Read Biblija - Pe Baltitko Romani čib (Romanes) 2019 Baltic Romani Bible Sendar'jengiri Lylvarí 9 Bible Online

Sendar'jengiri Lylvarí 9 - Biblija - Pe Baltitko Romani čib (Romanes) 2019 Baltic Romani Bible bible

Sendar'jengiri Lylvarí 9

¹Avimieliého, Iierovaaloskiro (Giedieonoskiro) čhavó, gijá dro Sihiemo ke péskire-dákire pšála, i rakirdiá lénge i saré péskire-dákire dadéskire rodóske, i phendiá:

²“Dophenen saré Sihiemoskire manušénge: so javéla fedýr vaš tuménge, sob (kaj) tumé te javén xulanca pe tuménde saré eftadešá Iierovaaloskire čhavé, cji, sob (kaj) te javél jekh xulái? I priripiren, so me som tumaró kokalo i loč (plot') tumarí.”

³Pšála léskire dákire, dophendle pal léste saré dalé lavá Sihiemoskire manušénge; i zbandija léngiro iló ke Avimieliého, pal-dová so rakirdé jone: jov isyn amaró pšal.

⁴I dyné léske eftadešá šékieli rup Vaalvierifoskire kheréstyr, o Avimieliého prilyjá pe butý ke pe dalé balvalitkone i lokhe-godiakiren (svoievol'none) manušén, savé i giné pal léste.

⁵I javdiá jov dro léskire-dadéskiro kher dre Ofra, i zamardiá péskire pšalén eftadešá Iierovaaloskire čhavén, pe jekh bar. Jaciápe jekh Iofámo, Iierovaaloskiro tyknedýr čhavó, pal-dová so garadyja.

⁶I skedynépe saré Sihiemoskire manušá i saró Miloskiro kher, i giné i čhudé Avimieliehos kralísa pašýl dembo, so nádur isyn Sihiemostyr.

⁷Kiéli rosphendlé pal davá Iofamoske, jov gijá i terdijá pe Garizimoskire-bergákiro vučipén, i, ĥazdyjá péskiri zan (glos), dyjá gódla i rakirdiá lénge: “Šunén man, Sihiemoskire manušále, i te šunél tumen Devél!

⁸Giné vari-kiéli drevy (kaštá) te pomakhen pe péste kralís i phendlé maslinake: ‘Kralin pe aménde.’

⁹Maslina otphendiá lénge: “Ci jačkirava me miro túko, savésa manušá sykavéna patýv devleske i manušénge, i ci džáva me te badinav pir vešá?”

¹⁰I phendlé kaštá smokovnicake: ‘Džá tu, kralin pe aménde.’

¹¹Smokovnica phendiá lénge: “Ci jačkirava me miro gudlypen i lačhó miro barjakirdó (plódo), i ci džáva te badinav pir vešá?”

¹²I phendlé kaštá vinagradoskire lozake: ‘Džá tu, — kralin pe aménde.’

¹³Vinagradoskiri loza phendiá lénge: ‘Ci jačkirava me miro sóko (xum), savó viesielinela (lošakirela) devlen i manušén, i ci džáva te badinav pir vešá?’

¹⁴Pe kónco (jagóro) phendlé saré kaštá tiernovnikoske: ‘Džá tu, — kralin pe aménde.’

¹⁵Tiernovniko phendiá kaštenge: ‘Kóli tumé pir čačipén te čhuvén man kralísa pe péste, to tedy džán, otkhinjon tel mirí zer (tien'); kóli nad, tedy vydžála tiernovnikostyr jag i shačkiréla Livanoskire kiedry.’

¹⁶I adiáke dykhén, ci pir čačipén, i ci pir patiaben tumé keréna, čhuvi Avimieliehos kralísa? I ci šukár tumé kerdé Iierovaalosa i léskire kheresa, i ci pir léskire lačhé réndy (diély) kerdé tumé?

¹⁷Pal tuménde miro dad mardiápe, na tangindia péskiro džiibén i vyrakhcia (zbavindia) tumen Madianitianengire vastéstyr;

¹⁸a tumé kakaná ĥazdynépe proti miré-dadéskiro kher, i domardé eftadešá miré-dadéskire čhavén pe jekh bar, i čhudé kralísa pe Sihiemoskire manušénde Avimieliehos, léskire pisharicakire čhavés, pal-dová so jov isyn tumaró pšal.

