Read Biblija - Pe Baltitko Romani čib (Romanes) 2019 Baltic Romani Bible Sykadyipén 17 Bible Online

Sykadyipén 17 - Biblija - Pe Baltitko Romani čib (Romanes) 2019 Baltic Romani Bible bible

Sykadyipén 17

¹I vygijá jekh eftá (eftane) Jangolendyr, savéste sys eftá tahtaja, i rakirdiá mánca i phendiá: “Jav, me sykaváva túke syr barja rozmekne džuvliá javéna te sendinén, saví sys bešty pir but paniá,

²savjása králja pe phuv kerdé biladžaipén i manušá phuvjátyr matjonas moliátyr lákire biladžaipnastyr.”

³I Dúho (Fáno) lydžijá man pe čhučí phuv. I me dykhcjom džuvliá, saví sys bešty pe lolé-riskiribnáskire murdaléste. Davá murdál sys saró, sýrby sčhindlo lavénca, savé kaliakirenas Devlés. Léste sys eftá šeré i deš šyngá (rógi).

⁴I džuvlý sys uridy dro slivitko (khilavitko) i jarko loló than, so ziainelas suvnakása, kučoné barénca i mutinasa (žemčugosa). Joj rikirdia dro péskiro vast suvnakunó tahtái, savó sys pherdó džungalypnasa (brytkimasa) i nažužypnasa lákire biladžaipnastyr.

⁵I pe lákiro čekat sys čhindló lav, so značyndia čorahanés: “Bari Vavilonija — isyn daj rozmekne džuvlienge i kažnoné džungalypnaske pe phuv.”

⁶I me dykhcjom, so adáia džuvlý sys maty sventoné-manušéngire ratestyr i men'kengire-jakhitkonengire ratestyr, savén zamardé pal Xristosóste. I kiéli me dykhcjom la, me drieván divindjompe.

⁷I Jangólo phendiá mánge: “Sóske tu divinesape? Me phenáva túke kadalia-džuvliákiro i dalé-riskiribnáskire-murdaleskiro čorahanyben, savó lydžála la i savéste sys eftá šeré i deš šyngá (rógi).

⁸Riskiribnáskiro murdál, savés tu dykhcián, sys i butýr nane les, i jov vydžála liunostyr (adostyr) i džála pe xasiakiriben. I manušá, savé dživéna pe phuv, savengire lavá nane začhindlé dre džiibnáskiri lylvarí svetóskire anglypnástyr, javéna te divinenpe, syr dykhéna, so riskiribnáskiro murdál sys, i nane les, ne jov nevéstyr javéla.

⁹Vaš davá trej bari godý i godypén. Jefta šeré isyn eftá bérgi, pe savé džuvlý isyn bešty.

¹⁰Dalé eftá šeré adiáke-pac' isyn sýrby eftá králja, pandž králja pyné zorjátyr, jekh králi isyn, javír králi iščo (inké) na javdiá; kiéli jov javéla, tedy nábut časo léske te javél.

¹¹I riskiribnánskiro murdál, savó sys i savés butýr nane, isyn ohtóto (bidujéngiro déšto) králi, kon isyn jekh kadalé eftá (efte) kral'jendyr, i kon džála pe xasiakiriben.

¹²I deš šyngá, so tu dykhcián, davá isyn deš králja, savénde iščo (inké) nane kralipén, ne jone doreséna zor pe jekh mardó (štúnda), syr králja riskiribnáskire murdalesa.

¹³Kadalé deše kral'jénde isyn jekh mýslia, i jone piridena péskiri zor i pravo riskiribnáskire murdaléske.

¹⁴Jone javéna te marénpe proti Sventoné Bakroreste i Svénto Bakroró léla upralypén pe lénde, pal-dová so Jov isyn Králi Kral'jéndyr, Raj Devél rándyr, khetané péskire vykedyné i patiaibnytkone manušénca, savé isyn pašýl Léste.

¹⁵I Jangólo phendiá mánge: “Paniá, so tu dykhésa, pe savé rozmekny džuvlý isyn bešty, davá — manušýtka ródy, i manušýtka nácyi (narody), kherítka ródy (pliémi) i jekhé-čibákire irjá (jazyki).

¹⁶I deš šyngá, savé tu dykhcián pe riskiribnáskire murdaléste, javéna drieván te na sykavén patýv rozmekne džuvliáke: jone léna sarí zor látyr i mekéna la nangiasa i xána sarésa lákiri loč (plot') i xačkirena la jagása.

¹⁷Pal-dová so Devél dyjá léngire ilenge te kerén pir Léskiri godý, te kerén jekh zaduminyben i te den léngiro Kralipén riskiribnáskire murdaleske, paka spolninenape Devléskire lavá.

¹⁸I džuvlý, savjá tu dykhcián, isyn sýrby baró fóro, savó kralinela pe kral'jénde pe phuv.”