Read Biblija - Pe Baltitko Romani čib (Romanes) 2019 Baltic Romani Bible Sykadyipén 19 Bible Online

Sykadyipén 19 - Biblija - Pe Baltitko Romani čib (Romanes) 2019 Baltic Romani Bible bible

Sykadyipén 19

¹Paló davá me šundjom zan, sýrby buté-manušéngiro narodo (rása) bolybnástyr, saví phenelas: “Alliluia! Te javél zrakhibén i sláva, patýv i zor amaré Devléske.”

²Čačuné i čačipnaskire isyn Léskire sendy. Jov sendiakirdia barjá rozmekná džuvliá, saví kaliakirdia phuv péskire blendósa. Devél čhudiá xas' (kára) pale pe láte pal rat Léskire pishar'jengiro lákire vastéstyr.”

³I javír mólo jone phendlé: “Alliluia! Thuv, so ĥazdélape látyr, syr joj xačolas, javéla pe saré viéki.”

⁴Tedy biš te štar godephuré i štar džidalé (žyvotna) pyné i klonindlepe patyvása Devléske, Savó sys beštó pe trono i phenelas: “Amín'! Alliluia!”

⁵I zan tronostyr javdiá, phení: “Šarén amaré Devlés! Saré tumé-Léskire pishárja i tumé, baré i tykné, savé daréna Léstyr.”

⁶I me šundjom zan sýrby buté-manušéngire narodóstyr, sýrby buré-paniéngire šoliá (šumo), sýrby baré gromengiro, so phenenas: “Alliluia! Pal-dová so amaró Raj Devél, Sarezorjákiro kralinela!

⁷Javén te radynaspe i javása drieván ráda; barjakirasa Les slavása, pal-dová so javdiá Sventoné-Bakroreskiro bjav, i Léskiri džuvlý prigotovindia pes!”

⁸Láke sys dynó jarko, žužó visonytko than te ur'jel: “pal-dová so visonytko than sykavéla sventoné-Devléskire manušéngiro čačipén.”

⁹I Jangólo phendiá mánge: “Začhin: ‘Bahtalé isyn odolé, savén khardé pe Sventoné-Bakroréskiro bjav.’” I Jov iščo (inké) dophendia: “Ĥáda, isyn čačuné Devléskire lavá.”

¹⁰I me pyjom angíl léskire ĥerá te pokloninavpe patyvása léske. Ne jov phendiá mánge: “Dykh ža, ná ker davá. Me som dasavo-pac' pishári, syr tu san, i me som khetané tyré pšalénca te dosykavav pal Xristosóste. De patýv Devléske, pal-dová so dophenybén pal Xristosóste isyn Xristosóskiro lav.”

¹¹I me dykhcjom psirado (otphandlo) Bolybnáskiro Rajo i, ake, sys parnó graj. Pe léste sys beštó uklistó/é Kodová, Kon kharélape Čačunó i Patiaibnýtko, Savó sendiakiréla čačunés i marelape pal čačipén.

¹²Léskire jakh sys syr jagángiri čiborí i but diademy sys pe Léskiro šeró. Léste isyn začhindló titulo (lav), so nikón na džindiá apríč Léste,

¹³i Jov isyn uridó dro uribén, savó sys makhno ratésa. Léskiro titulo isyn “Devléskiro Lav.”

¹⁴I xaladé bolybnýtka džánas pal Léste, savé sys pe parné grénde i uridé dro parnó i žužó visonytko than.

¹⁵I Léskire móstyr džála javrí vostro (čolalý) kurtála i Jov javéla te muliakirél rasy (narody). Jov javéla te čaliakirel len sastruné destésa, i Jov javéla te štakirel moliákiro (vinoskiro) prieso baré xoliátyr, kiéli Sarezorjákiro Devél drieván xoliasóla.

¹⁶Pe Léskiro uribén i pe Léskiri statia (stjogny) sys začhindló titulo: “Králi kral'jéngiro, Raj rajéngiro.”

¹⁷I me dykhcjom javire Jangolós, savó sys terdó pe kham. Jov délas gódla zoralé zaniása saré čiriklenge, savé vurniana maškír fáno (vozduho) dro bolybén: “Javén, skedénpe pe bel'veliakiro xabén baré Devléskiro,

¹⁸sob (kaj) tuménge saštý te xan kral'jengire-trupengiro mas, i kapitanengire, i tysjoncengire-xaladéngire barydyrengire, i loč zoralé manušéngire, i grastanó mas i trupóskiro mas odoléngiro, savé isyn bešté pe grénde, i saré-manušéngiri trúpy: vol'none manušéngire i adiáke-pac' pishar'jengire, tyknengire i barengire.”

¹⁹I me dykhcjom riskiribnáskire murdales i kral'jén pe phuv léngire xaladybnenca, savé skedynépe pe maribén angíl Odoléste, Kon isyn beštó pe greste i angíl Léskiro xaladybén.

²⁰I riskiribnáskiro murdál sys lynó i khetané lésa xohanó proróko, savó kerdiá dívy angíl léste, savénca jov xohavelas manušén, savé doresné riskiribnáskire-murdaléskiro špéra syr klieimo i klonindlepe patyvása murdaléskire patriniáke (obrazóske). Jone sys čhurdyné džidenca dro ziero (oziero) jagása, so xačolas dzeveliasa (sierasa).

²¹A léngire javire manušén, savé jačnépe, zamardiá Odoleskiro, Savó sys beštó uklistó/é pe greste kurtalása; saví džálas javrí Léskire móstyr i saré čirikliá/é čalyne léngire trupendyr.