¹⁹Kóli tumé kakaná pir čačipén i pir patiaben kerdé Iierovaalosa i léskire kheresa, tedy radynénpe pal Avimieliehoste, i jov mek te radynélpe pal tuménde;

²⁰kóli iščo (inké) nad, tedy mek te vydžál jag Avimieliehostyr i mek te shačkirel Sihiemoskire manušén i saró Milloskiro kher, i mek te vydžál jag Sihiemoskire manušéndyr i Milloskire kheréstyr, i mek te shačkirel Avimieliehos.”

²¹I prastándyja Iofámo, i nastiá, i gijá dre Bieera, i dživdiá odój, ĥaradyi péskire pšalestyr Avimieliehostyr.

²²Avimieliého iščo (inké) kralindia pe Izrailjo trin berš.

²³I bičhadiá Devél xoliamé duhos maškír Avimieliehoste i maškír Sihiemoskire manušénde, i na lyné te kandén Sihiemoskire manušá Avimieliehos,

²⁴sob (kaj) adiáke-pac' te othal pale pal eftadešá Iierovaaloskire čhavénde, i rat léngiro te javél pe Avimieliehoste, léngire pšaléste, savó domardiá len, i pe Sihiemoskire manušénde, savé zoraliakirde léskire vastá, sob (kaj) jov te domarel péskire pšalén.”

²⁵Sihiemoskire manušá čhudé proti léste dre garaiben manušén pe bergengiro vučipén, savé občorenas kažnoné (svakones), kon gijá mamúj lénde pir drom. Pal saró sys rosphendlo Avimielihoske.

²⁶Javdiá i Gaalo Jeviedoskiro čhavó, péskire pšalénca dro Sihiemo, i psirdé jone pir Sihiemo, i Sihiemoskire manušá čhudé péskiro iló pe léste.

²⁷I vyginé pe félda, i skedyné péskiro vinagrado (drakh), i tasade múri, i kerdé svénki, psirdé dre péskire devleskiro kher, i xané i piné, i košne Avimieliehos.

²⁸Gaalo, Jeviedoskiro čhavó, rakirdiá: “Kon isyn Avimieliého, i so isyn Sihiemo, sob (kaj) aménge te dynarinás léske? Ci na Iierovaaloskiro čhavó jov, i ci na Zievulo isyn léskiro šeraló barydyró? Dynarinén fedýr Jemoroskire rodóske, Sihiemoskire dadéske, a léske vaš so aménge te dynarinás?

²⁹Kóli by kon te del adalé manušén, dre miré vastá, to me protradavas Avimieliehos.” I phendló sys Avimieliehoske: “Ker butydyr tyró xaladybén i vydža.”

³⁰Zievulo, foróskiro barydyró, šundiá Gaaloskire lavá, Jeviedoskire-čhavéskire, i zahačíia léskiri xolý.

³¹Jov mendripnasa bičhavéla manušén ke Avimieliého, sob (kaj) te phenén: “Ake, Gaalo, Jeviedoskiro čhavó, i léskire pšála javné dre Sihiemo, i ĥáda, jone ĥazdéna pe búnto fóro proti túte;

³²i adiáke uštý ratý, tu i manušá, savé isyn túsa, i čhuv dro garaiben manušén pe félda;

³³zlokosa (utrosa), syr javéla te uštel kham, uštý tasiárles (ránes) i džá ke fóro; i kiéli jov i manušá, savé isyn léste, vydžána ke tu, tedy ker lénca, so moginéla tyró vast.”

³⁴I uštyjá ratý Avimieliého i saré manušá, savé sys lésa, i čhudé dro ĥaraiben pašýl Sihiemo štar otriády.

³⁵Gaalo, Jeviedoskiro čhavó, vygijá i terdijá pašýl foróskire vudará; i uštyjá Avimieliého i manušá, savé sys lésa, garaibnastyr.

³⁶Gaalo, dykhciá manušén, i rakiréla Zievuloske: “Ĥáda, isyn manušá, savé zmekenape bergengire vučipnástyr.” A Zievulo phendiá léske: “Bergengiri zer (tien') zdelape túke manušénca.”

³⁷Gaalo nevés rakiréla, i phendiá: “Ĥáda, e manušá, savé zmekenape vučipnástyr, i jekh otriado džála Mieonimoskire dembostyr.”

