Read Biblija - Pe Baltitko Romani čib (Romanes) 2019 Baltic Romani Bible Sykadyipén 15 Bible Online

Sykadyipén 15 - Biblija - Pe Baltitko Romani čib (Romanes) 2019 Baltic Romani Bible bible

Sykadyipén 15

¹I me dykhcjom javír bari i divno ĥiertýk (znamiénijo) pe bolybén: sys eftá Jangóly eftá (efte) palatuné fransenca, savénca Devléskiri xolý končyndiape.

²Tedy me dykhcjom vari-so sýrby stjoklýtko (balunaló) mórjo (derjáv), savó sys zmiešyndlo jagása. I sys terdé pe mórjo (derjáv) kodolé, savé lyné upralypén pe riskiribnáskire murdaléste, pe léskiri patrín (óbrazo) i léskire-laveskiro čyslo (gin). Jone rikirde Devléskire gusli.

³I jone baganas Mojzaskiri gilý, Devléskire pishariskiri, i Sventoné Bakroreskiri gilý, phení: “Save baré i dívna tyré butiá, Rajo Dévla, Sarezorjákiro! Tyré dromá isyn čačuné i čačipnaskire, Králi manušéngiro!

⁴Kon isyn odová, savo na daréla Tútyr, Rajo Dévla, I kon na slavinela Tyró Lav? Pal-dová so Tu san Jekh Svénto, pal-dová so saré manušá javéna, i jone pokloninenape patyvása angíl Túte pal-dová, so Tu čačunés pridžinesa manušén angíl bangipen!”

⁵I paló (poslie) saró davá me dykhcjom Svénto Šátra, dre Saví psiradiape Khangirí.

⁶I vyginé eftá Jangóly dalé Khangirjátyr, savénde sys eftá fránsy, i savé sys uridé dre žužé, parné, pohtanytka uribená i jone sys piriphandle ke kolýn suvnakuné kustykenca.

⁷I jekh štaré džidalendyr (žyvotnonendyr) dyjá eftá Jangolenge eftá suvnakuné kučika, so sys pherdé Devléskire xoliása, so javéla te dživél pe saré viéki.

⁸I Khangirí jaciá pherdý thuvesa Devléskire slavatyr i zoralypnastyr i nikonéske sys naštý te zadžál dre Khangirí, paka končynenape eftá fránsy Jangoléngire.