Read Biblija - Pe Baltitko Romani čib (Romanes) 2019 Baltic Romani Bible 1 Kralip 16 Bible Online

1 Kralip 16 - Biblija - Pe Baltitko Romani čib (Romanes) 2019 Baltic Romani Bible bible

1 Kralip 16

¹I phendiá Raj Devél Samuiloske: “Kicý tu javésa te tugines pal Sauloste, savés Me na prilyjom, sob (kaj) jov te na javél kralísa pe Izrailjo? Pher tyró šyng (rógo) jeliejosa i džá; Me bičhaváva tut ke Vifliejemlianino Jesiejo, pal-dová so maškír léskire čhavénde Me vydykhcjom Péske kralís.

²I phendiá Samuílo: “Syr me džáva? Sáulo šunéla i domarla man.” Raj Devél phendiá: “Le dro tyró vast terné gurumnia stadatyr i phen: ‘Me javdjom vaš svénto dyibén Ráskire-Devléskiri’”;

³i khar Jesiejos ke svénto janybén Ráske Devléske; Me phenáva túke, so te kerés túke, i tu pomakhesa Mánge odolés, pal savéste Me phenáva túke.”

⁴I kerdiá Samuílo adiáke, syr phendiá léske Raj Devél. Kiéli jov javdiá dro Vifliejémo, tedy foróskire phurydyrá trašasa vyginé gil léske, i phendlé: “Ci ramanjosa (mirósa) tu javdián?”

⁵I otphendiá jov: “Ramanjosa (mirósa) vaš svénto janybén Ráske-Devléske javdjom me; vysvencynenpe i džán mánca ke svénto janybén Ráske-Devléske.” I vysvencyndia Jesiejos (Iiesiejoske) i léskire čhavén, i khardiá len ke svénto janybén Ráske-Devléske.

⁶I kiéli jone javné, to jov dykhciá Jeliavos, i phendiá: “Čačó, davá angíl Raste-Devléste Léskiro pomakhibnaskiro!”

⁷Ne Raj Devél phendiá Samuiloske: “Na dykh pe léskiri mina i pe léskiro baripén; Me na prilyjom les; Me dykháva na adiáke, syr dykhéla manúš; pal-dová so manúš dykhéla pe muj, a Raj Devél dykhéla pe iló.”

⁸I khardiá Jesiejo Aminadavos, i podlydžyja les ke Samuílo, i phendiá Samuílo: “I kadales na vykedyjá Raj Devél.”

⁹I podlydžija Jesiejo Samas, i phendiá Samuílo: “I kadales na vykedyjá Raj Devél.”

¹⁰Adiáke podlydžija Jesiejo ke Samuílo eftá péskire čhavén, ne Samuílo phendiá Jesiejoske: “Nikonés dalendyr na vykedyjá Raj Devél.”

¹¹I phendiá Samuílo Jesiejoske: “Ci saré čhavé isyn adái?” I otphendiá Jesiejo: “Isyn iščo (inké) tyknedyršo jov rakhéla bakrén.” I phendiá Samuílo Jesiejoske: “Bičháv i le les, pal-dová so ame na bešasa te xas, paka jov na javéla adarík.”

¹²I bičhadiá Jesiejo, i jandlé les. Jov sys parné balenca, gožone jakhénca i patyvalé mósa. I phendiá Raj Devél: “Uštý, pomakh les, pal-dová so davá jov isyn.”

¹³I lyjá Samuílo šyng (rógo) jeliejosa, i pomakhcia les maškír léskire pšalénde i sys Ráskire-Devléskiro Dúho pe Davidóste dolé dyveséstyr i korigedýr (pozže); Samuílo uštyjá i gijá dre Ráma.

¹⁴A Saulostyr otgijá Ráskire-Devléskiro Dúho, i xoliakirdia les xoliamó dúho Devléstyr.

¹⁵I phendlé Saulóskire dynárja léske: “Ĥáda, xoliamó dúho Devléstyr xoliakirela tut;

¹⁶mek amaró xuláj te priphenel péskire dynar'jénge, savé angíl túte, te rodén manušés, savó mištés bašavela pe gusli, i kiéli javéla pe túte xoliamó dúho Rastyr-Devlestyr, tedy jov, bašavi péskire vastésa, javéla te štyliakirel tut.”

¹⁷I otphendiá Sáulo péskire dynar'jénge: “Lathén mánge manušés, savó šukár bašavela, i janén les ke me.”

¹⁸Tedy jekh léskire dynar'jéndyr (slugéndyr) phendiá: “Ĥáda, me dykhcjom Vifliejemlianinoskire čhavéste Jesiejoste, savó džinéla te bašavel, manušés murškanés i maribnytkones, i dro rakiribén god'vares, i kuč kokoró pésa, i lésa isyn Raj Devél.

¹⁹I bičhadiá Sáulo manušén ke Jesiejo, i phendiá: “Bičháv ke me Davidós, tyré čhavés, savó isyn pašýl stada.”

²⁰I lyjá Jesiejo oslós marésa, i gonó mol, i jekhés buznores, i bičhadiá Davidosa péskire čhavésa ke Sáulo.

²¹I javdiá Davído ke Sáulo, i dynarindiá angíl léste, i drieván jaciá pir iló léske, i jaciá léske manúš, savó lydžála mardýtko.

²²I bičhadiá Sáulo te phenén Jesiejoske: “Mek Davído te dynarinél pašýl mánde, pal-dová so jov lathiá láska dro miré jakhá.

²³I kiéli dúho Devléstyr sys pe Sauloste, tedy Davído, léla gusli, bašadia, i lokhedýr i fedýr jačelas Saulóske, i xoliamó dúho otdžalas léstyr.