Read Biblija - Pe Baltitko Romani čib (Romanes) 2019 Baltic Romani Bible Sendar'jengiri Lylvarí 20 Bible Online

Sendar'jengiri Lylvarí 20 - Biblija - Pe Baltitko Romani čib (Romanes) 2019 Baltic Romani Bible bible

Sendar'jengiri Lylvarí 20

¹I vyginé saré Izrailjoskire čhavé, i skedyjape saró skedyibén, syr jekh manúš, Danostyr ke Virsavijo, i Galaadoskiri phuv angíl Raste-Devléste dre Masífa.

²I skedynépe saré manušéngire barydyrá, saré Izrailjoskire ródycy, pe Devléskire manušéngiro skedyibén, štar tysjoncy pezal, savé vylena kurtála.

³I Vieniaminóskire čhavé šundlé, so Izrailjoskire čhavé javné dre Masífa. I phendlé Izrailjoskire čhavé: “Phenén, syr vygijá davá fuipén?”

⁴Lievito, rom dalja-umardia romniakiro, otphendiá i phendiá: “Me miré naložnicasa javdjom te rat'kirav dre Vieniaminoskiri Givá;

⁵i ĥazdynépe pe mánde Givakire manušá, i zauhtylde pal mánde ratý kher. Man skedynépe te zamarén (te umaren) i mirja naložnica zamenčyndle, adiáke, so joj myjá;

⁶me lyjom mirja naložnica, rosčhindjom la i bičhadjom la dre saré Izrailjoskire rigá, pal-dová so jone kerdé biladžaipén i magirdó réndo (diélo) dro Izrailjo;

⁷ĥáda, saré tumé, Izrailjoskire čhavé, roskeden (rozdykhen) davá réndo i rosphanden (roskeden) les adái.”

⁸I ĥazdynépe saré manušá, syr jekh manúš, i phendlé: “Na džála nikón dre péskiri šátra i ame na risjovasa dro péskiro kher;

⁹i ĥáda, so ame kerása kakaná Givosa: džása pe léste pir žriébijo;

¹⁰i ame lása pir deš manušén šelendyr saréndyr Izrailjoskire rodycendyr, pir šel tysjoncostyr, i pir tysjonco deše tysjoncendyr, sob (kaj) jone te janén xabnytka zapasy vaš manušénge, savé džána proti Vieniaminoskiri Givá, te čhuvas kára pe láte pal magirdó réndo, savó joj kerdiá dro Izrailjo.

¹¹I skedynépe saré Izrail'tiáni proti fóro syr jekh manúš.

¹²I bičhadé Izrailjoskire ródycy dre saré Vieniaminóskire ródycy te phenén: “Savó davá nálačho réndo kerdiápe tuménde!

¹³Vyden adalen biladžaibnytkone manušén, savé isyn dre Givá; ame len muliakirasa i ame vylydžasa fuipén Izrailjostyr.” Ne Vieniaminóskire čhavé na kamlé te šunén péskire-pšalengiri zan, Izrailjoskire-čhavengiri;

¹⁴a skedynépe Vieniaminóskire čhavé for'jéndyr dre Givá, sob (kaj) te džas maribnása proti Izrailjoskire čhavénde.

¹⁵I pirigindle dre dová dyvés Vieniaminóskire čhavén, savé skedynépe for'jéndyr, biš te šov tysjoncy manušén, savé vytyrdena kurtála apríč odolénde, Givakire manušénde gindlo sys eftadešá fedyršonen.

¹⁶Saré dalé manušéndyr sys eftašelá manušén fedyršonen, savé sys lievšy, i saré adalé, kon čhurdéla praščendyr bará pe bal, na čhurdyné ivjá (naprásnes).

¹⁷Izrail'tianén, apríč Vieniaminóskire čhavénde, pirigindlo sys štaršelá tysjoncy manušén, savé vytyrdena kurtála; saré jone sys lačhé ke meribén.

¹⁸I uštyné i giné dro Devléskiro Kher, i phučnepe Devléstyr, i phendlé Izrailjoskire čhavé: “Kon tuméndyr angledýr džála pe maribén Vieniaminóskire čhavénca?” I phendiá Devél: “O Juda džála angíl.”

¹⁹I uštyné Izrailjoskire čhavé pe zlóko (ránko), i terdiné stanósa pašýl Givá;

²⁰i vyginé Izrail'tiáni pe maribén proti Vieniaminoste, i terdiné Izrailjoskire čhavé dro maribnýtko riado nádur Givatyr.

²¹I vyginé Vieniaminóskire čhavé Givatyr, i čhudé pe phuv dre dová dyvés biš te duj tysjoncy Izrail'tianén.

²²Ne Izrailjoskire manušá poduhtyldepe i nevéstyr terdiné dro maribnaskiro riado pe dová štéto, kaj sys terdé pe anglatunó dyvés.

²³I giné Izrailjoskire čhavé, i rondlé angíl Devléste ke bel'vél', i phučnepe Devléstyr: “Ci te terdjovav mánge butýr dro maribén Vieniaminóskire čhavénca, miré pšalesa?” Devél phendiá: “Džán proti léste.”

²⁴I podginé Izrailjoskire čhavé ke Vieniaminóskire čhavé pe javír dyvés.

