Read Biblija - Pe Baltitko Romani čib (Romanes) 2019 Baltic Romani Bible Sykadyipén 16 Bible Online

Sykadyipén 16 - Biblija - Pe Baltitko Romani čib (Romanes) 2019 Baltic Romani Bible bible

Sykadyipén 16

¹I me šundjom zoralý zan Khangirjátyr, saví phendiá eftá (efte) Jangolenge: “Džán i vyčhuven pe phuv eftá tahtáia (čašy) Devléskire xoliása.”

²I pérvo Jangólo vygijá i vyčhudiá péskiro tahtáj pe phuv: čoré i fuj fránsy (rány) jačné pe manušénde, pe savénde sys riskiribnáskire-murdaleskire (zvierjoskire) špery, i, savé poklonindlepe patyvása angíl léskiri patrín (óbrazo).

³I javír Jangólo vygijá i vyčhudiá péskiro tahtáj dro mórjo (derjáv): i paní kerdiápe sýrby mulé-manušéskiro rat i kažno džidó di (sozdyiben) myjá dro mórjo (derjáv).

⁴I tríto Jangólo vyčhudiá péskiro tahtáj dre réki (leniá) i paniengire ĥanyngorja: i jone kerdépe ratésa.

⁵I me šundjom Jangolós, savó rikirdia zor pe paní, phení: “Čačunó san Tu, Savó san i Savó sánas, Svénto san Tu, so Tu sendiakiresa adiáke”,

⁶Pal-dová so jone pročhude rat Tre sventonengire i prorokengiro, I paldavá Tu dyján lénge rat te p'jen, syr jone isyn mol davá.

⁷I me šundjom zan altarjostyr, so phendiá: “Čačó, Rajo Dévla, Sarezorjákiro Devél, čačuné i čačipnaskire isyn Tyré sendy!”

⁸I štárto Jangólo vyčhudiá péskiro tahtáj pe kham: i sys dynó khameske te xačkirel manušén jagása.

⁹I manušá sys xačkirdé baré xačkiribnasa i jone kaliakirenas Devléskiro lav, Savó rikirdia zor pe dalé fránsy. Ne jone na riskirdé péskiro džiibén grehéndyr ke Devél i na vyphendle sláva Léske.

¹⁰I pándžto Jangólo vyčhudiá péskiro tahtáj pe riskiribnáskire-murdaleskiro (zvierjoskiro) altárjo: i kalypén čhakirdia riskiribnáskire-murdaleskiro kralipén i manušá dandyrenas pes pal péskire čibá (čibjá) dukhendyr;

¹¹i jone kaliakirenas Bolybnáskire Devlés pal péskire dukhá i fránsy. Ne jone na riskirdé péskiro džiibén grehéndyr ke Devél doléstyr, so jone kerdé.

¹²I šóvto Jangólo vyčhudiá péskiro tahtáj dre bari reka (len') Jevfrato: reka (len') vyšutija, sob (kaj) te javél skedynó drom kral'jenge dolé rigátyr, kaj kham uštéla.

¹³I me dykhcjom trin beda dúhi, savé sys syr capnia (žamby). Jone džánas javrí móstyr drakonostyr, riskiribnáskire murdalestyr i xohané prorokostyr.

¹⁴I dalé benglane dúhi, so keréna ĥiertyká (znamiénii), džána angle ke králja pe davá saró svéto, kaj isyn manušá, sob (kaj) te kedenpe khetané maribnása pe Devléste Sarezorjakireste pe baró Dyvés.

¹⁵“Ake, me džáva syr čor. Bahtaló isyn odová, kon isyn nasuto i rakhéla péskiro uribén, sob (kaj) te na psirél nango i, sob (kaj) te na dykhél léskiri ladž!”

¹⁶I kadalé benglane dúhi kedyne khetané kral'jén pe štéto, so kharélape Judytkes “Armagiedono.”

¹⁷I eftáto Jangólo vyčhudiá péskiro tahtáj pe fáno (vozduho): zoralý zan javdiá tronostyr, savó sys dre Khangirí, saví phendiá: “Davá kerdiápe.”

¹⁸I sys bliskavícy, grómy i zaniá, i jaciá baró phuvjákiro trinskiriben, so na sys angíl dová, syr manúš lyjá te dživél pe phuv-dasavo zoraló sys phuvjákiro trinskiriben.

¹⁹I baró fóro rospyjape pe trin pašá, i fórja, kaj napatiaibnaskire, pyné. Devél ripirdia bari phuv Bari Vavilonija i dyjá láke te p'jel mol Léskire tahtastyr — mol (vino) Léskire xoliása, kiéli Jov drieván xoliasóla.

²⁰I kažno óstrovo (džip) xasijá, i bérgi na sys dyc'le.

²¹Baré-gradóskire ĥirilá, savé sys pašé pandždešá kilo pharipnasa, pyné bolybnástyr pe manušénde, savé kaliakirenas Devlés pal fránsy gradostyr, pal-dová so drieván darano sys davá fránso.