Read Biblija - Pe Baltitko Romani čib (Romanes) 2019 Baltic Romani Bible Sykadyipén 7 Bible Online

Sykadyipén 7 - Biblija - Pe Baltitko Romani čib (Romanes) 2019 Baltic Romani Bible bible

Sykadyipén 7

¹Paló davá me dykhcjom štaré Jangolen, Save sys terdé pe štar véngly pe phuv i rikirenas štar balvalia, sob (kaj) te na phurdel ni saví balvál ni pir phuv, ni pir mórjo (derjáv), ni pir vari-savó kašt (drévo).

²I me dykhcjom javire Jangolós, Savó džálas dolé rigátyr, kaj kham uštéla i savéste sys Džidé-Devléskiri čergenorí. Jov dyjá gódla zoralé zaniása štaré Jangolenge, konéske Devél dyjá zor te kerél čoripén pe phuv i pe mórjo (derjáv) i phendiá:

³“Na kerén čoripén ni pe phuv, ni pe mórjo (derjáv), angíl dová, syr ame čhuvasa čergenorí pe čekat pishar'jénge Amaré Devléskire.”

⁴I me šundjom odolengire-manušéngiro kicypen (količestvo), konéske čhudé čergenorí: 144000 manušá, savé sys saré Izrailjoskire-čhavéngire rodendyr (čangéndyr):

⁵12 tysjoncy Judáskire rodóstyr, 12 tysjoncy Ruvimóskire rodóstyr, 12 tysjoncy Gadóskire rodóstyr (čangéndyr);

⁶12 tysjoncy Asiroskire rodóstyr, 12 tysjoncy Niefalimoskire rodóstyr, 12 tysjoncy Manasijakire rodóstyr;

⁷12 tysjoncy Simjoonoskire (Siemjonoskire) rodóstyr, 12 tysjoncy Lievijoskire rodóstyr, 12 tysjoncy Izaharoskire rodóstyr;

⁸12 tysjoncy Zavulonoskire rodóstyr, 12 tysjoncy Jozáskire (Iosifóskire) rodóstyr, 12 tysjoncy Vieniaminóskire rodóstyr.

⁹Paló davá saró me dykhcjom, i, ĥáda, isyn but but manušá, so nikonéske na sys pir zor te ginel len, saré kheritkoné rodendyr, saré rodendyr, saré manušytkoné nacyiéndyr, saré jekhe-čibakire ir'jéndyr (sem'iéndyr/čibéndyr/čib'jéndyr), savé sys terdé angíl trono i angíl Sventoné Bakroreste. Jone sys uridé dre parné uribená, i dre vastá sys lénde pal'mitka randiá (vétki).

¹⁰I jone dénas gódla zoralé zaniása i phenenas: “Zrakhibén javéla amaré Devléstyr, Savó isyn beštó pe trono i Sventoné Bakrorestyr.”

¹¹I saré Jangóly, so sys terdé trusciál trono, i godephuré i štar džidalé (žyvotna) pyné péskire mujénca angíl trono i poklonindlepe patyvása (kerdé šerésa) Devléske,

¹²i phenenas: “Amín'! Mek manušéngiro šaribén, i sláva, i godypén, i parikiriben, i patýv, i zoralypén, i zor te javél amaré Devléske pe saré viéki. Amín'.”

¹³Jekh godephurendyr otphendiá mánge, phení: “Kon isyn kadalé manušá, savénde isyn parné uribená, katýr jone isyn?”

¹⁴I me phendjom léske: “Rajo Miro, Tu ž džinésa.” I jov phendiá mánge: “Davá isyn kodolé manušá, so javné baré stradicostyr (bidatyr), vymorde péskire uribená i parniakirde len Sventoné Bakroreskire ratésa.

¹⁵Vaš davá jone isyn angíl Devléskiro trono i dynarinénas (služynénas) Léske dyvesé i ratý dre Léskiri Khangirí. Odová, Kon isyn beštó pe trono, rosčhuvela péskiri šátra pe lénde sýrby zrakhéla len.

¹⁶Jone na javéna butýr te bokhaljon, na javéna te tyrdenpe te p'jen: kham i vari-savó xačkiribén na peréla pe lénde;

¹⁷syr Svénto Bakroró, Savó isyn maškirál trono, javéla te čaliakirel len i te lydžál ke ĥanyngorja džidé-panieskire. I Devél vykhosela kažno jasvin léngire jakhéndyr.”