Read Biblija - Pe Baltitko Romani čib (Romanes) 2019 Baltic Romani Bible Juda 1 Bible Online

Juda 1 - Biblija - Pe Baltitko Romani čib (Romanes) 2019 Baltic Romani Bible bible

Juda 1

¹Judastyr, Isusóskire Xristosóskire pisharistyr, Jakovóskire pšalestyr, manušénge, savé jačné dróga Devléske Dadéske, i savén Jov prikhardia, i savén zrakhciá Isúso Xristóso:

²mek tangipén, i ramánjo (miro), i pšalýtko patýv te javél dynó but butýr tuménge.

³Dróga miré! Me kamdjom xačkirdé ilésa te čhinav tuménge pal amaró khetano zrakhibén, me gindjom, so treindiá te čhinav tuménge, sob (kaj) te podrikirav tumen te terdjon pal patiaibén, savó jékhvar i vaš sarénge Devél dyjá sventoné manušénge.

⁴Pal-dová so vari-savé manušá čorahanés popyne maškír tuménde, savé ĥará sys otdyné pe séndo. Jone isyn bidevlytkarja, jone piririskirde Devléskiro bahtiakiribén dro vol'nyma te kerén, so kaména, i jone na priĥaljona Jekhe Ras-Bares, amaré Ras-Devlés, Isusós Xristosós.

⁵Me kamám te rakiráv, sob (kaj) tumé te ripirén, mek tumé jékhvar džindlé saró davá, so Raj Devél zrakhciá manušén Jegiptóskire phuvjátyr, a korigedýr (pozže) odolén, savé na patiandyné, Jov muliakirdiá.

⁶I Jangolen, savé na zrakhné péskiro anglatunó pravo dre patýv, a jačkirdé péskiro štéto te dživén, Jov rakhéla len dro kalypén dre viečna sastyrá pe baró Dyvés, kiéli len javéla Jov pharés te sendiakirél;

⁷adiáke syr Sodómo i Gomóra i pašatuné foricy, savé adiáke-pac', syr odolé Jangóly otdyné pes pe bléndo i vaš tyrdypén ke javír manušýtko loč: dalé fórja sys shačkirdé viečnone jagása syr primiéro (sykaibén) tuménge.

⁸Ne adiáke-pac' javéla kadalé manušénca, savé dykhéna suné i magirena péskiri loč; jone na priĥaljona Devléskiro pravo i kaliakirena zorja, so isyn dro Bolybnáskiro Rajo.

⁹Ne Mihailo Arhangielo vyrakirdia nalačheske, kiéli jone rakirénas jekh jekhésa pal Mojzáskire masá, Mihailo na sys murškanó te kaliakirel nalačhés, ne phendiá: “Mek Devél te priphenel Túke.”

¹⁰A kadalé manušá kaliakirena dová, so jone na džinéna, i dová, so jone ĥaljona féni syr bilavengire murdalá; dro dová jone poddenape grehoske.

¹¹Bida lénge! Pal-dová so jone giné Kainoskire dromésa i pal barvalypén jone kokoré otdyné pes grehoske, syr Valamo i jone meréna dro búnto, syr Kariejo.

¹²Kadalé manušá sýrby makhena tumaré devlykane svénki: jone svenkinena tuménca bi darákiro i čaliakirena féni kokoré pes. Jone isyn sýrby óbloki bipanieskire, savé balvál tradéla. Jone isyn sýrby vosieniakire kaštá bibarjakirdeskire, savén vykošne i, savé mulyne duj móly;

¹³jone isyn sýrby morjoskire (derjavéskire) xoliamé valny (velny), učhakirde pienasa péskire ladžaipnytkone rendéndyr (dielendyr); jone isyn sýrby čergeniá, savé na džinéna drom, savénge isyn rakhno kalypén (ciamlypén) pe viéki.

¹⁴I Jenoho, eftáto Adamostyr, angilphendia pal lénde: ĥáda, Raj Devél džála tysjoncengire dešytkonenca Péskire sventonendyr,

¹⁵te kerél séndo pe saré manušénde i te bangiakirel sarén nadevlytkonen maškír lénde pal léngire nadevlytka réndy, savé jone kerdé i pal saré pharé nalačhé lavá, savé kadalé bidevlytkarja-grehítka manušá rakirdé proti Devléste.

¹⁶Jone isyn xoliamé rakiribnarja, savé rikiréna xolý pe sarénde, jone keréna pir péskiro grehítko tyrdypén; jone javéna vučés te marén pes lavénca, jone javéna gudles te divinenpe pe manušénde vaš péskiri l'góta.

¹⁷Ne tumé, dróga miré, ripirén lavá, savé ĥaredyr rakirdé Apóstoly amaré Ráskire — Devléskire, Isusóskire Xristosóskire,

¹⁸so jone phendlé tuménge: “Javéna manušá dro palatunó časo, so javéna te sanpe xoliames tuméndyr, savé javéna pir péskiro grehítko tyrdypén.”

¹⁹Adalé isyn manušá, savé keréna grupy maškír manušénde proti jekh jekhéste, jone keréna pir péskiri godý, lénde nane Dúho (Fáno).

²⁰Ne tumé, miré dróga, barjon dro péskiro svénto patiaibén, mangénpe Devléske Sventoné Duhósa,

²¹rakhén pes dro Devléskiri láska, užakiren amaré Ráskiro — Devléskiro tangipén te del tuménge viéčno džiibén.

²²Tanginen manušén, savé kuninenape dro patiaibén,

²³ne zrakhen javirén darása, kiéli tumé léna te vytyrden len syr len sýrby jagatyr, ne ladžan (brydinen) léngire uribnastyr, savó isyn magirdó ločasa (plotiasa).

²⁴I kakaná Jekhéske, Léske, Kon moginéla te zrakhél tumen, sob (kaj) tumé te na perén dro grého, i kon moginéla te čhuvél tumen angíl Péskiri sláva bidošengirenca i dre bari rádyma,

²⁵Jekhéske Devléske, amaré Zrakhibnariske pir Xristosóste, amaré Ráske-Devléske te javél sláva, baripén, zoralypén i pravo adadyvés i pe saré viéki. Amín'.