Read Biblija - Pe Baltitko Romani čib (Romanes) 2019 Baltic Romani Bible 1 Kralip 4 Bible Online

1 Kralip 4 - Biblija - Pe Baltitko Romani čib (Romanes) 2019 Baltic Romani Bible bible

1 Kralip 4

¹I sys Samuiloskiro lav ke saró Izrailjo. I vyginé Izrail'tiáni proti Filistimlianende pe maribén, i terdiné stanósa (lodesa) pašýl Avien-Jeziero, a Filistimliáni terdiné pašýl Afieka.

²I terdiné Filistimliáni proti Izrail'tianende, i vygijá maribén, i domardé Filistimliáni Izrail'tianén, savén domardé pe félda, kaj mardépe, pašýl štar tysjoncy manušén.

³I javné manušá dro stáno (lod), i phendlé Izrailjoskire phurydyrá: “Pal so domardiá amen Raj Devél adadyvés angíl Filistimlianende? Lása péske Silomostyr kovčego Ráskire-Devléskire zavietosa, i jov džála maškír aménde, i zrakhéla amen vastéstyr amaré vergéngire (vrogengire).”

⁴I bičhadé manušá dro Silómo, i jandlé odothýr Ráskire-Devléskiro jangoléngire-bolybnáskire kovčego zavietosa, savó sys beštó pe xieruvimy; a pašýl Ráskire-Devléskire zavietóskiro kovčego sys i duj Ilijoskire čhavé, Ofni i Finiejeso.

⁵I kiéli javdiá Ráskire-Devléskire zavietóskiro kovčego dro stáno, saró Izrailjo ĥazdyjá dasaví zoralý gódla, so phuv dyjá ĥondiá (stonindia).

⁶I šundlé Filistimliáni gódla radymakiri, i phendlé: “Sóstyr dasavé bari gódla radymakiri dro Judéngiro stáno?” I udžindlé, so Ráskire-Devléskiro kovčego javdiá dro stáno.

⁷I strahádyne Filistimliáni, pal-dová so phendlé: “Odová Devél javdiá ke jone dro stáno.” I phendlé: “Bida aménge! Paldavá so na sys dasavo ni tasiá, ni pe tríto dyvés;

⁸bída aménge! Kon zrakhéla amen dalé zoralé Devléskire vastéstyr? Ada odová Raj Devél, Savó domardiá Jegiptianen raznone (svakone) dukhenca pe čhučí phuv;

⁹zoraljon i javén murškané (smiala), Filistimliáni, sob (kaj) tuménge te na javén dro dynaribén Judénge, syr jone isyn tuménde dro dynaribén; javén murškané i marénpe lénca.”

¹⁰I mardépe Filistimliáni, i domardé sys Izrail'tiáni, i kažno (sváko) nastiá dro péskiri šátra, i sys maribén drieván baró, i pyné Izrail'tianén trijánda tysjoncy manušén, savé sys pezal.

¹¹I Devléskiro kovčego sys zalyno, i duj Ilijoskire čhavé, Ofni i Finiejeso, myné.

¹²I nastiá jekh Vieniamitianino maribnaskire štetóstyr, i javdiá dro Silómo, dro dová-pac' dyvés; ídia pe léste sys rozkušny i práho pe léskiro šeró.

¹³Kiéli javdiá jov, o Ilijo sys beštó pe štéto angíl drom pašýl vudará i dykhciá, pal-dová so léskiro iló trinskirdiape pal Devléskiro kovčego (mohtó). I kiéli odová manúš javdiá i phendiá sarénge dro fóro, tedy zoralés dyjá ĥondiá (uzdyhnindia) saró fóro.

¹⁴I šundiá Ilijo gódla, i phendiá: “Sóstyr dasaví gódla?” I doiá-pac' štúnda podgíia odová manúš, i piriphendia Ilijoske.

¹⁵Tedy Ilijoske sys jeniadeša ohtó berš; i léskire jakhá pirijačne te dykhén, i jov na mogindiá te dykhél.

¹⁶I phendiá odová manúš Ilijoske: “Me javdjom stanostyr, adadyvés me nastjom maribnaskire štetóstyr.” I phendiá Ilijo: “So kerdiápe, míro čháva?”

¹⁷I otphendiá manúš, savó jandiá zan (zvies'), i phendiá: “Našelas Izrailjo angíl Filistimlianende, i maribén baró vygijá dro manušénde, i duj čhavé tyré, Ofni i Finiejeso, myné, i Devléskiro kovčego lynó.

¹⁸Kiéli jov priripirdia pal Devléskiro kovčego, to Ilijo pyjá štetóstyr, pe savó sys beštó pe dumo pašýl vudará, phagirdiá péske dumalo kokalo i myjá; pal-dová so jov jaciá phuró i pharó. I sys jov Izrailjoske sendarisa štardešá berš.

¹⁹Léskiri bori, Fieniejesoskiri romný, sys pharí angíl bijanypén. I kiéli šundiá zan (zvies') pal Devléskiro kovčegoskiro lyiben i pal péskire sastreskiro meribén i péskire romeskiro, to tedy pyjá pe čang i bijandiá, pal-dová so podginé ke joj lákire dukhá.

²⁰I kiéli merelas joi, džuvliá, savé sys terdé pašýl láte, rakirdé láke: “Na dar, tu bijandian čhavés.” Ne joj na otphendiá i na riskirdiá jakhá.

²¹I khardiá tyknemases: Ihavodo, phení: “Otgijá sláva Izrailjostyr” Devléskire kovčegoskire lyibnasa i lákire sastreskire meribnasa i lákire romeskiresa.

²²Joj phendiá: “Otgijá Izrailjostyr sláva, pal-dová so lynó Devléskiro kovčego.”