Read Biblija - Pe Baltitko Romani čib (Romanes) 2019 Baltic Romani Bible 1 Kralip 9 Bible Online

1 Kralip 9 - Biblija - Pe Baltitko Romani čib (Romanes) 2019 Baltic Romani Bible bible

1 Kralip 9

¹Sys vari-kon Vieniaminóskire čhavéndyr, lav léskiro sys Kiso[2], Aviiloskiro čhavó, Ceronoskire-čhavéskiro, Biehorafoskire čhavéskiro, Afijaskire čhavéskiro, vari-saveskire Vieniamitianinoskire čhavéskire, slavútno manúš.

²Léste sys čhavó, lav léskiro Sáulo, ternó i šukár; i na sys Izrail'tianendyr nikonés léstyr gožedyr; jov péskire psikendyr sys vučedýr saré manušéndyr.

³I xasiné oslicy Kisoste, Saulóskire dadéste, i phendiá Kiso Saulóske, péskire čhavéske: “Le pésa jekhés dynar'jéndyr (slugéndyr) i uštý, džá, róde oslicen.”

⁴I progijá jov Jefriemóskiri bérga, i progijá Šališaskiri phuv, ne jone na lathné; i proginé Šaalimoskiri phuv, i odój len nane; i progijá jov Vieniaminoskiri phuv, i na lathné.

⁵Kiéli jone javné pe Cufaskiri phuv, Sáulo phendiá péskire dynaríske, savó sys lésa: “Javén pale, sob (kaj) miro dad, jačkiri oslicen, na lyjá te del túga (klopotynelpe) pal aménde.”

⁶Ne dynári phendiá léske: “Ĥáda, dro davá fóro isyn Devléskiro manúš, patyvalo manúš; saró so jov phenéla, kerélape čačipnása; ame kakaná odorík; moginéla te javél, jov uphenela aménge drom amaró, pir savó aménge te džas.”

⁷I phendiá Sáulo péskire dynaríske: “Ĥáda, ame džása, a so ame janasa dolé manušéske? Pal-dová so maró na jaciá dro amaré sakvy, i počastunko (podarko) nane, sob te janas Devléskire manušéske; so aménde?

⁸I nevés otphendiá dynári Saulóske i phendiá: Ĥáda, dro miro vast isyn paš šékieljo rup; me otdáva les Devléskire manušéske, i jov sykavéla aménge drom amaró.”

⁹Angledýr dro Izrailjo, kiéli vari-kon gijá te phučel Devléstyr, to rakirdé adiáke: “Džása ke magiko (prozorlivco)”; pal-dová so o dová, konés kakaná kharéna prorokosa, angledýr khardiape prozorlivcosa.

¹⁰I phendiá Sáulo péskire dynaríske: “Mištó tu rakirésa; džása.” I giné jone dro fóro, kaj Devléskiro manúš sys.

¹¹Kiéli jone ĥazdenaspe upré dro fóro, tedy strenindle terné patyvalé džuvlién, savé vyginé te pheren paní, i phendlé lénge: “Ci isyn adáj prozorlivco?”

¹²Odolé otphendlé lénge i phendlé: “Isyn; ĥáda, jov isyn angíl túte; jekh so sygniakir, pal-dová so jov adadyvés javdiá dro fóro, pal-dová so adadyvés manušénde svénto janybén Devléske pe vučipén;

¹³kiéli javéna dro fóro, to tumé zauhtylena les, paka jov na gijá pe davá vučipén, pe obiado; pal-dová so manušá na léna te xan, paka jov javéla; pal-dová so jov bahtiakiréla svénto janybén Devléske, i paló (poslie) davá léna te xan, manušá, savén khardé; i adiáke, džán, kakaná zauhtylena les.”

¹⁴I giné jone dro fóro. Kiéli zaginé dro paš fóro, tedy ĥáda, i Samuílo gijá pe strieč, sob (kaj) te džal pe vučipén.

¹⁵A Raj Devél otčhakirdiá Samuiloske pal dyvés ke Sauloskiro javiben i phendiá:

¹⁶“Atasiá dro davá časo Me bičhaváva ke tu manušés Vieniaminóskire phuvjátyr, i tu pomakh les dre phuredyreste Miré manušénge Izrailjoske, i jov zrakhéla Miré manušén Filistimlianengire vastéstyr; pal-dová so Me pridykhcjompe pe Miré manušénde, adiáke syr léskiri gódla dogijá ke Me.”

¹⁷Kiéli Samuílo dykhciá Saulos, tedy Raj Devél phendiá léske: “Ĥáda, isyn manúš, pal savéste Me rakirdjom túke; jov javéla te rikirél zor te priphenel Miré manušénge.”

¹⁸I podgíia Sáulo ke Samuílo, dro vudará, i phuciá léstyr: “Phen mánge, kaj isyn kher prozorlivcoskiro?”

¹⁹I otphendiá Samuílo Saulóske, i phendiá: “Me som prozorlivco, džá angíl mánde pe vučipén; i tumé javéna te xan adadyvés mánca, i me otmekáva tut zlokosa (tasiarle), i saró, so túte pe iló, Me phenáva túke;

²⁰A pal oslicende, savé túte xasiné uže trin dyvés, na dumin but: jone lathnepe. I konéske saró bijandlo dro Izrailjo? Ci na túke i saré tyré dadéskire kheréske?”

²¹I otphendiá Sáulo i phendiá: “Ci na čhavó me som Vieniaminoskiro, jekhe tyknedyršone Izrailjoskire kheritkoné rodendyr? I ci na tyknedýr miro kherítko ródo maškír sarén Vieniaminóskire ródy (pliémi)? Ke so tu mánge tu rakirésa davá?”

²²I lyjá Samuílo Saulos i léskire dynarís, i zalydžijá len dre štúba, i dyjá lénge anglatunó štéto maškír manušénde, savé sys khardé, savén sys pašýl trindeša manušén.

²³I phendiá Samuílo manušéske, savó keradia: “Pode daja paš, saví (savó) me dyjom túke, i pal savó me phendjom túke: ‘Otčhuv la krig péste.’”

²⁴I lyjá manúš, savó keradia psikó i so sys pašýl léste, i čhudiá angíl Sauloste. I phendiá Samuílo: “Ĥáda, davá jačkirdo, čhuv angíl péste i xa, pal-dová so ke davá časo (cýro) zrakhno davá vaš túke, kiéli me skedyjom manušén.” I xaja Sáulo Samuilosa dro dová dyvés.

²⁵I giné jone vučipnástyr dro fóro, i Samuílo rakirdiá Saulosa pe stréha (čhakín).

²⁶Zlokosa jone uštyné adiáke: kiéli jaciá te dyvesjol, to Samuílo gijá upré ke Sáulo pe stréha (čhakín) i phendiá: “Uštý, me prolydžava tut.” I uštyjá Sáulo, i vyginé jone dujdžiné kheréstyr, jov i Samuílo.

²⁷Kiéli jone podginé ke foróskiro jagóro (krajo), Samuílo phendiá Saulóske: “Phen dynaríske, sob (kaj) jov te džal angíl aménde. I jov gijá angíl, a tu terdjov kakaná, i me otčhakirava túke, so phendiá Devél.”