Read Biblija - Pe Baltitko Romani čib (Romanes) 2019 Baltic Romani Bible 1 Kralip 12 Bible Online

1 Kralip 12 - Biblija - Pe Baltitko Romani čib (Romanes) 2019 Baltic Romani Bible bible

1 Kralip 12

¹I phendiá Samuílo saré Izrailjoske: “Ĥáda, i me kandyjom tumarí zan (glos) dro saró, so tumé rakirdé mánge, i čhudjom pe tuménde kralís,

²i ĥáda, králi psiréla angíl tuménde; a me phurijom i ssyvindjom; i miré čhavé isyn tuménca; me psirdjom angíl tuménde miré ternypnastyr i ke/žýko ke davá dyvés;

³ĥáda, me som, mek te dophenen pe mánde angíl Raste-Devléste i angíl Léskire pomakhibnaskireste, ci konéstyr me lyjom guruvés, ci konéstyr lyjom me oslós, konés dukhadjom i konés pritasadjom, ci konéstyr lyjom me myto (vziatka) i začhakirdjom dro léskiro réndo jakhá miré, i me riskiráva tuménge.”

⁴I otphendlé: “Tu na dukhadian (na zbidindian) amen i na pritasadian amen, i ničý ni konéste na lyjan.”

⁵I phendiá jov lénge: “Jakhítko pe tuménde isyn Raj Devél, i jakhítko Léskiro pomakhibnaskiro dro davá dyvés, so tumé na lathné ničý pal mánde.” I phendlé: “Jakhítka isyn.”

⁶Tedy Samuílo phendiá manušénge: “Jakhítko te javél Raj Devél, Savó čhudiá Mojzás i Aaronós i, Savó vylydžyja tumaré daden Jegiptóskire phuvjátyr.

⁷Kakaná terdjon, i me javáva te sendiakiravpe tuménca angíl Raste-Devléste pal saré mištypena, savé Jov kerdiá tuménge i tumaré dadénge.

⁸Kiéli javdiá Jakovo dro Jegípto, i dadá tumaré zadyne gódla ke Raj Devél, tedy Raj Devél bičhadiá Mojzás i Aaronós, i jone vylydžiné tumaré daden Jegiptóstyr i čhudé len te bešén pe davá štéto.

⁹Ne jone bistyrde péskire Ras-Devlés, Devlés, i Jov otdyjá len dro Asoroskire-xaladéngire barydyreskire Sisaraskire vastá, i dro Moavitoskire-kralískire vastá, savé mardépe (giné maribnása) proti lénde.

¹⁰Ne kiéli jone zadyne gódla ke Raj Devél i phendlé: “Ame kerdiám grého, pal-dová so ame jačkirdiam Ras-Devlés i lyjam te dynarinás Vaalenge i Astartenge, kakaná zrákh amen amaré vergéngire vastéstyr, i ame javása te dynarinás Túke”,

¹¹tedy Raj Devél bičhadiá Iierovaalos, i Varakos, i Iiefajas, i Samuilos, i zrakhciá tumen tumaré vergéngire vastéstyr, savó sys pašýl tuménde, i tumé dživdé bidarakiro.

¹²Ne dykhí, so Naaso, Amonitianengiro králi, džála proti tuménde, tumé phendlé mánge: “Nad, mek králi te kralinél pe aménde”, tedy, syr tumaró Raj Devél, Devél tumaró králi.

¹³I adiáke, ake isyn králi, savés tumé vykedyné, savés tumé trebindle: ĥáda, Raj Devél čhudiá pe tuménde kralís.

¹⁴Kóli javéna te darén Rástyr-Devléstyr, i te dynarinén Léske, i te šunén Léskiri zan, i na léna te džán proti Ráskire-Devléskiro uphenybén, tedy javéna i tumé i tumaró králi, savó isyn králi pe tuménde, te psirén palál pal Raste-Devléste, tumaré Devléste,

¹⁵a kóli na javéna te šunén Ráskire-Devléskiri zan i džána proti Ráskire-Devléskire uphenybená, tedy Ráskire-Devléskiro vast javéla proti tuménde, syr sys proti tumaré dadende.

¹⁶Kakaná terdjon i podykhen pe baró réndo, savó keréla Raj Devél angíl tumaré jakhá:

¹⁷ci na ukedyiben kakaná dro parnó giv (pšenica)? Ne me risijom ke Raj Devél, i Jov bičhavéla gromo i bryšýnd, i tumé udžinena i dykhéna, syr baró grého, savó tumé kerdé angíl Ráskire-Devléskire jakhá, mangi péske kralís.”

¹⁸I risijá te kharel Samuílo ke Raj Devél i Raj Devél bičhadiá gromo i bryšýnd dro dová dyvés; i javné saré manušá dro bari dar Rástyr-Devléstyr i Samuilostyr.

¹⁹I phendlé saré manušá Samuiloske: “Pomangpe pal tyré pishar'jende angíl Raste-Devléste, tyré Devléste, sob (kaj) te na meras aménge, pal-dová so ke saré amaré gréhi ame čhudiam iščo (inké) grého, kiéli mangdiam péske kralís.”

²⁰I otphendiá Samuílo manušénge: “Na darén, grého davá kerdé tumé, ne tumé jekh so na otdžan Rástyr-Devléstyr i dynarinén Ráske-Devléske saré tumaré ilésa

²¹i na džán palál bibahtalé devlorende, savé na janéna lačhipén i na zrakhena; pal dová so jone — dylnypén.

²²Raj Devél na jačkiréla Péskire manušén vaš baró Péskiro lav, pal-dová so Ráske-Devléske sys lačhó te vykedes tumen Péskire manušénca;

²³i me adiáke-pac' na domekava péske grého angíl Raste-Devléste, sob (kaj) te pirijačav te mangavpe pal tuménde, i javáva te sykliakirav tumen pe lačhó i mamúj drom;

²⁴iekh darén Rástyr-Devléstyr i dynarinén Léske čačunés, saré tumaré iléstyr, pal-dová so tumé dykhné, savé baré réndy Jov kerdiá tuménca;

²⁵kóli tumé javéna te kerén fuipén, tedy i tumé, i tumaró králi xasjona.”