Read Bambam Kadadiam 49 Bible Online

Kadadiam 49 - Bambam bible

Kadadiam 49

¹Untambaim änä'na Yakub naua: “Mai asangkoa' anna umpehingngii, angku tulasangkoa' la maaka susi katuboammua' sola ingganna pessubummu allo di dako'na.

²Ikoa' änä'na Yakub pa'hempungkoa' anna umpatananniia' talinga tula'na Israel ambemu.

³Ruben änä' uluaku, iko uhu kamatohoangku, pa'pahandusam läpu'ku. Ikom to handam matande anna kuasa.

⁴Susiko uwai salu buntu' tä' umbela ungkuasai kalemu, nasuhum taikom dipaitoo'na aka umpasolako metindo bainena ambemu. Ullängänni anna ungkadakeiko petindoangku.

⁵Simeon anna Lewi to siundu'; Pa'dammua' umpake ma'gau' makahha'.

⁶Tä'kia' too sola pattuju anna tä'kia' sola pa'palakoam. Aka untuhu'ikoa' nassummu nasuhum umpangngula'koa' penabammu lao papateam anna uhhatta'ikoa' uha' kondesanna sapim.

⁷La napassalakoa' DEBATA aka penaba makahha'mua' anna aha' kadakemua'. La kusehangkoa' lako alla'-alla'na pessubunna Yakub anna la kutähhä'koa' tama alla'-alla'na pessubunna Israel.

⁸Yehuda, la uhhuppu' balinna; la napa'kasallei anna napenombai solasubunna.

⁹O änä'ku, susingko singa mangnguha puhai muande pealanna, ma'pasulem sule längäm ongeanna lao mamma'. Tä' deem bahani la untundanni.

¹⁰Yehuda la muanda'i liu tekkem kahajaam. Pessubunna la ma'pahenta sule lako kasuleanna To muanda'i kakuasaam. Anna hupatau buttu dio mai ingganna kahajaam la mentinaum lako pahentana.

¹¹Änä' keledainna Yehuda la disäke' lako handam mapianna too' anggur, anna uwai anggur la natappa'iam pohebana tandana bosa'.

¹²La malotä matanna napobua' anggur anna mabusa isinna napobua' bumbungam.

¹³Zebulon la tohho dio bihim le'bo'; ongeanna la si naongei tisampo kappala' lempä mentulindum, anna attasa'na la sule lako Sidon.

¹⁴Isakhar susi keledai matoho ma'päsä illaam alla' teke'na.

¹⁵Tappana muita mapia pellubeanna anna malompona litä', iya ponno penabanna umbaba babaanna anna malängngo' penabanna diposabua' assala'na mala tohho eta.

¹⁶Dan la tohho ma'bisaha anna uhhindim solana, aka pessubunna duka' Israel.

¹⁷La susi ula' lako lalam untikku buni kambutu' daham, nasuhum metobä boko' to ussäkei.

¹⁸O DEBATA, Iko kuhannuam la melappasam dio mai kamasussaam.

¹⁹Gad, la napemäläiko tau napamuhui, sapo' iko hi la umpadondoi anna umpamuhui.

²⁰Asyer, la langa' kinandemu, iko la naongei buttu kinande si napohäe tomahaja.

²¹Naftali la susiko jonga bihä dilappa', si mapia pa'änäsam.

²²Yusuf sihhapangko kaju paha' bua tubo dio sa'de kalimbuä, mahombo täkena mehhoe lao ullebam bala.

²³Napandasako balimmu, natalimbum tama nabälä'du'.

²⁴Sapo' tontä liu matogom bälä'du'mu anna matoho liu katea'mu, napasukum kuasanna To napenombai Yakub. To Ma'kambi'na anna Hindim Batunna Israel.

²⁵Puang Allataala To Handam Kuasa to napenombai ambemu la umpamoloiko, napatuhungam pa'tamba' yabo mai langi' anna dio mai le'bo' sola hongko' banne tau.

²⁶Hongko' buttu di DEBATA lako ambemu, mayaboam puha ia anna la hongko' buttu illaam mai ingganna tanete masäe. Ingganna hongko' ia too la lu lako Yusuf anna lu dokkoi lisu pala'na, aka ia tika'liu' mapianna pa'palakoanna illaam alla'-alla'na solasubunna.

²⁷Benyamin bahani susi serigala. Mebengngi' muande pealanna, kahubenni nataba-tabam la'binna.”

²⁸Iam too inde diona pessubunna Israel anna kada napayolo lambam natampeam sapulo dua änä'na situhu' la sihatanna si mesa-mesa pandadianna.

²⁹ [29-30] Ma'pakahi'dim Yakub lako änä'na naua: “Mahuku'um kamateangku. Angga hia la ullamum dioä' too Kanaan siampe' neneku anna tomatuangku, illaam indo leä dio Makhpela sitingngajo Mamre. Indo leä sola bela' lako ampe'na puha naalli Abraham lako Efron to Het, la napa'ku'bu'i.

³¹Etam naongei Abraham sola Sara bainena dilamum. Eta toi naongei Ishak sola Ribka bainena dilamum, anna eta duka' kupallamunni Lea.

³²Indo litä' anna ku'bu' pangngallinna neneku Abraham lako to Het.”

³³Tappana puha ma'pakahi'di lako änä'na, iya metindom anna ummaloloanni bitti'na anna kattui penabanna lambi' le'ba'um sungnga'na ma'mesa sola nene to naponene.