Read Biblija - Pe Baltitko Romani čib (Romanes) 2019 Baltic Romani Bible 3 Ian 1 Bible Online

3 Ian 1 - Biblija - Pe Baltitko Romani čib (Romanes) 2019 Baltic Romani Bible bible

3 Ian 1

¹Phurestyr, miré drogoné Gajoske, kon isyn drógo mánge čačipnása.

²Drógo miro! Me mangavape Devléske, sob (kaj) te javél kófo (pol'za) pe saró, so tu kerésa, sob (kaj) te javes tu sastó, adiáke-pac' syr tyró dúho (fáno) barjola.

³Pal-dová so me drieván obradyndjompe, kiéli devlýtka pšála javné i dophendle pal tyró čačipén, syr tu i dživesa pir čačipén.

⁴Vaš mánge nane baredýr rádyma, syr te šunav, so miré čhavoré dživéna pir čačipén.

⁵Drógo miro! Tu kerésa patiaibnytkes saró, so kerésa vaš devlytkoné pšalénge i čužoné manušénge,

⁶savé dophenenas angíl khangirí pal tyrí pšalýtko patýv, kiéli tu bičhavesas len dro drom, syr trej i, syr isyn lačhó Devléske, tedy tu kerésa lačhés;

⁷pal-dová so jone giné pal Xristosóskiro lav, jone na lyné nisó Najudendyr.

⁸Paldavá aménge trej te prilas šukár adasavé manušén, sob (kaj) ame moginasas te kerás butý khetané vaš čačipén.

⁹Me čhindjom khangirjake, ne Diatriefo, savéske javdiá pe godý te javél léngire šeralesa, na priléla dová, so me čhináva.

¹⁰Paldavá, kiéli me javáva, me dáva léske te ripirel pal dová, so jov keréla, syr jov zlydžala pljotki pe aménde. Ne jov adiáke isyn ĥálko ke davá, so jov i kokoró na priléla devlytkoné pšalén, i adiáke-pac' keréla proti odolénde, kon kaméla te prilel i iščo (inké) jov tradéla javrí len khangirjátyr.

¹¹Miro drógo! Na jav tu adasavó, sob (kaj) te kerés čoripén, a jav adasavó, sob (kaj) te kerés lačhipén. Kon keréla lačhipén, odová isyn Devléstyr, a kon keréla čoripén, odová na dykhciá Devlés.

¹²Saré dophenena lačhipén pal Dmitrijoste (Mitraste), i čačipén adiáke-pac' pal léste; ame adiáke-pac' dočhuvasa amaró dophenybén i tumé džinéna, so amaró dophenybén isyn čačunó.

¹³Mánde but treindiá te čhinav tuménge, ne me na kamám te keráv davá černilasá i porésa;

¹⁴ne me patiáva, so syg me dykhavo tumen, i ame javása te rakiras muj ke muj.

¹⁵Te javél ramánjo (miro) túke. Piridena “paklono” túke malá. Piride “paklono” malenge (drugenge), kažnonéske pir lav. Amín'.