Read Biblija - Pe Baltitko Romani čib (Romanes) 2019 Baltic Romani Bible Sykadyipén 20 Bible Online

Sykadyipén 20 - Biblija - Pe Baltitko Romani čib (Romanes) 2019 Baltic Romani Bible bible

Sykadyipén 20

¹I me dykhcjom Jangolós, Savó džálas telé Bolybnástyr Rajostyr i Savéste sys klydýn liunostyr (adostyr), i sys bari zan'dír (cepo) dro Léskiro vast.

²Jov uhtyldia drakonos, phurané sapes, kon isyn nálačho ci satana i phandia les pe bar (tysjonco) berš;

³i Jangólo čhurdyjá les dro liúno i phandia les pe čergenorí (piečat') pe léste, sob (kaj) jov butýr te na xohavél manušén paka končynelape tysjonco (bar) berš. Paló davá jov javéla otphandlo pe nabaró časo.

⁴I me dykhcjom trony i odolén, savé bešenas pal skamínd, savénge sys dynó te sendiakiren. I me dykhcjom dijá odolengire, konéske čingirde šeré, paldová so jone dophenenas pal Xristosóste i pal Devléskiro lav. Jone na klonindlepe patyvása angíl riskiribnáskire murdaléste ci angíl léskiri patrín (óbrazo), jone na prilyné klieimoskiri špéra pe čekát ci pe léngiro vast. I jone otdžidyne i kralindle Xristosósa bar berš.

⁵Javír dijá muléndyr na otdžidyne, paka bar berš končynelape. Davá isyn pérvo otdžidyipen meribnástyr.

⁶Bahtalé i svénta isyn odolé, savénge javéla štéto dro pérvo otdžidyipen meribnástyr. Javír meribén na javéla te rikirél zor pe lénde, a jone javéna rašaja Devléske i Xristosóske, i jone javéna te kralinen Lésa bar berš.

⁷I kiéli bar (tysjonco) berš končynelape, tedy satanas (nalačhés) otphandena léskire štaribnastyr,

⁸i jov džála angíl te xohavél manušýtka nácyi (narody), savé isyn pe štar phuvjákire véngly, Goga i Magoga. Nálačho javéla te kedel khetané len pe maribén, léngiro kicypen (količestvo) javéla baró-syr morjoskiro (derjavéskiro) práho.

⁹I jag pyjá bolybnástyr i xaja len. I jone giné sarésa pir phuvjákiro buĥlypén i oblyne sventoné Devléskiro fóro, so sys drógo Devléske.

¹⁰I nálačho, kon xohadia len, sys čhurdynó dro ziero (oziero) jagása i dzeveliása (sierasa), kaj sys adiáke-pac' riskiribnáskiro murdál i xohané proróki. I jone javéna te menčynenpe ratý i dyvesé pe saré viéki.

¹¹I me dykhcjom baró parnó trono i Jekhés, Kon sys beštó pe léste. Phuv i bolybén našenas krig Léskire móstyr i štéto na sys lathno lénge.

¹²I me dykhcjom mulen, baren i ternen, savé sys terdé angíl trono i lylvaria svitkostyr sys otphandle. Javír lylvarí sys otphandly, saví sys džiibnáskiri lylvarí, i mulé sys sendindle pir dová, so jone kerdé pal péskiro džiibén, i so sys začhindló dre lylvaria.

¹³I mórjo (derjáv) otdyjá péskire mulen, so sys dre léste. Meribnaskiro štéto i liúno (ado), so isyn tel phuv, dyné pale péskre mulen, savé sys dre lénde. Len sendindle so jekhés pir dová, so jone kerdé.

¹⁴Meribnaskiro štéto i liúno (ado) sys čhurdyné dro ziero jagása. Davá isyn javír meribén-ziero jagása.

¹⁵I kóli vari-kon na sys lathno dre džiibnaskri lylvarí, jov sys čhurdynó dro ziero (oziero) jagása.