Read Biblija - Pe Baltitko Romani čib (Romanes) 2019 Baltic Romani Bible Sykadyipén 5 Bible Online

Sykadyipén 5 - Biblija - Pe Baltitko Romani čib (Romanes) 2019 Baltic Romani Bible bible

Sykadyipén 5

¹I Me dykhcjom skrencyndlo svítko dro čačó (pravo) vast Odoléste, Kon sys beštó pe trono, dre savó sys začhinybena javrí i andré. Jov sys zaphandlo pe eftá čergenorja (piečati).

²I me dykhcjom zoralé Jangolós, savó phenelas angíl sarénde zoralé zaniása: “Kon isyn mol te otphandel lylvarí i te phagirel čergenorja?”

³I na sys nikón ni dro Bolybnáskiro Rajo, ni pe phuv, ci tel phuv, konéske sys mol te otphandel svítko i te dykhél andré dre léste.

⁴I me rondjom kirkes but, so na sys nikón, savó sys mol te otphandel svítko i te dykhél andré dre láte.

⁵I jekh godephurendyr phendiá mánge: “Na rov! Dykh! O Ščer (Liévo) Judáskire rodóstyr, Davidóskire ratestyr, seménca, lyjá upralypén, sob (kaj)/jov te del ráda te otphandel svítko i léskire eftá čergenorja.”

⁶I me dykhcjom Sventoné Bakrores, Savó sys sýrby nagara začhindló maškír trono i štar džidalende i godephurende. Sventoné Bakroreste sys eftá šyngá (rógi) i eftá jakhá, savé isyn eftá Devléskire Dúhi i sys bičhadé pir sarí phuv.

⁷Svénto Bakroró podgíia i lyjá svítko čačé vastéstyr Odoléstyr, Kon sys beštó pe trono.

⁸I kiéli Jov lyjá svítko, štar džidale (žyvotna) i biš te štar godephuré pyné pe čangá angíl Sventoné Bakroreste. Kažnonéste léndyr sys gusli i suvnakuné tahtaja (čašy), savé sys pherdé fimiamosa drogoné-smolakire thuvipnasa (fimiamosa), so isyn patierja (molitvy), kiéli svénta mangénape Devléske.

⁹I jone bagandle neví gilý, phení: “Tu san mol te priles kadavá svítko i te otphandes čergenorja (piečati), pal-dová so Tu sánas začhindló i Tu vykindian manušén vaš Devléske Péskire ratésa kažnoné jekhé-čibákire irjátyr (sem'iátyr) i kažnoné rodycóstyr, i manušytkoné nacyjátyr i kheritkoné rodóstyr.

¹⁰I Tu kerdián léndyr rašángiro Kralipén, savé javéna te kralinen pe phuv.”

¹¹I nevéstyr me dykhcjom i šundjom zaniá buté-Jangoléngire, savé sys miliony pašýl trono i štaré džidalende i biš te štar godephurende,

¹²i jone rakirdé zoralé zaniása: “Svénto Bakroró isyn mol, Savó sys muliakirdo te prilel zoralypén i barvalypén i zor, i patýv, i sláva i manušéngiro šaribén.”

¹³I me šundjom, syr kažno džidalo, savés Devél sozdyjá, savó isyn dro Bolybnáskiro Rajo, pe phuv i tel phuv, i pe mórjo (derjáv), i saró, isyn andrál dre lénde, phenenas: “Odoléske, Savó isyn pe trono, i Sventoné Bakroreske, mek te javél šaribén, i patýv, i sláva i zoralypén pe viečna viéki.”

¹⁴I štar džidale (žyvotna), savén Devél sozdyjá, phendlé: “Amín'!” I godephuré pyné pe čangá i poklonindlepe patyvása.