Read Biblija - Pe Baltitko Romani čib (Romanes) 2019 Baltic Romani Bible 1 Kralip 11 Bible Online

1 Kralip 11 - Biblija - Pe Baltitko Romani čib (Romanes) 2019 Baltic Romani Bible bible

1 Kralip 11

¹I javdiá Amonitianino Naaso i zauhtyldia Galaadoskiro Iaviso. I phendlé saré Iavisoskire manušá Naasoske: “Ker aménca dorakiribén (sojuzo), i ame javása te dynarinás túke.”

²I phendiá lénge Amonitianino Naso: “Me keráva tuménca dorakiribén, ne dolesa, sob (kaj) kažnonestyr vyphusavav čačí (pravo) jakh i dolesa te čhuvav magiripén pe saró Izrailjo.”

³I phendlé léske Iavisoskire phurydyrá: “De aménge eftá dyvesá pir časo, sob (kaj) te bičhavas aménge manušén dro saré Izrailjoskire rigá, i kóli nikón na déla vast aménge, tedy ame vydžasa ke tu.”

⁴I javné manušá dro Sauloskiri Givá, i piriphendle dalé lavá dro manušéngiro šunybén; i saré manušá ĥazdyné gódla i zarondle.

⁵I ĥáda, javdiá Sáulo palál guruvende feldatyr i phendiá: “So kerdiápe manušénca, so jone rovena?” I piriphendle léske Iavisoskire-manušéngire lavá.

⁶I zgija Devléskiro Dúho pe Sauloste, kiéli jov šundiá dalé lavá, i zoralés zahačíia léskiri xolý;

⁷i lyjá jov dujén guruvén, i rosčhingirdia len pe pašá, i bičhadiá dro saré Izrailjoskire rigá pir dolé manušénde, piripheny, so adiáke javéla kerdó doleskire guruvenca, kon na džála palál Sauloste i Samuiloste. I pyjá dar Ráskire-Devléskiri pe manušénde, i vyginé saré, syr jekh manúš.

⁸Sáulo obdykhcia len dro Viezieka, i lathiape Izrailjoskire čhavén trin šelá tysjoncy, i Judáskire muršén trijánda tysjoncy.

⁹I phendlé manušénge, savé javné: “Adiáke phenén Galaadóskire Iavisoskire manušénge: Atasiá javéla ke tumé podrikiribén, kiéli obtat'kirela kham.’” I javné manušá, savén bičhadé, i piriphendle Iavisoskire manušénge, i jone obradyndlepe.

¹⁰I phendlé Iavisoskire manušá Naasoske: “Atasiá vydžasa ke tu, i kerén aménca, syr tuménge isyn pir iló.”

¹¹Pe javír dyvés Sáulo rosčhudiá (rozdielindia) manušén pe trin otriády, i jone zaginé maškirál stáno dro rakhibnar'jengiro časo pe zlóko, i domardé Amonitianen ke dyveseskiro xačkiribén; manušá, savé jačnépe, rozginepe, adiáke so na jaciápe léndyr dujén khetané.

¹²Tedy manušá phendlé Samuiloske: kon rakirdiá: “Ci Saulóske te kralinél pe aménde? Den dalé manušén, i ame muliakirasa len.”

¹³Ne o Sáulo phendiá: “Dro davá dyvés nikonés naštý te muliakirél, pal-dová so adadyvés Raj Devél kerdiá zrakhibén dro Izrailjo.”

¹⁴I phendiá Samuílo manušénge: “Javén dro Galgálo, i phenása angíl sarénde odój pal kralipén.”

¹⁵I giné saré manušá dro Galgálo, i čhudé odój Saulos kralísa angíl Raste Devléste dro Galgálo, i jandlé odój mirna svénta janybená angíl Raste-Devléste. I drieván radyndlepe odój Sáulo i saré Izrail'tiáni.