Read Biblija - Pe Baltitko Romani čib (Romanes) 2019 Baltic Romani Bible Sendar'jengiri Lylvarí 21 Bible Online

Sendar'jengiri Lylvarí 21 - Biblija - Pe Baltitko Romani čib (Romanes) 2019 Baltic Romani Bible bible

Sendar'jengiri Lylvarí 21

¹I sovlahade Izrail'tiáni dre Masífa, rakirí: “Nikón améndyr te na otdél péskire čha pal Vieniaminóskire čhavénde paloróm.”

²I javné manušá dro Devléskiro Kher, i sys bešté odój ke bel'vél' angíl Devléste, i ĥazdyné zoralý gódla, i drieván rondlé,

³I phendlé: “Rajo Dévla, Devél Izrailjoskiro! Vaš so davá kerdiápe dro Izrailjo, so na jaciá kakaná dro Izrailjo jekh ródyco?”

⁴Pe javír dyvés uštyné pe zlóko (ránko) manušá, i kerdé odój altárjo, i ĥazdyné célo shačkiribén i ramanjosa (mirna) svénta janybená Ráske-Devléske.

⁵I phendlé Izrailjoskire čhavé: “Kon na psirdiá pe skedyibén angíl Raste-Devléste saré Izrailjoskire rodycendyr?” Pal dová so baró prokošybén phendo sys pe odolénde, savé na javné angíl Raste-Devléste dre Masífa, i sys phendló, so odolé javéna otdyné meribnáske.

⁶I tangindle (požalindle) Izrailjoskire čhavé Vieniaminos, péskire pšalés, i phendlé: “Kakaná isyn otčingirdo jekh ródyco Izrailjostyr;

⁷syr te kerás aménge, savé jačnépe léndyr, so kasynelape džuvlién (romnien), kiéli ame sovlahadiam Rása-Devlésa te na das lénge amaré čhajendyr?”

⁸I phendlé: “Ci nane konés Izrailjoskire rodycóstyr, kon na javdiá angíl Raste-Devléste dre Masífa? I vygijá, so Galaadóskire Iavisóstyr nikón na javdiá angíl Raste-Devléste dro stáno pe skedyibén.

⁹I obdykhne manušá, i ĥáda, na sys odój ni jekhés Galaadóskire Iavisostyr manušén.

¹⁰I bičhadiá skedyibén odorík dešudúj tysjoncy manušén, zoralé muršén, i dyné lénge priphenybén, rakirí: “Džán i domaren Galaadóskire-Iavisoskire manušén kurtalása, i džuvlién i čhavorén;

¹¹i ĥáda, so kerén: kažnoné (svakone) muršés i svakona džuvliá, saví udžindiá muršés, otdén prokošybnaske.”

¹²I lathné jone maškír Galaadóskire-Iavisoskire manušénde štaršelá čhajor'jen, savé na džindlé muršés, i jandlé len dro stáno dro Silómo, so isyn pe Xanaanóskiri phuv.

¹³I bičhadiá saró skedyibén te pirirakiren Vieniaminóskire čhavénca, savé sys pe Rimonoskiri bérga, i phendlé zoralés lénge ramánjo (miro).

¹⁴Tedy risiné Vieniaminóskire čhavé, i Izrail'tiáni dyné lénge džuvlién, savén jačkirdé džiden Galaadóskire Iavisoskire džuvliendyr; ne vygijá, so davá sys nábut.

¹⁵Manušá piridživde pal Vieniaminoste, so Raj Devél na rakhciá kažno ródyco célo saré Izrailjoskire rodycendyr.

¹⁶I phendlé skedyibnaskire phurydyrá: “So aménge te kerás manušénca, savé jačnépe bi džuvliengiro, pal-dová so muliakirdé džuvliá Vieniaminoste?”

¹⁷I phendlé jone: “Phuv mek te jačélpe Vieniaminóskire čhavénge, savé jačnépe džidé, sob (kaj) te na xasjol Izrailjostyr ródyco;

¹⁸ne ame na moginasa te das lénge džuvlién amaré čhajendyr; pal-dová so Izrailjoskire čhavé sovlahade, rakirí: ‘Prokošnó javéla, kon déla džuvliá Vieniaminoske.’”

¹⁹I phendlé: “Ĥáda, kažno berš džála Ráskire-Devléskiro svénko dre Siloma, saví isyn pe paš-rat (sieviero) Viefiljostyr i pe vastóko droméstyr, savó lydžála Viefiljostyr dro Sihiemo, i pe paš-dyvés (jugo) Lievonostyr.

²⁰I priphendle Vieniaminóskire čhavénge i phendlé: “Džán i garadjon dre vinagradniki,

²¹i dykhén, kiéli vydžána te khelen Silomostyr terné patyvalé džuvliá dro krugo, to tedy tumé vydžán vinagradnikostyr, i uhtylén kažno péske romniá Silomskone tyrne patyvalé džuvliendyr, i džán pe Vieniaminoskiri phuv;

²²i kiéli javéna léngire dadá, ci léngire pšála tangipnasa ke ame, ame phenása lénge: ‘Primangen amen pal lénde; paldavá so ame na lyjam vaš svakoneske léndyr romniá pe maribén, i tumé na dyné lénge; kakaná tumé san bangé.’”

²³Vieniaminóskire čhavé adiáke i kerdé, i lyné romnien pir péskiro ginybén, savé sys dro krugo, savén jone čorde, i giné i risiné dre péskiri mištypnáskiri miéra, i čhudé fórja, i lyné te dživén dre lénde.

²⁴Dre dová-pac' časo Izrail'tiáni rozginepe odothýr kažno (sváko) pir péskiro ródyco i pir péskiro kherítko ródo, i giné odothýr sváko dre péskiri mištypnáskiri miéra.

²⁵Dre dolé dyvesá na sys pe Izrailjo kralís; kažno (sváko) kerdiá dová, so léske zdyjape čačunesa.