Read Biblija - Pe Baltitko Romani čib (Romanes) 2019 Baltic Romani Bible 1 Kralip 21 Bible Online

1 Kralip 21 - Biblija - Pe Baltitko Romani čib (Romanes) 2019 Baltic Romani Bible bible

1 Kralip 21

¹I javdiá Davído dre Nomva ke rašáj Ahimielieho, i zaladžandyja Ahimielieho gil Davidóste, i phendiá léske: “Sóske tu san jekhdžinó, i nikonés nane túsa?”

²I phendiá Davído rašáske Ahimieliehoske: “Králi dyjá mánge réndo i phendiá mánge, mek nikón te na džinél, pal so me bičhadjom tut i so dyjom túke”, pal-dová so manušén me jačkirdjom pe džindló štéto;

³i adiáke, so isyn túte tel vast, de mánge, maré pandž, ci so lathelape.”

⁴I otphendiá rašáj Davidóske, rakirí: “Nane mánde tel vast prosto maró, a isyn svénto maró, kóli féni (tóka) tyré manušá urikirdepe džuvliendyr!”

⁵I otphendiá Davído rašáske, i phendiá léske: “Džuvlién pašýl aménde na sys ni tasiá, ni tríto dyvés, dolé časostyr, syr me vygijom, i sasúdy terné-manušéngire isyn žužé, a kóli drom isyn nažužo, tedy maró jačélape žužesa dre sasúdy.

⁶I dyjá léske rašáj svénto maró; pal-dová so na sys léste maró, apríč maré, savé sys te xan syr svénto, savé lyné sys Ráskire-Devléskire móstyr, sob (kaj) pir léngiro lyiben krig te čhuvés tato maró.

⁷Odój sys jekh manúš dro dová dyvés angíl Raste-Devléste jekh Saulóskire dynar'jéndyr (slugéndyr), pir lav Doiko, Idumejanino, Saulóskire rakhibnariskiro barydyr.

⁸I phendiá Davído Ahimieliehoske: “Ci nane adáj túte tel vast čhurdypnytko bust ci kurtála? Pal-dová so me na lyjom pésa ni kurtála, ni javír mardýtko, adiáke syr kralískiro priphenybén sys sýgno.”

⁹I phendiá rašái: “Ĥáda, isyn kurtála Filistimlianinoskire-Goliafoskiri, savés tu zamardian pe dembitko dólo, zakrencyndly dre ídia, palál efódo; kóli kamésa, le la; javír apríč daliatyr nane adái.” I phendiá Davído: “Nane fedýr látyr, de mánge la.”

¹⁰I uštyjá Davído, i nastiá dro dová-pac' dyvés Saulostyr, i javdiá ke Anhuso, Giefoskiro králi.

¹¹I phendlé Anhusoske léskire dynárja: “Ci na adavá isyn Davído, savó isyn králi dolé rigakiro? Ci na léske bagandle dre xorovody i rakirdé ‘Sáulo domardiá tysjoncy, a Davído deš tysjoncy?’”

¹²Davído čhudiá dalé lavá dro péskiro iló, i drieván dardiape Anhusostyr, Giefoskire kralístyr.

¹³I parudia péskiro muj angíl lénde, i pričhurdyjape dylynesa dro léngire jakhá, i čhindiá pe vudará, i mekciá slina (salia) pir péskiri čhora (broda).

¹⁴I phendiá Anhuso péskire pishar'jénge: “Dykhéna, jov manúš isyn dylynó; vaš so tumé jandlé les ke me?

¹⁵Naúšto kutý mánde dylyné, so tumé jandlé les, sob (kaj) jov te dylnjol angíl mánde? Naúšto jov zadžála dro miro kher?”