³⁸I phendiá léske Zievulo: “Kaj isyn tyré uštá, savé rakirdé: ‘Kon isyn Avimieliého, sob (kaj) ame te las te dynarinás léske?’ Davá isyn odolé manušá, savén tu bidykhcian; vydža akaná i marpe lénca.”

³⁹I gijá Gaalo angíl Sihiemoskire manušénde, i mardiápe Avimieliehosa.

⁴⁰I tradyjape pal léste Avimieliého, i prastándyja jov léstyr, i but pyné domardé, ke sámo foróskiri pórta (vráty).

⁴¹I jaciápe Avimieliého dre Aruma, a Gaalos i léskire pšalén Zievulo vytradyjá, sob (kaj) jone te na dživén ke Sihiemo.

⁴²Pe javír dyvés vyginé manušá pe félda, i rosphendlé pal saró Avimieliehoske.

⁴³Jov lyjá péskire manušén, i roskerdiá (rozdielindia) len pe trin otriády, i čhudiá dro ĥaraiben pe félda. I dykhciá, so manušá vyginé foróstyr, ĥazdyjápe pe lénde i domardiá len.

⁴⁴Maškir dová časo, syr Avimieliého i otriády, savé sys lésa, podginé i terdiné pašýl foróskiri pórta, to javír duj otriády pyné pe sarénde, savé sys dre félda, i domarenas len.

⁴⁵I mardiápe Avimieliého forosa saró dová dyvés, i lyjá fóro, i domardiá manušén, savé sys dre léste, i rosphagirdiá fóro i počhudia les londesa.

⁴⁶Syr šundlé pal dová saré manušá, savé sys dre Sihiemoskiri vučardý (bašnia), to zaginé dre vučardý dre kapišča (mangipnytko štéto) Vaal-Vierifo.

⁴⁷Avimieliehoske rosphendlé, so skedynépe odorík saré, savé sys dre Sihiemoskiri vučardý.

⁴⁸I gijá Avimieliého pe bérga Sielmon, kokoró i saré manušá, savé sys lésa, i lyjá Avimieliého tovera pésa i vyčingirdia vešeskire senki (randiá), i čhudiá pe péskire psiké, i phendiá manušénge, savé sys lésa: “Tumé dykhné, so me kerdjom; sygnedyr kerén i tumé dová-pac', so me.”

⁴⁹I vyčingirdia kažno (sváko) saré manušéndyr senki, i giné pal Avimieliehoste, i čhudé ke vučardý (bašnia), i podhačkirde lénca vučardý jagása, i myné saré, savé sys dre Sihiemoskiri vučardý, pašýl tysjonco muršén i džuvlién.

⁵⁰Korigedýr (pozže) gijá Avimieliého dro Tievco, i občhudiá xaladybnasa Tievco, i lyjá les.

⁵¹Maškir fóro sys zoralý vučardý, i našné odorík saré muršá i džuvliá, i saré foróskire manušá, i zaphandlepe, i giné upré pe bašniakiri stréha (čhakín).

⁵²Avimieliého javdiá ke vučardý i okrenžyndia la, i podgíia ke vučardiakire vudará, sob te shačkirel la jagása.

⁵³Tedy jekh džuvlý čhurdyjá kotér bar žernovostyr (belediniatyr) pe Avimieliehoskiro šeró i prophagirdia léske čeriepo.

⁵⁴Avimieliého dová-pac' časo khardiá ke pe terné-beršengires, péskires oruženoscos, i phendiá léske: “Vytyrde tyrí kurtála i muliakir man, sob (kaj) te na phenén pal mánde: ‘E džuvlý zamardiá les.’ I prophusadia les terné-beršengiro léskiro, i jov myjá.

⁵⁵Izrail'tiáni dykhí, so myjá Avimieliého, giné kažno (sváko) pe péskiro štéto.

⁵⁶Adiáke otdyjá Devél pale Avimieliehoske pal fuipén, savó jov kerdiá péskire dadéske, syr zamardiá eftadešá péskire pšalén.

⁵⁷I saré Sihiemoskire-manušéngire čoré réndy (diély) poriskirdia Devél pe léngiro šeró. I lathiá len Iofamóskiro prokošybén, Iierovaaloskire čhavéskiro.