Read Biblija - Pe Baltitko Romani čib (Romanes) 2019 Baltic Romani Bible Sykadyipén 22 Bible Online

Sykadyipén 22 - Biblija - Pe Baltitko Romani čib (Romanes) 2019 Baltic Romani Bible bible

Sykadyipén 22

¹I Jangólo sykadiá mánge reka (len') džiibnáskire paniésa, saví sys žužy, syr kristalo. Joj thadelas Devléskire i Bakroréskire tronóstyr.

²Maškir foróskiri ĥasa (vulíca), pe jekh i pe javír rekakiri (leniakiri) rig sys džiibnáskiro kašt (drévo), so délas dešudúj barjakirdé (plódy), kažno čhon péskiro barjakirdó. I kaštéskire patriá (listy) sys te sastiakiren manušýtka nácyi (narody).

³I butýr na javéla nisó prokošnó. I Devléskiro i Sventoné-Bakroreskiro trono javéna dro davá fóro i Léskire pishárja javéna te dynarinén Léske,

⁴i jone javéna te dykhén Léskiro muj. I Léskiro titulo javéla pe léngire čekata.

⁵I rat na javéla butýr i lénge na javéla trej lampakiro dud (svéto) i dud khamestyr, pal-dová so Raj Devél javéla te del lénge dud. I jone javéna te kralinen pe saré viéki.

⁶I Jangólo phendiá mánge: “Kadalé lavá isyn patiaibnytka i čačuné. I Raj Devél, Kon délas dúho (fáno) prorokenge [sventoné-r.s.], bičhadiá Léskire Jangolós te sykavél Léskire pishar'jénge dová, so trej te javél syg.

⁷I, ake, Me javáva syges”, — rakiréla Xristóso. “Bahtaló isyn kodová, kon rakhéla proročytka lavá lylvarjakire phenybnastyr pal dová, so javéla angíl.”

⁸Me som, Iáno, savó dykhciá i šundiá kadavá. I kiéli me šundjom i dykhcjom, tedy me pyjom mósa te pokloninavpe patyvása angíl Jangoloskire ĥerá, Savó sykavelas mánge saré dalé réndy.

⁹Ne jov phendiá mánge: “Dykh! Na ker davá! Me som dasavo-pac' pishári, syr tu san. Me adiáke-pac' som pishári, syr i tyré pšála, proróki, savé rakhena lavá dalé lylvarjakire svitkostyr: “Ker šerésa (kloninpe) patyvása Devléske!”

¹⁰I jov phendiá mánge: “Ná čhuv čergenorí pe lavá phenybnastyr pal dová, so javéla angíl (so isyn dro lylvarjakiro svítko), pal-dová so časo isyn pašýl.

¹¹Mek načačuno duredýr te kerél načačipén, mek ladžakirdó ke magiriben duredýr te kerél ladžaipén. Mek čačunó duredýr te kerél čačipén; mek svénto duredýr te javél Sventonesa.”

¹²“Ake, Me javáva sýges (rakiréla Xristóso), — sob (kaj) Me te otdav pale kažnonéske pir dová, so jov kerdiá.

¹³Me som Al'fa i Omiega, Pérvo i Palatunó, Anglypén i Kónco (Jagóro).

¹⁴Bahtalé isyn odolé, savé rikirenape ke Léskire priphenybená, sob (kaj) lénde te javél pravo ke džiibnáskiro kašt (drévo), i sob (kaj) te zadžál dro fóro pir pórta.

¹⁵A javrí pal fóro isyn džukela, čovahane, i kon dživdiá džuvliénca syr romniása bi sevlakiro, zamaribnarja, i kon mangdiápe idolénge, i saré javír, konéske davá sys pir iló te rakirél xohaibén.

¹⁶Me som, Isúso, bičhadjom Miré Jangolós te dophenav tuménge davá pir khangirja. Me som Davidóskire ratestyr i léskire-čhavéngiro čhavó, jarko Zlokoskiri Čergen.”

¹⁷Dúho (Fáno) i terný phenéna: “Jav!” I mek o odová, kon šunéla, te phenél: “Jav!” I mek odová, konéste isyn sméga, te p'jel džiibnáskiro paní bi lovengiro.

¹⁸Me dophenava kažnonéske, kon šunéla lavá dalé lylvarjakire phenybnastyr pal dová, so javéla angíl, so isyn dro svítko te rakhelpe: kóli vari-kon phenéla lišnima ke davá phenybén, so javéla angíl, tedy Devél bičhavéla fránsy pe kodoleste, pal so isyn čhindló dro davá lylvarjakiro svítko.

¹⁹I kóli vari-kon otlela vari-so dalé lylvarjákire phenybnástyr, so javéla angíl, tedy Devél otlela léskiro štéto džiibnáskire kaštéstyr (drevostyr) dro svénto fóro, pal so isyn čhindló dro davá lylvarjákiro svítko.

²⁰Odová, Kon dophenéla saró kadavá, rakiréla: “Čačó. Me javáva syg.” Amín'. Jav, Rajo Dévla, Isúso.

²¹Mek bahtalypén Ráskire-Devléskire, Isusóskiro Xristosóskiro te javél tuménca.