²⁵Vieniamino vygijá proti lénde Givatyr pe javír dyvés, i butýr čhudé pe phuv Izrailjoskire čhavéndyr dešuohto tysjoncy manušén, savé vytyrdenas kurtála.

²⁶Tedy saré Izrailjoskire čhavé i saré manušá giné, i javné dro Kher Devléskiro, i, bešyndoj odój, rondlé angíl Devléste, i postindle dre dová dyvés ke bel'vél', i jandlé célo shačkiribén i mirna svénta janybená angíl Devléste.

²⁷I phučnepe Izrailjoskire čhavé Devléstyr dre dová časo Devléskire-zavietóskiro kovčego sys odój,

²⁸i Finiejeso, Jelizaroskiro čhavó, Aaronóskire-čhavéskiro, sys terdó sys barydyr angíl léste: “Ci te vydžav mánge butýr pe maribén Vieniaminóskire čhavénca, miré pšaléskire, ci nad?” Devél phendiá: “Džán; Me atasiá otdáva les dre tumaré vastá.”

²⁹I Izrailjo čhudiá manušén te bešes čorahanés pašýl Givá.

³⁰I giné Izrailjoskire čhavé pe Vieniaminóskire čhavénde dro tríto dyvés, i terdiné dro maribnaskiro riado angíl Givá, syr angledýr.

³¹Vieniaminóskire čhavé vyginé proti manušénde i otginé foróstyr, i lyné syr angledýr, te muliakirén manušén pe dromá, savéndyr jekh džála ke Viefíljo, a javír ke Givá feldasa, i dormarde ke trijánda manušén Izrail'tianendyr.

³²I phendlé Vieniaminóskire čhavé: “Jone peréna angíl aménde, syr i angledýr.” A Izrailjoskire čhavé phendlé: “Prastasa léndyr i ottyrdasa len foróstyr pe drom.”

³³I saré Izrail'tiáni uštyné péskire štetóstyr i terdiné dre Vaal-Famara. I Izrailjoskiri zasada gijá péskire štetóstyr, zapadnone Givakire rigátyr.

³⁴I javné angíl Givá deš tysjoncy fedyršonen manušén saré Izrailjostyr, i lyjape baró maribén; ne Vieniaminóskire čhavé na džindlé, so lénge javéla bída.

³⁵I domardiá Raj Devél Vieniaminos angíl Izrail'tianende, i čhudé muló dáro dová dyvés Izrail'tiáni Vieniaminóskire čhavéndyr biš te pandž tysjoncy šel manušén, savé vytyrdenas kurtála.

³⁶Kiéli Vieniaminóskire čhavé dykhné, so jone domardé, tedy Izrail'tiáni dyné štéto Vieniaminóskire čhavénge, pal-dová so jone rosgindle pe zasada, saví jone čhudé nádur Givatyr.

³⁷Zasada sygniakirdia pes i gijá ke Givá, i zagijá, i domardiá saró fóro kurtalása.

³⁸Izrail'tiáni dorakirdepe zasadasa pal sykaibén (signalo) ke maribén, syr ĥazdélape thuv (dymo) foróstyr.

³⁹I adiáke, kiéli Izrail'tiáni otginé maribnaskire štetóstyr, i Vieniamino lyjá te marel, i domardiá Izrail'tianén ke trijánda manušén, i rakirdiá: “Nevéstyr jone peréna angíl aménde, syr i dro anglatunó maribén”,

⁴⁰tedy lyjá te ĥazdelpe foróstyr stylbosa thuv. Vieniamino dykhciá pale, i ĥáda, thuv saré foróstyr džála ke bolybén.

⁴¹Izrail'tiáni risiné, a Vieniamino strahadyja, pal-dová so dykhciá, so lathiá les bída.

⁴²I prastándyne jone Izrail'tianendyr pir drom pe čhučí phuv; ne maribén tradyjá len, i manušá, savé vydžánas for'jéndyr, mardé len odój;

⁴³jone zauhtylde Vieniaminos, i tradyne les ke Mienuha, i mardé ke sámo vastočno Givakiri rig.

⁴⁴I pyné Vieniaminóskire čhavéndyr dešuohto tysjoncy manušén, zoralen manušén.

⁴⁵Manušá, savé jačnépe risiné i našné pe čhučí phuv, ke Rimonoskiri skála, i domardé Izrail'tiáni butýr pe dromá pandž tysjoncy manušén; i tradynepe pal lénde ke Gidomo, i butýr Izrail'tiáni domardé léndyr duj tysjoncy manušén.

⁴⁶Sarén Vieniaminóskire čhavén, savé pyné dre dová dyvés, sys biš te pandž tysjoncy manušén, savé vytyrdenas kurtála, i saré jone sys zoralé muršá.

⁴⁷I risiné manušá, savé jačnépe, i našné pe čhučí phuv, ke Rimonoskiri skála, šovšelá manušá, i jačnépe odój pe baruny Rimonoskiri bérga štar čhoná.

⁴⁸Izrail'tiáni nevés giné ke Vieniaminóskire čhavé, i domardé len kurtalása, i manušén dre fóro, i kheritkoné manušén (skoto), i saró, so jone strenindle, i saró, so sys pe foróskiro drom, shačkirdé jagása.