Read Biblija - Pe Baltitko Romani čib (Romanes) 2019 Baltic Romani Bible Sykadyipén 6 Bible Online

Sykadyipén 6 - Biblija - Pe Baltitko Romani čib (Romanes) 2019 Baltic Romani Bible bible

Sykadyipén 6

¹I me dykhcjom, kiéli Svénto Bakroró otphandia pérvo čergenorí eftá (eftane) čergenor'jendyr i me šundjom syr jekh štaré džidalendyr phendiá dasavé zaniása syr gromo: “Jav i dykh!”

²I me dykhcjom, i, ake, parnó graj. I kon sys uklisto pe léste, rikirdia lúko i viánka (koróna) sys dyný léske. Jov tradelas javrí, syr kodová, kon léla upralypén, sob (kaj) te lel upralypén.

³I kiéli Svénto Bakroró otphandia javír čergenorí, me šundjom, syr javír džidalo phendiá: “Jav i dykh!”

⁴I vygijá javír graj, loló. Kodoléske, kon sys beštó uklistó/é, sys dyný zor te lel ramánjo (miro) phuvjátyr, sob (kaj) manušá te muliakirén jekh jekhés i sys dyný léske bari kurtála (sablia).

⁵I kiéli Svénto Bakroró otphandia tríto čergenorí, me šundjom, syr tríto džidalo phendiá: “Jav i dykh!” I me dykhcjom, ake, kalé gres i jekhés, kon sys beštó uklistó/é pe léste, savéste sys ubladýtka (viesy) dre vast.

⁶I me šundjom zan štaré džidalendyr, so phendiá: “Litra parnó giv pal dynarijo i trin litry ĥersto (jačmienjo) pal dinarijo. I na xasiakir olivítko dzet (jeliejo) i mol.

⁷I kiéli Svénto Bakroró otphandia štárto čergenorí, me šundjom, syr štárto džidalo phendiá: “Jav i dykh!”

⁸I me dykhcjom: Ake! Syvo graj i odová, kon sys beštó uklistó/é ne léste, kharélaspe meribén, i liúno (ado) gijá pal léste. Lénge sys dyný zor pe štárto phuvjákiri paš te muliakirén kurtalása i bokhasa, meribnasa i riskiribnáskire murdalénca, savé isyn pe phuv.

⁹I kiéli Svénto Bakroró otphandia pándžto čergenorí, me dykhcjom tel altárjo manušéngire dijá, savé sys muliakirdé pal Devléskiro lav i pal dová, so jone patiaibnytkes dophenenas pal Xristosóste;

¹⁰i jone dénas gódla zoralé zaniása: “Rajo, Svénto i Čačunó! Ci but aménge te užakiras, paka Tu javésa te sendiakires i te čhuvés kára pal amaró rat pe manušénde pir phuv?”

¹¹Kažnonéske léndyr sys dynó parnó uribén i sys phendló lénge, sob (kaj) jone iščo (inké) nábut te otkhinjon, paka léngire malá (drúgi) pir butý i léngire pšála javéna muliakirdé, syr i jone, sob (kaj) te javél pherdó kicypen (količestvo).

¹²I kiéli me dykhcjom, syr Svénto Bakroró otphandia šóvto čergenorí, tedy jaciá phuvjákiro trinskiriben, i kham jaciá kaló syr gonó balendyr, i čhon jaciá loló syr rat;

¹³i bolybnáskire čergeniá pyné telé pe phuv syr inžyritko kašt čhurdéla telé naspiala barjakirdé (plódy), kiéli bari balvál trinskirela len.

¹⁴I bolybén xasijá, rozgijápe syr skrencyndlo svítko, kažno bérga i óstrovo (džip) khardepe (dvigindlepe) krig péskire šteténdyr.

¹⁵I králja phuvjákire, i baré raja, i tysjoncengire-xaladéngire barydyrá, barvaliuki, i zoralé manušá, i kažno pishári, i kažno vól'no manúš ĥaradyne dre ĥiebará (pieščery) i maškír bergitka štéty,

¹⁶i jone rakirénas bergenge i skalenge: “Peren pe aménde i garaven amen jakhéndyr Odoléstyr, Savó isyn beštó pe trono, i Sventoné Bakroreskire xoliátyr,

¹⁷pal-dová so javdiá važno dyvés vaš Léskiri xolý i konéske isyn pir zor te terdjol murškanés angíl davá?”