Read Biblija - Pe Baltitko Romani čib (Romanes) 2019 Baltic Romani Bible Sykadyipén 3 Bible Online

Sykadyipén 3 - Biblija - Pe Baltitko Romani čib (Romanes) 2019 Baltic Romani Bible bible

Sykadyipén 3

¹I čhin Jangoloske Sardisoskire khangirjátyr: “Davá rakiréla Odová, Konéste isyn eftá Devléskire dúhi i eftá čergeniá: “Me džinóm (džináv) tyrí butý, i so manušá den godý péske (duminéna), so tu san džidó, ne tu san muló.

²Rakhpe i zoraliakir dová, so jaciápe túte i so meréla syg, pal-dová so Me na lathjom, sob (kaj) tyrí butý te javél pherdý angíl Miré Devléskire jakhá.

³Paldavá priripir dová, so tu sykliakirdian, so tu šundián, rakh dáva i rískir péskiro džiibén ke Devél. Kóli tu na javésa te rakhespe, tedy Me javáva pe túte syr čor, i tu na javésa te džinés, kiéli me javáva.

⁴Ne isyn nábut manušá túte dro Sardiso, savé na meliakirde péskire uribená grehénca, i jone javéna te psirén Mánca dre parné uribená, pal-dová so jone isyn lačhé.

⁵Kon léla upralypén, odová ur'jela parné rizy, i Me na khosava krig léskiro lav džiibnytkone lylvarjatyr (knigatyr), i me priĥaljovava léskiro lav angíl miré Dadéste i angíl Léskire Jangolende,

⁶Konéste isyn kaná, mek jov te šunél, so Dúho (Fáno) rakiréla khangir'jénge!”

⁷I čhin Jangoloske Filadel'fijakire khangirjátyr: “Davá rakiréla Odová, Kon isyn Svénto, Čačunó. Léste isyn Davidóskiro klydyn i Jov psiravela (otphandela) vudár, i nikón na phandela, i kiéli Jov phandela, nijékh na psiravela.

⁸Me džinóm tyrí butý. Dykh: Me čhudjom angíl túte psirado vudár i nikonéske naštý te phandel davá vudár. Túte isyn nábut zor, i tu zrakhcián Miro lav i tu na otphendianpe Mándyr.

⁹Ake, me dáva túke odolén, savé isyn nalačheskire skedyibnástyr, savé rakiréna, so jone isyn Judy, a davá nane čačipén, jone isyn xohaibnarja; ĥáda, Me keráva adiáke, sob (kaj) jone te den “paklono” patyvása angíl tyré ĥerá, te džinén, so Mánge jacián tu drógo.

¹⁰Paldavá so tu rakhcian lav te vyrikires, to i Me adiáke-pac' rakhava tut mardestyr (štundatyr), kiéli javéna te propatiakiren saró svéto, sob (kaj) te propatiakiren kažnoné manušés, kon dživéla pe phuv.

¹¹Dykh, Me sýges javáva. Rikir, so isyn túte, sob (kaj) vari-kon te na lel tútyr tyrí viánka (koróna), kiéli tu lyjan upralypén.

¹²Kon léla upralypén, kodolestyr Me keráva važno stýlbo dre Miré-Devléskiri Khangirí, i jov butýr na vydžála javrí. I Me čhináva pe davá stýlbo Miré Devléskiro lav, i Miré-Devléskire foróskiro lav “Nevó Jerusalimo.” Davá nevó Jerusalimo javéla te džal telé Bolybnáskire Rajostyr, Miré Devléstyr. I Me čhináva pe léste Miro nevó lav.

¹³Konéste isyn kaná, mek jov te šunél, so Dúho (Fáno) rakiréla khangir'jénge.”

¹⁴I čhin Jangoloske Laodikijakire khangirjátyr: “Davá rakiréla “Amín'”, patiaibnýtko i čačunó Jakhítko, Savó isyn anglypén sareske, sóstyr Devél sozdyjá svéto:

¹⁵Me džinóm (džináv) tyrí butý, so tu na san šylalo, i so tu na san xačkirdo. Fedýr javélas, sob (kaj) tu te javes xačkirdo ci šylalo.

¹⁶Paldavá so tu san tato, a tu na san šylalo ci xačkirdo, me čungardava tut Miré móstyr.

¹⁷Pal-dová so tu rakirésa: ‘Me som barvaló i me barvalyjom i mánge na trej ničý, ne tu na džinésa, so tu san bedo i bibahtaló; čororó, kororó i nango;’

¹⁸paldavá me podphenava túke te kines suvnakáj Mándyr, savó sys probindlo jagása. Kin adiáke-pac' parny ídia te ur'jespe, sob (kaj) te sykaves ladž péskire nangipnaskiri; i pomakh péskire jakhá jakhitkone makhluniasa (maziasa), sob (kaj) te dykhés.

¹⁹Sarénge, kon isyn drógo Mánge, Me phenáva zorjása léngiri bang i sykliakirava len ke dukhá. Paldavá jav xačkirdé ilésa ke Devél i rískir péskiro džiibén ke Jov.

²⁰Dykh! Me som terdó pašýl vudár i marava dre léste; kóli vari-kon šunéla Mirí zan i psiravela (otphandela) vudár, tedy Me zadžava andré ke jov i javáva te xav bel'veliakiro xabén lésa i jov Mánca.

²¹Odolés, kon léla upralypén, Me bešliakirava les te bešél Mánca pe trono, syr i Me, kiéli Me lyjom upralypén i bescjom Miré Dadésa pe Léskiro trono.

²²Konéste isyn kaná, mek jov te šunél, so Dúho (Fáno) rakiréla khangir'jénge.”