Read Biblija - Pe Baltitko Romani čib (Romanes) 2019 Baltic Romani Bible Sykadyipén 9 Bible Online

Sykadyipén 9 - Biblija - Pe Baltitko Romani čib (Romanes) 2019 Baltic Romani Bible bible

Sykadyipén 9

¹I pándžto Jangólo phurdyja dre péskiro rógo; i me dykhcjom čergen, so pyjá bolybnástyr pe phuv, i láke sys dynó klydyn liunoskire ganyngatyr (bieznatyr).

²I čergen psiradia (otphandia) liunoskiri ĥanýng i thuv (dymo) vygijá ĥanyngatyr, syr thuv baré bovestyr: kham i fáno (vozduho) kalyne ĥanyngakire thuvestyr.

³I phakitka skočki (saranča) vyginé pe phuv thuvestyr i sys dyný lénge zor, saví isyn phuvitkone skorpionende.

⁴Lénge sys phendló te na kerén čoripén ni phuvitkone čarjake, ni savé zelene raslinake, ni savé kašteske (drevoske), a jekh manušénge, savénde na sys Devléskiro távro pe léngire čekata:

⁵i phakitkone skočkenge sys dynó te na muliakirén len, a te menčynen manušén pandž čhoná; i léngiri men'ka sys syr skorpiono menčynela, kiéli dukhavela manušés.

⁶I dre dolé dyvesá manušá javéna te rodén meribén, ne jone na lathéna; jone javéna te mangén, sob (kaj) te merén, ne meribén našela léndyr.

⁷Kadalé phakitka skočki (saranča) sys syr graja, savé kedynepe pe meribén; i pe léngire šeré sys vianki (korony) sýrby suvnakástyr, i léngire muiá sys sýrby muiá manušýtka.

⁸I léngire balá sys sýrby balá džuvlikané, i léngire dandá sys sýrby ščerende (lievende),

⁹i sys lénde sastruné kolyna syr sastruné pancyri, i lopotymo léngire phakendyr sys syr lopotymo ĥaratuné vurdenendyr, kiéli graja prastána pe meribén;

¹⁰i sys lénde porja syr skorpionengire žaly i dre kadalé porja sys zor te dukhaven manušén pe pandž čhoná.

¹¹Liunoskiro (Adoskiro) Jangólo sys králi pe lénde. Léskiro lav pir Judýtko čib sys “Abaddon”, a grekítkes (balamítkes) “Appolion.”

¹²Pérvo bída gijá krig, ake, iščo (inké) duj bidy, so džána pal pervonate.

¹³I šóvto Jangólo phurdyja dre péskiro rógo i me šundjom zan štartone venglendyr suvnakuné altarjostyr, so sys angíl Devléste,

¹⁴ĥáda, zan phenelas šovtone Jangoloske, savéste sys rógo: “Rosphande štaré Jangolen, savé isyn phandle pašýl reka (len') Jevfrato.”

¹⁵I štar Jangóly sys rosphandle, savé sys skedyné vaš štúnda i dyvés, i čhon, i berš te muliakirén tríto paš manušéndyr;

¹⁶i sys duj miliony xaladén pe grénde i me šundjom léngiro kicypen (količestvo).

¹⁷I, ĥáda, me dykhcjom gren sýrby dre suné i odolén, savé sys bešté uklisté pe lénde; lénde sys sastruné pancyri, lolé syr jag, cjomna-sine syr giacynto, žylta syr siéra (dzevélia). Grengire šeré sys syr ščerengire (lievengire) šeré, i léngire móstyr džálas jag, thuv i siéra (dzevélia).

¹⁸Tríto paš manušypnastyr sys muliakirdy dalé triné franséndyr: jagása, thuvesa i dzeveliasa, so džánas javrí grengire mujendyr.

¹⁹Pal-dová so grengiri zor sys dre muiá i porja léngire: i léngire porja sys syr sapa šerenca, savénca jone dukhavenas.

²⁰I javír manúš, savé na sys muliakirdé kadalé fransenca, až na riskirdé pale doléstyr, so jone kerdé péskire vasténca. Jone na pirijačne te bandiakiren šeré nalačhé duhenge, xohané devlenge suvnakástyr, rupéstyr i xarkomátyr, baréstyr i kaštéstyr, savé na moginéna ni te dykhén, ni te šunén, ni te psirén.

²¹I jone na pridžindle péskiri bang dre meribena, ni dre čovahanypena, ni dre biladžakuné réndy, ni dre čoribena.