Read Bambam Kadadiam 5 Bible Online

Kadadiam 5 - Bambam bible

Kadadiam 5

¹ [1-2] Wattunna anna untampai hupatau Puang Allataala, natampa susi kalena. Napapia dua hupa: muane anna baine. Puhai natampa, natamba'um anna nasangai “Hupatau”. Iya indem pessubunna Adam:

³Tappana sahatu' tallu puloi taunna dadinna Adam, iya undadiammi mesa muane nasangai Set. Indo Set bangom kaju ambena.

⁴Puhai undadiam Set, tubopi kahua hatu' taunna Adam anna undadiam polepi sanaka-naka änä', muane anna baine.

⁵Ia ham mane matei kaseha hatu' tallu pulo taunna.

⁶Tappana sahatu' limai taunna dadinna Set, undadiammi mesa muane nasangai Enos.

⁷Puhai undadiam Enos, tubopi kahua hatu' pitu taunna Set anna undadiam polepi sanaka-naka änä', muane anna baine.

⁸Ia ham mane matei kaseha hatu' sapulo dua taunna.

⁹Tappana kaseha puloi taunna dadinna Enos, undadiammi mesa muane, nasangai Kenan.

¹⁰Puhai undadiam Kenan, tubopi kahua hatu' sapulo lima taunna Enos anna undadiam polepi sanaka-naka änä', muane anna baine.

¹¹Ia ham mane matei kaseha hatu' lima taunna.

¹²Tappana pitu puloi taunna dadinna Kenan, undadiammi mesa muane, nasangai Mahalaleel.

¹³Puhai undadiam Mahalaleel, tubopi kahua hatu' appa' pulo taunna Kenan anna undadiam polepi sanaka-naka änä', muane anna baine.

¹⁴Ia ham mane matei, tappana kaseha hatu' sapulo taunna.

¹⁵Tappana annam pulo limai taunna dadinna Mahalaleel, undadiammi mesa muane, nasangai Yared.

¹⁶Puhai undadiam Yared, tubopi kahua hatu' tallu pulo taunna Mahalaleel anna undadiam polepi sanaka-naka änä', muane anna baine.

¹⁷Ia ham mane matei kahua hatu' kaseha pulo lima taunna.

¹⁸Tappana sahatu' annam pulo dua taunna dadinna Yared, undadiammi mesa muane nasangai Henokh.

¹⁹Puhai undadiam Henokh tubopi kahua hatu' taunna Yared anna undadiam polepi sanaka-naka änä', muane anna baine.

²⁰Ia ham mane matei kaseha hatu' annam pulo dua taunna.

²¹Tappana annam pulo lima taunna dadinna Henokh, undadiammi mesa muane nasangai Metusalah.

²²Puhai undadiam Metusalah, tubopi tallu hatu' taunna Henokh silombum Puang Allataala anna natuhu'i pa'elo'na. Anna undadiam polepi sanaka-naka änä', muane anna baine.

²³[23-24] Dadi tallu hatu' annam pulo taunna naolaam tubo Henokh silombum liu Puang Allataala mane tä'i deem diita pole aka naäkä'um Puang Allataala längäm suhuga.

²⁵Tappana sahatu' kahua pulo pitu taunna dadinna Metusalah, undadiammi mesa muane nasangai Lamekh.

²⁶Puhai undadiam Lamekh, tubopi pitu hatu' kahua pulo dua taunna Metusalah anna undadiam polepi sanaka-naka änä', muane anna baine.

²⁷Ia ham mane matei kaseha hatu' annam pulo kaseha taunna.

²⁸Tappana sahatu' kahua pulo dua taunna dadinna Lamekh, undadiammi mesa muane

²⁹nasangai Nuh aka naua: “Inde änä' la mebabaam pepakahangaam illaam pengkähänganta indo taongei madahha muasai pala'ta ungkähä inde litä' puha natädo DEBATA.”

³⁰Puhai undadiam Nuh, tubopi lima hatu' kaseha pulo lima taunna Lamekh anna undadiam polepi sanaka-naka änä', muane anna baine.

³¹Ia ham mane matei pitu hatu' pitu pulo pitu taunna.

³²Tappana lima hatu' taunna dadinna Nuh, undadiammi tallu muane anna nasangai Sem, Ham, anna Yafet.