Read Bambam Kadadiam 9 Bible Online

Kadadiam 9 - Bambam bible

Kadadiam 9

¹Puang Allataala untamba' Nuh sola änä'na naua: “Pembea'koa' anna mala umponnoi lao lino pessubummu.

²La nakahea'koa' ingganna olo'-olo' inde lino susi ingganna dassi yabo lawwa, susi ingganna olo'-olo' yabo galantangam, teem olo'-olo' dio uwai. Anna la ungkuasaia' ingganna indo olo-olo' aka la kupadokkoangkoa' lisu pala'mu.

³Ingganna menabanna mala asanna' muande sola indo to puha kubeengkoa', ingganna daungkaju anna bua kaju.

⁴Sapo' anggam sahhupa tä' la mala muandea', indo olo'-olo' tää'na diäläi hahana, aka indo haha ongeanna penaba.

⁵ [5-6] Sapo' diona hahamua' la kutuntu' bala'na. Aka iai too umpatitollo hahana hupatau, la napatitollo duka' hupatau hahana; la olo'-olo' daka umpatei, la padanna siangka hupatau. Aka dipapia hupatau susi hupanna Puang Allataala.

⁷Pembea' lampa'koa' anna mala umponnoi lao lino pessubummu.

⁸ [8-9] Anna la kupadeengangkoa' pa'dandiam sola ingganna pessubummu,

¹⁰sola ingganna olo'-olo' tubo yabona inde lino susinna: ingganna dassi anna ingganna olo'-olo' manahanna anna malaihanna, indo umpasola messubum illaam mai kappala'.

¹¹Indem ia pa'dandiangku: Napahandu' temo tä'um la kupabussu uwai la untallanni lino sola issinna.

¹² [12-13] Anna la mendadi tanda pa'dandiangku lako ikoa' sule lako ingganna pessubummua' anna ingganna menabanna indo si umpasola, la si kupakende' sahihangku illaam gabum la umpotandaa' diua la tontä liu pa'dandiangku lako lino sule lako salako-lakona.

¹⁴Dadi kupamellum oi too allo anna tindä' oom sahiha,

¹⁵iya kukilalai oom indo pa'dandiangku matim anna lako ingganna menabanna: indo tä'um deem la kupabussu uwai untallanni ingganna menabanna.

¹⁶Iya kende' oi too kuita sahiha illaam gabum, kukilalai oom pa'dandiangku, indo la tontä sule lako salako-lakona lako ingganna menabanna illaam inde lino.

¹⁷Iam too inde la mendadi tanda pa'dandiangku kupadeengam lako ingganna menabanna illaam inde lino.”

¹⁸ [18-19] Indem ia änä'na Nuh napasola messubum illaam mai kappala': Sem, Ham, anna Yafet. Anna iam too inde to tallu nene to naponene hupatau lako lino. Ham ia ambena Kanaan.

²⁰Indo Nuh mendadi mesa to si mengkähä bela'. Iam too handam yolo ma'bela' anggur.

²¹Pissam wattu muihu' anggur Nuh lambi' mäbo', iya lentem-lentem bäbäm ma'kambelä illaam bahunna.

²²Muitanna ambena ma'kambelä indo Ham ambena Kanaan, tappa messubummi umpa'tulasam indo kakanna dua.

²³Sapo' indo ia Sem anna Yafet muala ia sambu' anna naballa'i yabo palempenna anna ma'saha boko'i tama bahum ussambu'i ambena indo kambelängam. Napasindum mennenne' liu lako olona indana muitai ambena kambelängam.

²⁴Tappana kilala Nuh, iya naissammi indo gau'na Ham änä' tämpä'na.

²⁵Nasuhum ma'kada naua: “La seda ia Kanaan. La naposabua' pälli' ingganna solasubunna.

²⁶Dipuji sanganna DEBATA, Puang Allataala to napenombai Sem. La diposabua' di too Kanaan naposabua' Sem.

²⁷La Puang Allataala hi too la umpomalobäam ongeanna Yafet anna la masannam sitadongkongam Sem. Anna Kanaan ia la mendadi sabua'na.”

²⁸Tallu hatu'pi lima pulo taunna tubo Nuh balinna nabussui uwai inde lino.

²⁹Ia ham mane matei kaseha hatu' lima pulo taunna dadinna.