Read Biblija - Pe Baltitko Romani čib (Romanes) 2019 Baltic Romani Bible Sendar'jengiri Lylvarí 16 Bible Online

Sendar'jengiri Lylvarí 16 - Biblija - Pe Baltitko Romani čib (Romanes) 2019 Baltic Romani Bible bible

Sendar'jengiri Lylvarí 16

¹Javdiá jékhvar Samsóno dre Gaza i, dykhciá odój biladžakunia džuvliá, i zagijá ke joi.

²Manušénge Gazakirenge phendlé: “Samsóno javdiá adarík.” I psirdé joine trusciál (krugom), i rakhne les sarí rat dre foróskire vudará, i garadyne sarí rat, rakirí: ke dyvesýtko ránko užakirasa i zamarasa les.”

³A Samsóno sys sutó ke paš rat; dre paš rat uštyjá, suhtyldia vudará foróskire portendyr duje kosiakenca, ĥazdyjá len khetané šyberosa (zaporosa), čhudiá pe péskire psiké i otlydžija len pe bergákiro vučipén, saví isyn pe drom ke Xievróno.

⁴Korigedýr (pozže) davá léske jaciá pir iló jekh džuvlý, saví dživdiá pe Soriekoskiro dólo; lav lákiro sys Dalida.

⁵Ke joj iavné Filistimijákire xulaja i rakiréna láke: “Urakir les, i udžin, dre so isyn bari léskiri zor, i syr aménge te pirizorjakiras (te zbierdynas) les, sob (kaj) te sphandas les te štyliakiras les; a ame dasa túke pal davá kažno tysjonco šékieli dro rup.”

⁶I phendiá Dalida Samsonoske: “‘Phen mánge, dro so’ isyn bari zor tyrí, i sósa te phandes tut, sob (kaj) te štyliakires tut?”

⁷Samsóno phendiá láke: “Kóli sphandena man eftá kinde tietivenca, savé isyn na zašut'kirde, tedy me skeravape bizorjákiro i javáva, syr i javír manušá.”

⁸I jandlé láke Filistimniakire xulaja eftá kinde tietivy, savé sys na zašutine, i joj phandia les lénca.

⁹Maškir dová sys jekh garadó manúš beštó dre štúba, kaj sys suté. I phendiá léske: “Samsóno! Filistimliáni džána pe túte.” Jov roskustia tietivy, syr roskušena thav pakliatyr, kiéli pirihačkirela la jag. I na udžindlé léskiri zor.

¹⁰I phendiá Dalida Samsonoske: “Ĥáda, tu xohadian man i rakirdian mánge xohaibén; phen kakaná mánge, sósa te sphandav tut?”

¹¹Jov phendiá láke: “Kóli phandena man nevoné šelenca, savé na sys dro réndo, tedy me keravape bizorjákiro i javáva, syr saré manušá.”

¹²E Dalida lyjá neve šele, i phandia les, i phendiá léske: “Samsóno! Filistimliáni džána pe túte.” (Maškir davá sys jekh garadó manúš, beštó dre štúba, kaj sys suté). I skustia jov len péskire vasténdyr, syr thava.

¹³I phendiá Dalida Samsonoske: “Usa tu xohavesa man i rakirésa mánge xohaibén; phen mánge, sósa by te phanden tut.” Jov phendiá láke: “Kóli tu miré šereskire balendyr skhuvesa eftá čhurja (kosy) dre than (tkan'), i primaresa la cvikosa ke tkal'no kaloda.

¹⁴I prikerdia joj len ke kaloda, i phendiá léske: “Filistimliáni džána pe túte, Samsóno!” Jov džangadyja péskire soibnastyr i vytyrdyja tkal'no kaloda khetané thanesa (tkaniasa).

¹⁵I phendiá léske Dalida: “Syr tu rakirésa: Tu san drógo mánge, a iló tyró nane mánca? Ĥáda, tu trin móly xohadian man i na phendián mánge, dre so isyn bari zor tyrí.”

¹⁶I adiáke joj péskire lavénca tasavelas les kažno dyvés, i menčyndia les, tedy léskire dieske jaciá pharó ke meribén.

