Read Biblija - Pe Baltitko Romani čib (Romanes) 2019 Baltic Romani Bible Sykadyipén 21 Bible Online

Sykadyipén 21 - Biblija - Pe Baltitko Romani čib (Romanes) 2019 Baltic Romani Bible bible

Sykadyipén 21

¹I me dykhcjom nevó bolybén i neví phuv. Pérvo bolybén i pérvo phuv xasiné i mórjo (derjáv) butýr nane.

²I me, Iáno, dykhcjom Svénto Fóro, nevó Jerusalimo, savó džálas telé Devléstyr bolybnástyr. Fóro sys skedynó i šukar uridó sýrby terný vaš lákire roméske.

³I me šundjom zoralý zan tronostyr, so phendiá: “Ake, isyn Devléskiri šátra khetané manušénca! Jov javéla te dživél lénca, i jone javéna Léskire manušá. Kokoró Devél javéla lénca i Jov javéla léngiro Devél.

⁴I Devél vykhosela kažno jasvin léngire jakhéndyr. Meribén butýr na javéla, ni túga, ni roibén, ni dukh. Pal-dová so saró, so sys angíl, xasijá.”

⁵I, Kodová, Kon sys beštó pe trono, phendiá: “Ake, me keráva saró nevó.” I adiáke-pac' phenéla mánge: “Začhin, pal-dová so kadalé lavá isyn čačuné i patiaibnytka.”

⁶I Jov phendiá mánge: “Kerdiápe ke kónco (jagóro) (spolnindiape). Me som Al'fa i Omiega, Anglypén i Kónco (Jagóro). Odoléske, konéste isyn smega (žažda), Me dáva te p'jel džiibnáskire-panjóskire ĥanyngorjatyr bi lovengiro.

⁷Odová, kon léla upralypén, priléla davá meknó mištypén Mándyr: Me javáva léske Devél, i jov javéla Miro Čhavó.

⁸A darandúki, napatiaibnáskire, magirdé dro vari-so, zamaribnárja; odolé, kon kerdiá biladžaipén, čovahané, kon klonindiape patyvása (kerde šerésa) idolénge, xohaibnárja-léngiri paš javéla khetané dro ziero (oziero), so xačola jagása i dzeveliása (sierasa); davá isyn-javír meribén.”

⁹I ĥáda, jekh eftá (efte) Jangoléndyr, savénde sys eftá tahtaja (čašy), so sys pherdé eftá palatuné fransénca, podgíia ke, me i phendiá: “Jav! Me sykaváva túke terniá Sventoné-Bakroréskirja romniá!”

¹⁰Me sómas dro dúho (fáno) i Jangólo ĥazdyjá man pe bari i vučí bérga i sykadiá mánge svénto fóro, Jerusalimo, so džálas telé bolybnástyr, Devléstyr.

¹¹Davá fóro ziaindia Devléskire jarkoné slavása. Léskiro dud, savo ziaindia, sys sýrby drieván kuč bar, so ziainela, syr bar jaspiso, dyc'lo syr kristalo.

¹²Dro davá fóro sys bari i vučí vánta dešudujé portenca (vratenca) i dešudúj Jangóly sys pašýl dalé pórty, a pe dalé pórty sys začhindlé dešudúj lavá, so isyn dešudúj títuly-dešudujé Izrailjoskire rodéndyr.

¹³Pe čačí rig sys trin pórty, trin pórty pe západno paš-ratítko (sievierno) rig, trin pórty pe paš-dyvesýtko (južno) rig, trin pórty pe pal-panitko (západno) rig.

¹⁴Foróskiro týno rikirdiape pe dešudúj telatuné bará, pe savé sys dešudúj lavá Sventoné-Bakroréskire Apostoléndyr.

¹⁵I Jangoloste, savó rakirdiá mánca, sys suvnakunó destó te mierinel fóro, pórta (vráty), léskiro tyno (vánta).

¹⁶I fóro sys syr kvadrato: léskiro dlengipén sys dasavo-pac' syr buĥlypén. I Jangólo zmierindia fóro destesa: duj bará štar šelá kilomietry (versty), dlengipén, i buĥlypén, i vučipén isyn dasavé-pac'.

¹⁷I jov mierindia foróskiri bar: šovdešá metry štar šelá pir manušéngiri miéra, davá isyn i Jangoloskiri miéra.

¹⁸Foroskiri vánta (bar) sys kerdy jaspisostyr, a fóro sys žužé suvnakástyr syr žužó stjoklo (balún).

¹⁹I telatuné bará, pe savé sys foróskiri vánta, sys gožakirde kažnoné kuč barénca: pérvo telatuno bar sys jaspisostyr, javír — sapfirostyr, tríto — xalkidonostyr, štárto — zumrudostyr;

²⁰pándžto — sardoniksostyr, šóvto — sardisostyr, eftáto-xrizolitostyr, ohtóto — birilostyr, jeniáto — topazostyr, déšto — xristoprazostyr, dešupervo — giacyntostyr, dešudujto — amietistostyr.

²¹I dešudúj pórty sys kerdé dešudujé mutinéndyr (žemčugendyr), kažno pórta jekhe mutinatyr. Foróskire vulícy (gásy) sys žužé suvnakástyr syr prozračno stjoklo (balun).

²²Ne me na dykhcjom Khangirí dro davá fóro, pal-dová, so Raj Devél, Sarezorjákiro, i Svénto Bakroró Kokoró isyn daja Khangirí.

²³Foroske na trej ni kham, ni čhon te del dud (svéto), sob (kaj) te ziainel dro léste. Devléskiri jarko sláva ziainela dudésa dro fóro i Bakroró isyn sýrby momolýtko (svietíl'niko).

²⁴I manušýtka narody javéna te psirén foróskire dudéstyr, a králja pe phuv janéna péskiro mištypén.

²⁵I foróskiri pórta na zaphandélape ni dyvesé, pal-dová so rat na javéla odój.

²⁶I manušýtka rasy (narody) janéna dro fóro sláva i patýv.

²⁷Ni savó magirdó, i kodová, kon keréla džungalypén (brytkima) i xohavela naštý te zadžál dro davá fóro, a jekh odová, kon isyn začhindló dre džiibnáskiri lylvarí Bakroreste.