Read Biblija - Pe Baltitko Romani čib (Romanes) 2019 Baltic Romani Bible Ruta 4 Bible Online

Ruta 4 - Biblija - Pe Baltitko Romani čib (Romanes) 2019 Baltic Romani Bible bible

Ruta 4

¹Voozo vygijá ke pórta i bestiá odój. I ĥáda, džála mamúj seménca, pal savjate rakirdiá Voozo. I phendiá léske Voozo: “Zadžá adarík i beš adái.” Odová zagijá i bestiá.

²Voozo lyjá foróskire phurydyrendyr deš manušén i phendiá: “Bešén adái.” Odolé zaginé i bešné.

³I phendiá Voozo semencake: “Noemin', saví risijá Moavitóskire feldendyr, biknela feldakiri paš, saví sys amaré pšaleskiri Jelimieliehoskiri;

⁴me skedyjompe te dolydžav ke tyré kaná i te phenáv: kin angíl manušénde, savé isyn bešté adáj i angíl miré manušéngire phurydyrende. Kóli tu kames te vykines, vykin; a kóli na kamésa te vykines, phen mánge, i me javáva te džináv; pal-dová so apríč túte nane konéske te vykinen, a pir túte me.” Odová phendiá: “Me vykinava.”

⁵Voozo phendiá: “Kiéli tu kinesa Noeminjatyr félda, tedy trej te kines i Rutatyr Moavitiankatyr, muleskire romniatyr, i trej te les la paloróm, sob (kaj) te riskires muleskiro lav dre léskire mištypnáskiri miéra.”

⁶I phendiá odoia seménca: “Na mogináva me te lav la péske, sob (kaj) te na roskerav péskiri mištypnáskiri miéra; prilé la tu, pal-dová so me na moginav te prilav.”

⁷Angledýr sys dasavo prisykliaiben (obyčajo) dro Izrailjo, syr vykinena i syr paruvena, vaš vari-savó rendoskiro podrikiribén: jekh zlela péskiri tyrah i délas javireske, i davá sys Izrailjoste jakhitkonesa.

⁸I phendiá doiá seménca Voozoske: “Kin péske.” I zlyjá péskiri tyrah.

⁹I phendiá Voozo phurydyrenge i saré manušénge: “Tumé san kakaná jakhítka doléske, so me kinava Noeminjatyr saró Jelimieliehoskiro i saró Xilieonoskiro i Mahlonoskiro;

¹⁰adiáke-pac' i Ruta Moavitianka, Mahlonoskirja romniá, me láva paloróm, sob (kaj) te jačkirav muleskiro lav dre léskire mištypnáskiri miéra, i sob (kaj) te na xasjol muleskiro lav maškír léskire pšalénde i pašýl léskire štetoskire vudará: tumé san adadyvés jakhítka daleske.”

¹¹I phendlé saré manušá, savé sys pašýl vudará, i phurydyrá: “Ame sam jakhítka, mek te sozdel Raj Devél romniá, saví zadžála dro tyró kher, syr Rahíl' i syr Lija, savé dujdžiné sčhude Izrailjoskiro kher; skéde barvalypén dro Jefrafo, i mek te slavinelpe tyró lav dro Vifliejémo;

¹²i mek te javél tyró kher, syr Fariesóskiro kher, savés bijandiá Famar' Judáske dolé rodóstyr, savó déla túke Raj Devél adalé terné džuvliatyr.”

¹³I lyjá Voozo Ruta, i joj kerdiápe léskire romniása. I zagijá jov ke joi, i Raj Devél dyjá láke te pharjol i joj bijandiá čhavés.

¹⁴I rakirdé džuvliá Noeminjake: “Te javél bahtiakirdó Raj Devél, so Jov na jačkirdiá kakaná tut bi prilyibnaskires pe mištypén (nasliednikoskiro!) I mek te javél slavútno léskiro lav dro Izrailjo!

¹⁵Jov javéla túke radymása i čaraibnarisa vaš tyró phuripen, pal-dová so les bijandiá tyrí bori, savjake isyn drógo tu, saví vaš túke fedýr syr eftá čhavé.”

¹⁶I lyjá Noemin' adalé tyknemases (bijatós), i lydžijá les dro péskiro oblyiben (angalia), i sys léske nian'kasa.

¹⁷Pašatuné (susiedki) dyné léske lav i rakirdé: “Noeminjate bijándyja čhavó”, i dyné léske lav: Ovido. Jov isyn Jesiejoskiro dad, Davidóskire dadéskiro.

¹⁸I ĥáda, isyn ródo Fariesóskiro: Fariesostyr bijándyja Jesromo;

¹⁹Jesromostyr bijándyja Arámo; Aramostyr bijándyja Aminadávo;

²⁰Aminadavostyr bijándyja Naasóno; Naasonostyr bijándyja Salmóno;

²¹Salmonostyr bijándyja Voozo; Voozostyr bijándyja Ovido;

²²Ovidostyr bijándyja Jesiejo; Jesiejostyr bijándyja Davído.