov lyjá les dre péskire vastá, i gijá, i xaja dromésa; i kiéli javdiá ke péskiro dad i péskiri daj, dyjá i lénge, i jone xané; ne na phendiá lénge, so jov lievoskire trupostyr lyjá davá avgín.

¹⁰I javdiá léskiro dad ke džuvlý, i kerdiá odój Samsóno skamínd, syr isyn prilyno, keréna terné.

¹¹I syr odój dykhné les, to dyné léske vykedyné trindeša bjavitkone malen, savé by javéna pašýl léste.

¹²To tén'či phendiá lénge Samsóno: “Zadava me tuménge šerepharibnytko zadyiben (zagadka); kóli tumé rosphandena (otgadynena) mánge les pal eftá dyvesá pe piró rosphandena i čačunés, tedy me dáva tuménge trindeša sindony i trindeša zmienna ídi;

¹³kóli na déna ráda te rosphanden mánge, tedy tumé bangé javéna te den mánge trindeša sindony i trindeša zmienna ídi.” Jone phendlé léske: “Zagadyn (zade) tyró šerepharibnytko, pošunasa.”

¹⁴I phendiá lénge: “Habnaskirestyr vygijá xabnytko, i zoralestyr vygijá gudló.” I na mogindlé jone te otgadynen šerepharibnytko (zagadka) dre trin dyvés.

¹⁵Pe eftáto dyvés phendlé jone Samsonoskire romniake: “Urakir tyré romes, sob (kaj) jov te rosphandel aménge šerepharibnytko (zagadka); a kóli nad, to shačkirasa jagása tut i tyré-dadéskiro kher; naúšto tumé khardé amen, sob (kaj) te obkeden amen?”

¹⁶rondiá Samsonoskiri romný angíl léste i rakiréla: “Tu bidykhesa man, i me na som pir iló túke; tu dyján miré-manušéngire čhavénge šerepharibnytka, a mánge na rosphandesa les.” Jov phendiá láke: “Miré dadéske i miré dáke na rosphandjom les; i túke ci rosphandava?”

¹⁷rondiá joj angíl léste eftá dyvesá, dre savé sys lénde piró. Ke kónco (jagóro) pe eftáto dyvés jov rosphandia láke; pal-dová so joj zoralés mangdiá les. A joj rozgadyndia šerepharibnytka péskire manušéngire čhavénge.

¹⁸I pe eftáto dyvés angíl khameskiro zagiibén phendlé léske manušá: “So isyn gudledyr avginestyr, i so isyn zoraledýr lievostyr!” Jov phendiá lénge: “Kóli by tumé te na den gódla pe miré terné gurumniate, tedy na otgadynenas by miro šerepharibnytko.”

¹⁹I zgija pe léste Devléskiro Dúho (Fáno), i gijá jov dro Askalono, i domardiá odój trindeša manušén, zlyjá léndyr ídi i otdyjá zmiena léngire rizendyr odolénge, kon rosphandia (rozgadyndia) šerepharibnytko (zagadka). I zahačíia léskiri xolý, i gijá jov dre péskire-dadéskiro kher.

²⁰A Samsonoskiri romný vygijá paloróm pal bjavitkone léskire maleste, savó sys drúgo (mal) pašýl léste.