Read Biblija - Pe Baltitko Romani čib (Romanes) 2019 Baltic Romani Bible 1 Kralip 29 Bible Online

1 Kralip 29 - Biblija - Pe Baltitko Romani čib (Romanes) 2019 Baltic Romani Bible bible

1 Kralip 29

¹I skedyné Filistimliáni saré péskire opolčenii dro Afka, a Izrailitiani terdiné stanósa (lodesa) pašýl ĥanyngori, so sys dro Izriejeljo.

²Filistimijákire khieningi giné šelenca i tysjoncenca, Davído i léskire manušá giné palál Anhusosa.

³I rakirdé Filistimijákire khieningi: “So da isyn adalé Judy?” Anhuso otphendiá Filistimijákire khieningenge: “Naúšto na džinéna, so davá isyn Davído, Sauloskiro pishári, Izrailjoskire kralískiro? Jov isyn pašýl mánde butýr beršestyr, i me na lathjom dro léste ničý čoripén dolé časostyr, syr jov javdiá ke me ke davá dyvés.

⁴I rosholiasyne pe léste Filistimijákire khieningi, i phendlé léske Filistimijákire khieningi: “Otmek tu a dales manušés, mek jov te bešél pe péskiro štéto, savó tu léske dyján, sob (kaj) jov te na džal aménca pe maribén i te na kerélpe proti aménde pe maribén. Sósa jov moginjola te roskovliakirel péskire xulás, syr na šerenca dalé muršengire?

⁵Ci na odová davá Davído, savéske bagandle dre xorovody, rakirí: ‘Sáulo domardiá tysjoncy, a Davído deš tysjoncy?’

⁶I khardiá ke pe Anhuso Davidós, i phendiá léske: “Te javél džidó Raj Devél! Tu san čačunó, i miré jakhenge mištó te javél by, sob (kaj) tu te vydžas i te zadžas mánca dro opolčenijo; paldavá so me na dykhcjom dro túte čoripén tyré javibnaskire časostyr ke me ke davá dyvés; ne dro khieningengire jakhá tu san nálačho.”

⁷I adiáke risjov kakaná, i džá ramanjosa (mirósa), i na xoliakir Filistimijákire khieningen.”

⁸Ne Davído phendiá Anhusoske: “So me kerdjom, i so tu lathian dre tyré dynariste dolé časostyr, syr me som angíl tyró muj, i ke davá dyvés, sóske by mánge te na džav i te na maravpe miré xuláskire vergenca, kraliskirenca?”

⁹I otphendiá Anhuso Davidóske: “Jav upatiandlo, so dro miré jakhá tu san lačhó. Syr Devléskiro Jangólo; ne Filistimijákire khieningi phendlé: “Mek jov te na džal aménca pe maribén.’

¹⁰I adiáke uštý pe zlóko, tu i tyré xuláskire dynárja, savé javné túsa; i uštén pe zlóko, i, kiéli javéla bicialó, džán.”

¹¹I uštyjá Davído, kokoró i léskire manušá, sob (kaj) te džán zlokosa i te risjon pe Filistimijakiri phuv. A Filistimliáni giné pe maribén dro Izriejeljo.