¹⁷I jov otčhakirdiá láke saró iló péskiro, i phendiá láke: “Britva (muradluny) na kasyndiape miro šeró; pal-dová so me som Devléskiro nazoriejo miré-dákire ločoviátyr (utrobatyr); kóli te občhines man, to otdžala mirí zor mándyr; me keravape bizorjákiro i javáva, syr saré manušá.”

¹⁸E Dalida, so jov otčhakirdiá láke péskiro saró iló, bičhadiá i khardiá Filistimlianengire xulan, pheny lénge: “Džán kakaná; jov otčhakirdiá mánge saró péskiro iló.” I javné ke joj Filistimlianengire xulaja, i jandlé rup dre péskire vastá.

¹⁹I zasovliakirdia les Dalida pe lákire čangá, i khardiá manušés, i phendiá léske te občhinel eftá čhurja léskire šerestyr. I lyjá jov te našavel zor i otgijá léstyr zor léskiri.

²⁰Joj phendiá: “Filistimliáni džána pe túte, Samsóno!” Jov džangadyja (prošnindiape) péskire soibnastyr i phendiá: “Džáva, syr i anglydyr, i me javáva vól'no.” A na džindiá, so Raj Devél otgijá léstyr.

²¹Filistimliáni lyné les i vyphusade léske jakhá, jandlé les dre Gaza i zakuindle les duje xarkuné zandir'jenca (lancugenca), i jov mielindia dre uznikengiro kher.

²²Ne paló (poslie) davá balá pe léskiro šeró lyné te barjon, kaj jone sys občhindlé.

²³Filistimlianengire xulaja skedynépe, sob (kaj) te janden baró svénto janybén Dagonoske, peskireske devloreske, i te lošaljon (te poviesielinenpe), i phendlé: “Devél amaró otdyjá Samsonos, vergos amares, dre amaré vastá.”

²⁴Adiáke-pac' i manušá, dykhí les, slavindle péskires devlores, rakirí: “Devél amaró otdyjá dre amaré vastá amaré vergos i amaré phuvjákire čhučiibnaris, savó domardiá buten améndyr.”

²⁵I kiéli rozviesielindiape léngiro iló, to jone phendlé: “Kharén Samsonos, mek jov te sandiakirel amen.” I khardé Samsonos uznikengire kheréstyr, i jov sandiakirdia len, i čhudé les maškír stýlby.

²⁶I phendiá Samsóno terné-beršengireske (otrokoske), savó lydžijá les pal vast: “Podlydža man, sob (kaj) te čilavav mánge stýlby, pe savé isyn terdó kher, i te prikasynavpe ke jone.”

²⁷Muršén i džuvlién sys pherdó kher; odój sys saré Filistimlianengire xulaja, i pe stréha (čhakín) sys ke trin tysjoncy muršén i džuvlién, savé dykhné pe Samsonoste, savó len sandiakirelas.

²⁸I zadyja gódla Samsóno ke Raj Devél i phendiá: “Rajo Dévla! Priripir man i zorjakir man jékhvar kakaná, o Dévla! Sob (kaj) mánge dre jekh mólo te othav pale Filistimlianenge pal duj miré jakhá.”

²⁹I zlyjá Samsóno štetóstyr duj maškiratune stýlby, pe savé rikirdiape kher, rikiri pes dre lénde, dre jekh peskiresa čačé (pravone) vastésa, a dre javír zervone (lievone) vastésa.

³⁰I phendiá Samsóno: “Mer, di miro, Filistimlianenca!” I tasadia saré zorjátyr i pyjá kher pe xulande i pe saré manušénde, savé sys dre léste. I sys mulen, savén muliakirdiá Samsóno angíl meribén péskiro, butydyr, syr ci but jov muliakirdiá dre péskiro džiibén.

³¹I javné léskire pšála i saró léskire-dadéskiro kher, i lyné les, i giné, i garadé les maškír Cora i Jestaolo, dre Manojoskiri koplíca, léskire dadéskiri. Jov sys sendári pe Izrailjo biš berš.