Read Biblija - Pe Baltitko Romani čib (Romanes) 2019 Baltic Romani Bible 1 Kralip 24 Bible Online

1 Kralip 24 - Biblija - Pe Baltitko Romani čib (Romanes) 2019 Baltic Romani Bible bible

1 Kralip 24

¹I vygijá Davído odothýr, i dživdiá dro bidarakire štéty En-Gadi [Engiedi-ju.o.].

²Kiéli Sáulo risijá Filistimlianendyr, léske phukavenas, rakirí: “Ĥáda, Davído isyn pe čhučí phuv En-Gadi.”

³I lyjá Sáulo trin tysjoncy fedyršone muršén saré Izrailjostyr, i gijá te rodél Davidós i léskire manušén pir bérgi, kaj dživénas sierny.

⁴I javdiá ke bakrano zatradypen (gražo), pašýl drom; odój sys ĥiebár (pieščera) i zagijá odorík Sáulo vaš trébima; Davído i léskire manušá sys bešté dro xoripén ĥiebarakiro.

⁵I rakirdé Davidóske léskire manušá: “Ĥáda, isyn dyvés, pal savó rakirdiá túke Raj Devél: ‘Ĥáda, Me otdáva tyré vergos dro tyré vastá, i kerésa lésa, so túke isyn lačhó.’” Davído uštyjá i štylin'kes otčhindia jagóro (krajo) upratune Saulóskire idiatyr.

⁶Ne paló davá saró jaciá dukhano Davidóskire ileske, so jov otčhindia jagóro Sáulo skire idiatyr.

⁷I phendiá jov péskire manušénge: “Mek te na domekel man Raj Devél te keráv davá xuláske miréske, Ráskire-Devléskire pomakhibnariske, sob (kaj) te čhuvav vast miro pe léste, pal-dová so jov isyn Ráskire-Devléskiro pomakhibnaskiro.”

⁸I urikirdia Davído péskire manušén dalé lavénca, i na dyjá lénge te ĥazdénpe pe Sauloste. A Sáulo uštyjá i vygijá ĥiebaratyr (pieščeratyr) pe drom.

⁹Paló dová (poslie) uštyjá i Davído, i vygijá ĥiebaratyr, i zadyja gódla palál Saulóske, rakirí: “Hulájo miro, králi!” Sáulo podykhciá pale, i Davído pyjá mósa pe phuv i dyjá patýv léske.

¹⁰I phendiá Davído Saulóske: “Sóske tu šunesa manušéngire rakiribena, savé rakiréna: ‘Ĥáda, Davído skedéla xolý pe túte?’

¹¹Ĥáda, adadyvés dykhéna tyré jakhá, so Raj Devél otdyjá tut kakaná dro miré vastá dro ĥiebár; i mánge rakirdé, sob me te zamarav tut, ne me potangindjom (požalindjom) tut, i phendjom: ‘Na ĥazdáva miro vast pe miré xulaste, pal-dová so jov isyn Ráskire-Devléskiro pomakhibnaskiro.’

¹²Miro dádo! Podykh pe jagóro tyré idiakiro dre miro vast; me otčhindjom jagóro tyré idiatyr, a tut na zamardjom: udžin i propatiakir, so nane dro miro vast xolý, ni xohaibén, i me na kerdjom grého proti túte; a tu rodesa miro di (džiibén), sob te otles les.

¹³Mek te rossendiakirel Raj Devél maškír mánde i túte, i mek te othal pale (otomstinel) túke Raj Devél pal mánde; ne vast miro na javéla pe túte,

¹⁴syr rakiréla phurany pritča: ‘Fuipnastyr džála fuipén.’ A miro vast na javéla pe túte.

¹⁵Proti konéste vygijá Izrailjoskiro králi? Pal konéste tu tradesape? Pal mulé džukleste, pal jekhe pušumate.

¹⁶Mek te javél Raj Devél sendarisa, i mek te rossendiakirel maškír mánde i túte. Jov rozdykhela, roskedela miro réndo i zrakhéla man tyré vastéstyr.”

¹⁷Kiéli mekciá Davído te rakirél dalé lavá ke Sáulo, Sáulo phendiá: “Ci tyrí daja isyn zan (glos), čhavó miro, Davído? I ĥazdyjá Sáulo péskiri zan, i rondiá,

¹⁸i phendiá Davidóske: “Tu san čačunydyr mándyr, pal-dová so tu otdyjan mánge lačhipnása, a me kerdjom túke čoripén;

¹⁹tu sykadian davá adadyvés, obgijanpe mánca tangipnasa, kiedy Raj Devél otdyjá man dro tyré vastá, tu na zamardian man.

²⁰Kon, lathi péskire vergos (vrogos), otmekija by les dro lačhó drom? Devél otdéla túke pal davá lačhipnása, so tu kerdián mánge adadyvés.

²¹I kakaná me džinóm, so tu ŭsajekh javésa te kralines, i Izrailjoskiro kralipén javéla tvardo dro tyró vast.

²²I adiáke sovlahá mánge Rása-Devlésa, so tu na vymaresa miro ródo paló mánde i na xasiakiresa miro lav dro miré-dadéskiro kher.”

²³I sovlahadiá Davído Saulóske. I gijá Sáulo dro péskiro kher, Davído i léskire manušá zaginé pe štéto zoraló tynosa.