Read Biblija - Pe Baltitko Romani čib (Romanes) 2019 Baltic Romani Bible Sendar'jengiri Lylvarí 2 Bible Online

Sendar'jengiri Lylvarí 2 - Biblija - Pe Baltitko Romani čib (Romanes) 2019 Baltic Romani Bible bible

Sendar'jengiri Lylvarí 2

¹I javdiá Ráskire-Devléskiro Jangólo Galgalostyr dro Bohimo, i phendiá: “Me vylydžijom tumen Jegiptóstyr i jandjom tumen pe phuv, pal saví sovlahadjom tumaré dadénge — te dav tuménge, i phendjom Me: “Na paruvava Miro zavieto tuménca dre viéko;

²i, sob (kaj) tumé te na khetaniakirenpe dalé-phuvjákire manušénca; léngire altári (žertvieniki) rossphagiren.” Ne tumé na šundlé Mirí zan (glos). So tumé davá kerdé?

³I paldová Me rakiráva: “Me na protradava len tuméndyr, i javéna jone tuménge čhupniasa, léngire devloré javéna vaš tuménge feliasa (sietkasa).”

⁴Kiéli Ráskire-Devléskiro Jangólo phendiá dalé lavá saré Izrailjoskire čhavénge, tedy manušá ĥazdyné bari gódla i zarondle.

⁵Daléstyr i kharéna dová štéto Bohimo. Odój jone jandlé svénto dyibén (žértva) Ráske-Devléske.

⁶Kiéli Isúso otmekciá manušén, i giné Izrailjoskire čhavé, kažno (sváko) dre péskiri mištypnáskiri miéra, sob (kaj) te doresen (te dolen) dro meknó mištypén (nasliedijo) phuv,

⁷tedy manušá dynarindlé Ráske-Devléske dre saré Isusóskire dyvesá i dre saré phurydyrengire dyvesá, savé dživdé korigedýr (pozžie) Isusóste i savé dykhné saré baré réndy Ráskire-Devléskire, savé Jov kerdiá Izrailjoske.

⁸Ne kiéli myjá o Isúso (Johošuá), Navinoskiro čhavó, Ráskire-Devléskiro pishári, to sys léske šel i deš berš,

⁹i garadé les dre léskire mištypnaskire-mierakiri rig dre Famnaf-Sarajo, pe Jefriemóskiri bérga, pe paš-rat (sieviero) bergátyr Gaaša;

¹⁰i kiéli saré adalé manušá otginé ke péskire dadá, i ĥazdyjápe korigedýr (pozžie) lénde javír ródo, savó na džindiá Ras-Devlés i Léskire réndy, savé Jov kerdiá Izrailjoske,

¹¹tedy Izrailjoskire čhavé lyné te kerén čoripén angíl jakhá Devléskire, i lyné te dynarinén Vaalamenge;

¹²jone jačkirdé Ras-Devlés, péskire dadengíre Devlés, Savó vylydžijá len Jegiptóskire phuvjátyr, i risiné ke javír devloré, manušéngire devlorénge, savé sys pašýl lénde, i lyné te mangénpe lénge, i xoliakirde Ras-Devlés;

¹³i jone jačkirdé Ras-Devlés i lyné te dynarinén Vaaloske i Astartenge.

¹⁴I zahačíia Ráskire-Devléskiri xolý pe Izrailjo, i otdyjá len dre čoribnar'jengire vastá, i občorde len; i otdyjá len dre vergéngire vastá, savé sys pašýl lénde, i na mogindlé jone butýr te vyrikiren angíl péskire vergénde.

¹⁵Karik jone džánas, Ráskire-Devléskiro vast usiendie sys lénge dre čoripén, syr rakirdiá lénge Raj Devél i syr sovlahadiá lénge Raj Devél. I lénge sys drieván (zbit) tiasno.

¹⁶I čhuvelas lénge Raj Devél sendar'jen, savé zrakhné len vasténdyr léskire čoribnar'jendyr;

¹⁷ne i sendar'jen jone na šundlé, a psirenas, blendyny palál pal javire devlorende i mangnepe lénge, syg zdžanas droméstyr, savésa psirdé léngire dadá, kandyi Ráskire-Devléskire priphenybená (zapoviedi). Jone adiáke na kerdé.

¹⁸Kiéli Raj Devél délas lénge sendar'jen, tedy Kokoró Raj Devél sys sendári i zrakhciá len léngire vergéndyr dre saré sendar'jengire dyvesá: pal-dová so tangindia len Raj Devél, šuny léngire ĥondiá manušéndyr, savé len bidykhne i tasade.

¹⁹Ne syr syg myjá sendári, jone nevés (znoko) kerdé fujedýr péskire dadendyr, otrisii ke javír devore, dynári lénge i mangnepe lénge. Na mekné jone péskire rendéndyr i nalačhé péskire droméstyr.

²⁰I zahačíia Ráskire-Devléskiri xolý pe Izrailjo, i phendiá Jov: “Pal dová, so adalé manušá piridžana Miro zavieto, savó Me čhudjom léngire dadénca, i na šunéna Mirí zan,

²¹to i Me na lavá butýr te tradav léndyr ni jekhés odolé manušéndyr, savén jačkirdjom Isusóske, kiéli jov merelas,

²²sob (kaj) te zlydžas lénca Izrailjo: ci léna jone te rikirenpe Ráskire-Devléskire dromeske i te psirén pir léste, syr rikirdepe léngire dadá, ci nad?”

²³I jačkirdiá Raj Devél adalé manušén, i na vytradyjá len syg, i na otdyjá len dre Isusóskire vastá.