Read Bambam Kadadiam 11 Bible Online

Kadadiam 11 - Bambam bible

Kadadiam 11

¹Indo eta too anggapi sahhupa basana hupatau illaam lino.

²Pissananna deem buda tau lao umpeä ongeam dekke tandai mata allo. Ullambi'um mesa hante pappa' illaam Sinear, iya hapa'im eta.

³ [3-4] Ma'pattujuim naua: “Tapapiaia' mesa kota kasalle anna tapapiaia' mesa ongeam ma'eham-eham la tapakende'a' längäm langi' malangka'na anna malakia' kaissangam anna ma'mesa liu. Tapapiaa' batu tela la tapomapia lälläna, anna malai makahha'.” Iya umpapiaim batu tela sola panti' la napopampanti' mane napahandu'i napake'de'.

⁵Pissananna sulem DEBATA umpetua' indo kota sola ongeam ma'eham-eham napake'de' hupatau.

⁶Tappana naita DEBATA, ma'kadam naua: “Taitanna' too inde mai hupatau aka ma'mesam anna mesa basana nasuhum mala napadadi susi indee. Inde mane pa'pahandusanna hi too. Senga'um tia ke dako'um, aka iai too napattuju tä' mala tala sule lako.

⁷Dadi mapia ke tapentama alla'ia' anta pasisala-salaia' basana, anna malai tä' naissam sibasa-basai.”

⁸Napateemmi too DEBATA nasuhum tisembu' indo hupatau lako lino, lambi' tä'um tahhu' mengkähä umpapia mesa kota kasalle.

⁹Iam too anna disangaim indo kota “Babel”, aka etam too DEBATA umpasisala-sala basana ingganna hupatau anna napasisähä'-sähä'i ussambai lao lino.

¹⁰Susi inde tulasanna pessubunna Sem: Dua taunni puhanna bussu uwai, wattu eta too sahatu'um taunna dadinna Sem, iya undadiammi mesa muane-ane nasangai Arpakhsad.

¹¹Puhai undadiam Arpakhsad, tubopi lima hatu' taunna Sem anna undadiam polepi sanaka-naka änä', muane anna baine.

¹²Tappana tallu pulo limai taunna dadinna Arpakhsad, undadiammi mesa muane, nasangai Selah.

¹³Puhai undadiam Selah, tubopi appa' hatu' tallu taunna Arpakhsad anna undadiam polepi sanaka-naka änä', muane anna baine.

¹⁴Tappana tallu puloi taunna dadinna Selah, undadiammi mesa muane, nasangai Eber.

¹⁵Puhai undadiam Eber, tubopi appa' hatu' tallu taunna Selah anna undadiam polepi sanaka-naka änä', muane anna baine.

¹⁶Tappana tallu pulo appa'i taunna Eber, undadiammi mesa muane, nasangai Peleg.

¹⁷Puhai undadiam Peleg, tubopi appa' hatu' tallu pulo taunna Eber anna undadiam polepi sanaka-naka änä', muane anna baine.

¹⁸Tappana tallu puloi taunna Peleg, undadiammi mesa muane, nasangai Rehu.

¹⁹Puhai undadiam Rehu, tubopi dua hatu' kaseha taunna Peleg anna undadiam polepi sanaka-naka änä', muane anna baine.

²⁰Tappana tallu pulo duai taunna Rehu, undadiammi mesa muane, nasangai Serug.

²¹Puhai undadiam Serug, dua hatu' pitupi taunna tubo Rehu anna undadiam polepi sanaka-naka änä', muane anna baine.

²²Tappana tallu puloi taunna Serug, undadiammi mesa muane, nasangai Nahor.

²³Puhai undadiam Nahor, dua hatu'pi taunna tubo Serug anna undadiam polepi sanaka-naka änä', muane anna baine.

²⁴Tappana dua pulo kasehai taunna Nahor, undadiammi mesa muane, nasangai Terah.

²⁵Puhai undadiam Terah, sahatu' sapulo kasehapi taunna tubo Nahor anna undadiam polepi sanaka-naka änä', muane anna baine.

²⁶Pitu puloi taunna dadinna Terah undadiammi muane tallu nasangai Abram, Nahor, anna Haran.

²⁷Susi inde tulasanna pessubunna Terah: Terah undadiam Abram, Nahor, anna Haran. Inde Haran undadiam mesa muane isanga Lot.

²⁸Tubopi Terah ambena Haran anna matei Haran dio kota kadadianna isanga Ur dio Kasdim.

²⁹Abram sipobaine Sarai anna Nahor ia sipobaine Milka, änä'na Haran anna deempi änä'na Haran muane isanga Yiska.

³⁰Indo Sarai tämänä.

³¹Iya le'ba'um Terah umpellei kota Ur-Kasdim la lako Kanaan sola Abram änä'na anna ampona isanga Lot sola Sarai manintunna, bainena Abram. Sapo' sulei lako kota Haran, iya hapa' dio ohi.

³²Dua hatu' limai taunna dadinna Terah, iya matem dio Haran.