Read Bambam Kadadiam 2 Bible Online

Kadadiam 2 - Bambam bible

Kadadiam 2

¹Susim too napapuha umpadadi langi' anna lino sola ingganna issinna Puang Allataala.

²Tappana lambi' allo kapitunna puha asammi indo ingganna aka-aka napadadi Puang Allataala. Iya allo iam too naongei tohho Puang Allataala aka dadi asammi pa'padadinna.

³Natamba'um anna napasähä' allo kapitunna, aka allo iam too naongei Puang Allataala tohho aka dadi asammi pa'padadinna.

⁴Susi inde tulasanna indo anna napadadi Puang Allataala langi' anna lino: Wattunna anna napadadi Puang Allataala DEBATAnta langi' sola lino,

⁵tä'pi deem humpu' tubo dio mai litä' anna tä'pi deem tanangam mukku' dio mai bela', aka tä'pi deem napatuhum Puang Allataala DEBATAnta uham. Anna pa'depi duka' hupatau ungkähä litä'.

⁶Sapo' anggam deem susi langullo buttu dio mai litä' si umbossi'i ingganna aka-aka lako lino.

⁷Iya mualam sobä' Puang Allataala DEBATAnta anna natampai mesa tau, mane nasimbuhu'i tama illäna penaba mepatubo nasuhum tubo.

⁸Tappana puha ia too, umpapiam bela' Puang Allataala DEBATAnta dio tandai mata allo illaam Eden, anna napatadongkonni indo tau puha napadadi illaam indo bela'.

⁹Iya napatubom Puang Allataala DEBATAnta ma'hupa-hupa kaju si mapi'dä' diita anna si mapia buana mala diande. Anna illaam tängäna indo bela' tubo satoo' kaju la mala mepatubo anna satoo' kaju la mala mepaissanni kamapiaam anna kakadakeam.

¹⁰Deem mesa salu muola Eden si ullessä'i indo bela'. Umpellei indo bela', iya tibahe appa'um.

¹¹Mesa disangai Salu Pison. Salu ia too muola lako lembäna Hawila, indo ongeam si dipangngalai bulabam.

¹²Bulabanna ongeam ia too mapia. Deem toi duka' dama' bubanau' anna batu masulli'.

¹³Anna kaduanna disangai Salu Gihon. Salu ia too muola lako ia lembäna Kush.

¹⁴Anna katallunna disangai Salu Tigris, mangngola lako ia tandai mata allona Asyur. Anna kaappa'na disangai ia Salu Efrat.

¹⁵Naeli' Puang Allataala DEBATAnta indo tau anna napatadongkonni illaam bela' Eden, aka la nakähä anna najagai.

¹⁶Mane napahentai Puang Allataala DEBATAnta naua: “Ingganna bua kaju illaam inde bela' mala asam muande.

¹⁷Anggam buana indo kaju mepaissanni kamapiaam anna kakadakeam, tä' si'da-si'da ia la mala muande. Aka maka' muande la mate eta siangko.”

¹⁸Puhai ia too ma'kadam Puang Allataala DEBATAnta naua: “Tä' mapia ke anggam mesa-mesanna inde tau tubo. Dadi mapia ke dipapiaanni duka' solana, to la sihatam umpamoloi.”

¹⁹Anna mane mualai litä' anna natampai ingganna hupanna olo'-olo' si diona galantangam sola ingganna hupanna dassi yabo lawwa. Puhai natampa, nababam lako olona Adam aka la pantam nasangai anna napehingngii Puang Allataala aka la nasangaiam. Iai too nasangaiam indo olo'-olo', ia lium too sanganna.

²⁰Iya nasangaim indo ingganna olo'-olo', susi manahanna teem malaihanna sola ingganna dassi. Sapo' tä'pi ia deem naita Adam la sihatanna nasi'dim la mala umpamoloi.

²¹Iya napalimpe'um mamma' Puang Allataala DEBATAnta indo Adam. Mahassanni mamma' naäläim mesa usu'na, mane natampi'i sule indo pangngalaanna.

²²Indo usu' naala illaam mai kalena Adam natampa mesa baine, anna mane nababaam lako olona Adam.

²³Iya nauam Adam: “Mane inde hi pole' to kusihatangam, aka bukungku napobuku anna baleku napobale. Anna la disangai baine aka diala illaam mai kalena muane.”

²⁴Iam too anna lako mesa muane la umpellei indona sola ambena anna sialai mesa baine, nasuhum duai la mendadi mesa illaam ingganna-ingganna sia.

²⁵Wattu eta too indo muane sola bainena bassim ma'kambelä, sapo' tä' masihi'.